Klötensack

De Klötensack – oder as medizinischen Fachbegreep dat Skrotum – is en Huut- un Muskelsack bi männlich Söögdeerten, dat to de Geslechtsdeelen höört. Disse Sack (kanns ok Büdel to seggen) bargt de Klöten, Nevenklöten, den Anfang vun’n Saatleider un dat End vun’n Saatstrang. De Klötensack liggt twüschen de Benen, den Pint un den Damm. Bi’n Minschen wasst af de Pubertät an’n Sack tomeist Schaamhoor.

De Funkschoon vun’n Klötensack is, de Klöten twee bit fief Grad Celsius köhler to hollen as den Rest vun’n Lief. Disse Temperatur is denn an’n Besten för de Produkschoon vun Spermien un ok för de Holtborkeit vun al produzeerte Samen. De Temperatur vun de Klöten warrt dordör regelt, dat sik de Sack bi Küll tohopentütt, watt de Klöten dichter an den warmeren Lief holt un weniger Bavenflach för’t Afgeven vun Warms hett. Bi Warms entspannt he sik un jüst dat Gegendeel liggt den vör.

De as Klötenafstieg (Descensus testis) betekente Vörgang, bi den sik de Klöten rünner in den Klötensack bewegt schall laatstens bit to’n neegten Maand in de Swangerschap afslaten wesen. Dat gellt as Teken för de Riep vun’n männlichen Neeborenen. De anatomsche Opbo vun’n Klötensack warrt dordör insofern bestimmt, as de Utstülpen (Processus vaginalis) vun’t Buukfell, de bi’n Afstieg vun de Klöten passeert, de Wand vun de Klötenhöhl (Cavum Scroti) btw. vun de beiden Skrotalfachen billt. De Skrotalfachen sünd dör dat Skrotalseptum vunenanner splitt. De Verbinnen na de Buukhöhl över den Liestenkanal, de dat toeerst gifft, veröödt dorbi normalerwies. To’n een verhinnert dat de Entwickeln vun en Skrotalhernie, to’n annern dat Torüchgahn vun de Klöten in den Liestenkanal.

Dat binnere Blatt vun disse Buukfellhüll (Tunica vaginalis testis) deckt de Klöten un Nevenklöten af un warrt as Epiorchium betekent. Dat, wat na buten wiest, warrt Periorchium nöömt. De Ünnerhuut vun’n Klötensack bargt gladde Muskulatur un warrt dorüm as „Fleeschhuut“ (Tunica dartos) betekent. Fletigkeit, de sik in’n Klötensack ansammelt, föhrt to en Hydrozel. Variköse Utwieten vun de venösen Bloodfaten ümto, vör allem in’t linke Skrotalfach, sünd sünners goot as Varikozelen in’n Stahn to sehn. Bi dickliefte Mannslüüd kann en Intertrigo op den Klötensack övergriepen. Sünners bi prädisponeert Lüüd künnt sik Abszessen vun de Huut as Skrotalabszessen dörslahn.

In de Historie vun’t Tostannenkamen is de Klötensack dat Gegenstück to de groten Schaamlippen bi de Fro. Bi de Froenslüüd versmölt disse Genitalwulsten nich mitenanner, wat bi de Mannslüüd aver passeert. De Lien woneem de Versmölten vun de beiden Wulsten passeert blifft as dat baven besnackte Skrotalseptum bestahn. An’n Klötensack is dorbi en Oort vun „Naht“ (de Raphe scroti) to sehn, wo dat tohopenwassen is.

Ut den Klötensack vun Deerten (t. B. vun’n Zegenbuck) weern in fröhere Tieten Büdels maakt, de ünner annern as Drinkbuddel bruukt weern. Dorvun is mööglicherwies ok de Begreep Bucksbüdel afleddt. Dat is aver nich de eenzige Vermoden to de Naamsafkunft.