John Landis

John Landis (* 3. August 1950 in Chicago, Illinois) is en US-amerikaansch Filmspeelbaas, Filmproduzent, Schauspeler un Dreihbookschriever mit greeksch Vörfohren.

Landis hett bi’n Film toeerst kort as Stuntman arbeit, so to’n Bispeel in Sergio Leones Klassiker C'era una volta il West (dt.: Spiel mir das Lied vom Tod) vun 1968. Sien eersten Film as Dreihbookschriever un Speelbaas, Schlock, hett he 1973 dreiht. Mit dissen Film hett he sien Talent för dick opdragen Kummedie un fantastisch Elementen wiest. Vun de Kritik weern sien Filmen nich jümmer goot opnahmen. Aver he hett en poor Filmen maakt, de ok vundaag noch jümmer geern sehn warrt, as t. B. Kentucky Fried Movie, The Blues Brothers oder An American Werewolf in London. Man, Landis is nich blots Speelbaas un Schriever, in eenige Filmen hett he ok as Schauspeler vör de Kamera stahn, tomeist aver blots in lütte Rullen un Cameo-Optreden. En Naam hett he sik ok as Produzent maakt, ü.a. för den Videoclip Thriller vun Michael Jackson.

1982 geev dat an’n letzten Dag vun de Dreiharbeiten vun de Folg The Movie (dt.: Unheimliche Schattenlichter) to Twilight Zone to en gresigen Unfall, bi den de Hööftdorsteller Vic Morrow un twee Kinner dör de Rotorblööd vun en Heevschruver to Dood kamen sünd. Landis hett sik dorna düchtig wat anhöörn möten un is ok anschulligt worrn, dat he wiel de Dreiharbeiten ünner Drogen stahn hebben schall. En Sworengericht hett em aver 1987 vun Vörholt vun’n Doodslag freesnackt. De Familien vun de storven Kinner hebbt vun de Produkschoonsfirma Warner Bros. Schadensgeld in Millionenhööch kregen. En poor Johr vörher al harrn sik de Döchter vun Vic Morrow, Carrie Morrow un Jennifer Jason Leigh, mit Warner Bros. eenigt.

Filmografie (Utwahl)

Johr	Titel	Funkschoon
1973	Schlock dt.: Schlock – Das Bananenmonster	Dreihbook, Speelbaas, Dorsteller
1977	Kentucky Fried Movie	Speelbaas
1978	Animal House dt.: Ich glaub’, mich tritt ein Pferd	Speelbaas
1980	The Blues Brothers dt.: Blues Brothers	Speelbaas, Dreihbook
1981	An American Werewolf in London dt.: American Werewolf	Speelbaas, Dreihbook
1983	Trading Places dt.: Die Glücksritter	Speelbaas
1985	Into the Night dt.: Kopfüber in die Nacht	Speelbaas
1985	Spies Like Us dt.: Spione wie wir	Speelbaas
1985	Clue dt.: Alle Mörder sind schon da	Dreihbook
1986	¡Three Amigos! dt.: Drei Amigos	Speelbaas
1987	Amazon Women on the Moon, Filmepisoden dt.: Amazonen auf dem Mond oder Warum die Amis den Kanal voll haben	Speelbaas, Produzent
1988	Coming to America dt.: Der Prinz aus Zamunda	Speelbaas
1992	Innocent Blood dt.: Bloody Marie – Eine Frau mit Biss	Speelbaas
1994	Beverly Hills Cop III	Speelbaas
1998	Susan’s Plan	Dreihbook, Speelbaas, Produzent
1998	Blues Brothers 2000	Dreihbook, Speelbaas, Produzent
2007	Mr. Warmth: The Don Rickles Project	Speelbaas
2010	Burke and Hare dt.: Burke & Hare – Wir finden immer eine Leiche	Speelbaas
2011	Wendy Liebman: Taller on TV	Produzent

Filmpriesen

Ünner dat Filmwark vun John Landis sünd ok en poor Filmen wesen, de mit Filmpriesen uttekent worrn sünd. Nomineert weer Landis vör wietere negen Filmen, dorünner ok dree Golden Himberen. Uttekent weer Landis mit veer Priesen:

1982: den Pries för’n Besten Film vun’t Fantafestival för Schlock.
1985: den Special Jury Prize vun’t Cognac Festival du Film Policier för Into the Night.
1992: den CableACE as Produzent vun de Kummedie-Serie Dream On.
2004: den Copper Wing Tribute Award vun’t Phoenix Film Festival

Weblenken

John Landis in de Internet Movie Database (engelsch)