Obbens

Wapen/Flagg	Koort
Basisdaten
Bundsland: Neddersassen Landkreis: Stood Samtgemeen: Obbens Gemeen: Obbens
Inwahners:
Hööchd:	39 m över NHN
Postleettall:	21641
Vörwahl:	04167
Geograafsche Laag:	Koordinaten:53° 26′ N, 9° 37′ O53° 26′ N, 9° 37′ O

Obbens (hoochdüütsch Apensen) is de Hauptoort von de Gemeen Obbens (Samtgemeen Obbens) in’n Landkreis Stood, Neddersassen.

Obbens liggt op de Stoder Geest. Dat Water ut dat Rebeed flütt in’n Süden na’n Guldbeek hen af, in’n Noorden över’n Möhlenbeek na de Au/Lüh un in’n Westen över’n Steenbeek.

De Naveröörd sünd Nottensdörp, Heendörp un Neeklooster in’n Noorden, Heitmannshusen, Buxthu un Ottens in’n Noordoosten, Heimbrook in’n Oosten, Nindörp in’n Süüdoosten, Guldbeek un Beekdörp in’n Süden, Kommerbusch in’n Süüdwesten, Griemshorst un Wittenfell in’n Westen un Ruschwedel un Grundolendörp in’n Noordwesten.

De Oort kummt 1231 as Abbenhusen toeerst in de Oorkunnen vör. De Naam sett sik wohrschienlich tohoop ut’n Vörnaam Abbo un -husen.

In’n Eersten Weltkrieg sünd 48 Soldaten ut Obbens fullen oder vermisst un in’n Tweten Weltkrieg 63.^[1]

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Obbens in’n Kanton Harsfeld höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Harsfeld in’n Kanton Hornborg.

Vör 1852 hett dat Dörp to dat Gericht Delm höört un weer denn von 1852 bet 1859 in dat Amt Hornborg. Denn is dat Deel von dat Amt Harsfeld worrn. Na 1885 hett dat denn to’n Kreis Stood höört un von 1932 af an to’n hüdigen Landkreis Stood.

De Gemeen hett vör 1972 to de ole Samtgemeen Obbens höört. De is an’n 1. Juli 1972 mit de Gemeenreform in Neddersassen oplööst worrn un Obbens is sietdem Deel von de ne’e un gröttere Samtgemeen Obbens.

Obbens is evangeelsch-luthersch präägt un billt en egen Kaspel.

För de Kathoolschen is de St.-Maria-Kark in Buxthu tostännig.

De Karkhoff Obbens liggt an de Straat Op’n Brink.

Dat Wapen wiest in root en sülvern Arm mit Panzer, de von rechts na links wiest un en sülvern Sweert mit gollen Greep höllt.

Dat Wapen kummt von dat Segel von dat ole Gericht op’n Delm. Dat Dörp hett dat Wapen dör Erlass von dat Neddersassische Binnenministerium an’n 18. Februar 1952 kregen. 1972 is dat Wapen ok op de Gemeen Obbens övergahn.

En Denkmaal för de Fullenen ut de twee Weltkrieg’ steiht in Obbens bi de Kark.

De Winkelbarg is de gröötste Graffknüll in'n Landkreis Stood. Bekannt sünd de Hünengräver in Grundolendörp.

In den TSV Obbens von 1903 warrt vele Sportoorden anbaden von Basketball bet Turnen. De gröttste Afdelen is Football. De Schüttenvereen Obbens is 1907 grünnt worrn.

Obbens gellt na dat Regionale Ruumordnungsprogramm as Grundzentrum för de Öörd in de Ümgegend.

Dat gröttste Ünnernehmen in’n Oort is Eisbär Eis.

De Kreisspoorkass Stood hett in Obbens in de Buxthuer Straat 14 en Filiaal.

Obbens hett en egene freewillige Füürwehr, de 1895 grünnt worrn is.

Obbens is no Oosten öber de Landstroot 127 mit Buxthu un mit de Bundsstraat 73 verbunnen. Da Landstroot 130 geiht in’n Süüden na Beekdörp un in’n Noorden öber Grundolendörp no Nottensdörp. Twüschen de L 127 un de L 130 is 2007/2008 en Ümgehungsstraat boot worrn, dat de Autos nich mehr all dör de Oortsmidd von Obbens dör mööt.^[10]

De nächste Autobahn is de Autobahn 26 (Afsnidd Stood–Hamborg). De Opfohrt 6 Jörk liggt so negen Kilometer in’n Noorden von Obbens an de K 26.

De Oort is mit’n Bahnhoff Obbens anbunnen an de Elv-Werser-Bahn (KBS 122), de vun de Iesenbahnen un Verkehrsbedrieven Elv-Werser (EVB) bedreven warrt un vun Bremerhoben öber Bremervöör - Harsfeld un Obbens na Buxthu föhrt (Bahnlien Bremerhoben–Buxthu).

In Obbens gifft dat de Grundschool Obbens, de Oberschool Obbens un de Fre’e Waldorfschool Obbens.

Dat gifft ok twee Kitas un en Speelkreis.

För dat Afwater is de Stadtentwässerung Buxthu tostännig.

1. ↑ Onlineprojekt Gefallenendenkmäler
2. ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 10
3. ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 22
4. ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 149
5. ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 140
6. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 149
7. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 158
8. ↑ Inwahnertallen op gemeindeverzeichnis.de
9. ↑ ^{a b c} Inwahnertallen op verwaltungsgeschichte.de
10. ↑ Umgehungsstraße: In Apensen läuft es rund, Stader Tageblatt von’n 25. Juni 2007