Margaret (Maand)

In de Astronomie is Margaret (ok XXIII oder S/2003 U3) de Naam vun en vun de lütteren Maanden wieter buten vun den Planeten Uranus. De Uranus-Maanden hebbt all Naams vun Figuren ut dat Wark von William Shakespeare oder Alexander Pope; Margaret is de latere Fro vun’n König Hinnerk den Sössten ut Shakespeares King Henry VI.

De Maand is an’n 29. August 1993 vun de Astronomen Scott S. Sheppard un David C. Jewitt opdeckt worrn, ofschonst he egentlich al’n poor Daag fröher vun Matthew J. Holman un John J. Kavelaars sehn weer. Man ut de Daten harrn se keen Bahn utreken künnt, un jem weer ok nich klor worrn, dat se en Maand sehn harrn, de noch gor nich bekannt weer.

De Maand Margaret bruukt ungefähr 1687 Daag, för een Ümloop üm den Planeten. Dorbi hett he en middler’n Afstand von 14.345.000 km. De Ümloop is rechtlöpig, also in’n lieken Dreihsinn as de Rotatschoon vun’n Uranus. All de anneren buteren Maanden loopt torüchlöpig üm den Planeten. De Maandbahn hett en Exzentrizität vun 0,661 un is dormit al en teemlich lang togen Ellips. De Bahn is dorbi ok noch üm ungefäähr 56,63° gegen den Äquater vun’n Uranus kippt.

Över den Maand is opstunns noch nich veel bekannt. Sien Dörmeter warrt mit ruch weg 20 km angeven. De Albedo liggt na en Schätzen bi 0,04 un de Dicht bi 1,5 g/cm³, wat ungeääfr dat is, wat man vun de anneren lütten Maanden ok kennt.

Maanden vun den Planeten Uranus

Ariel | Belinda | Bianca | Caliban | Cordelia | Cressida | Cupid | Desdemona | Ferdinand | Francisco | Juliet | Mab | Margaret | Miranda | Oberon | Ophelia | Perdita | Portia | Prospero | Puck | Rosalind | Setebos | Stephano | Sycorax | Titania | Trinculo | Umbriel

Kiek ok na bi: List vun de Uranusmaanden