Cressida (Maand)

Cressida (ok: Uranus IX oder S/1986 U 3) betekent in de Astronomie en vun de lütten Maanden vun den Planeten Uranus. Cressida is en vun de inneren Maanden, över den aver ok noch nich ganz veel künnig is. De Uranus-Maanden hebbt all Naams vun Figuren ut dat Wark von William Shakespeare oder Alexander Pope; Cressida is en vun de Titelfiguren ut Shakespeares Tragödie Troilus and Cressida (dt.: „Troilus und Cressida“).

De Maand is an’n 9. Januar 1986 vun den Astronomen Stephen P. Synnott op Biller vun de Ruumsond Voyager 2 opdeckt worrn. He hett toeerst de vörlöpig Beteken S/1986 U 3 kregen.

Cressida kreist in ungefähr 10 Stünnen un 26 Minuuten eenmol üm Uranus. Dorbi hett he en middler’n Afstand vun 61.767 km. De Maandbahn hett en ganz lütte Exzentrizität von 0,00088 un is also so goot as kreisrund. De Bahn is üm un bi 0,16° gegen den Äquater vun’n Uranus kippt, wat ok nich jüst veel is.

De Dörmeter vun den Maand liggt in’n Dörsnitt bi ungefähr 79,6 km. Mit 1,3 g/cm³ liggt de Dicht düütlich ünner de vun de Eer. De Wetenschopplers gaht dorvun ut, dat de Maand to’n gröttsten Deel ut Wateries besteiht. De Bavenflach vun Cressida is teemlich düster mit en Albedo vun 0,07. Dat heet, dat 7 % vun dat Licht, dat op den Maand ankummt, wedder afstrahlt warrt. An de Bavenflach warkt en Sworversnellen vun 0,014 m/s², wat üm un bi een Promill vun de Eer is.

Maanden vun den Planeten Uranus

Ariel | Belinda | Bianca | Caliban | Cordelia | Cressida | Cupid | Desdemona | Ferdinand | Francisco | Juliet | Mab | Margaret | Miranda | Oberon | Ophelia | Perdita | Portia | Prospero | Puck | Rosalind | Setebos | Stephano | Sycorax | Titania | Trinculo | Umbriel

Kiek ok na bi: List vun de Uranusmaanden