Bokin' ny Nomery

Ny Bokin' ny Nomery na Bokin' ny Fanisana na Bokin' ny Fivahiniana dia boky fahefatra ao amin' ny Baiboly izay manohy ny tantara ao amin' ny Eksôdôsy (na Eksaody) momba ny fivezivezen' ny Israelita tao an-tany efitra notarihin' i Mosesy (na Môizy) hatrany amin' ny lemak' i Môaba, tsy lavitra ny tany Kanaana. Hafohezina amin' ny hoe Nomery na Fanisana na Fivahiniana ny anaran' ity boky ity. Ny Bokin' ny Nomery ao amin' ny Baiboly jiosy dia anisan' ny Tôrah, fa ao amin' ny Baiboly kristiana kosa izy io dia anisan' ny Pentateoka.

Ny teny hoe Nomery dia avy amin' ny teny latina hoe Numeri, lohatenin' io boky io ao amin' ny Volgata, avy amin' ny teny grika hoe Αριθμοί / Arithmoi izay azo adika hoe "fanisana", izany hoe fanisam-bahoaka. Ny hoe Fanisana kosa dia fandikana amin' ny teny malagasy izany teny grika sy latina izany. Tsy ny fanisam-bahoaka loatra anefa no lohahevitra iompanan' io boky io. Ao amin' ny Tanakh izy dia atao amin' ny teny hebreo hoe ספר במדבר / Sefer Be-Midbar ("boky tany an-tany efitra") izay mifanentana kokoa amin' ny zavatra resahiny.

Ao amin' ny Tanakh (Baiboly hebreo) dia boky mandrfafitra ny sokajy voalohany atao hoe Tôrah ny Sefer Be-Midbar, fa ao amin' ny Baiboly kristiana kosa dia anisan' ny Pentateoka ny Bokin' ny Nomery na Fanisana.

Azo zaraina telo ny Bokin' ny Nomery:

Ny fizaràna voalohany (Nom. 1.1 - 10.10) dia mirakitra ny fanisam-bahoaka natao, ny fandaminana ny fokom-pirenena roa ambin' ny folon' i Israely, ny sata manokan' ny Levita, ny fanaovam-panatitra isankarazany, ny fankalazana ny Paska, ary ny fanambaràna ny fanohizana ny dia ho any Kanaana.

Ity fizaràna faharoa ity (Nom. 10.11 - 21.35) dia mitantara ny fivahinian' ny Zanak' i Israely tao Kadesy, ny fandaminana ny asan' ny Levita, ny fiaingana avy eo Kadesy, ny sakantsakana tao Edôma, ny nahafatesan' i Aarôna, ny amin' ilay menarana varahina, ary ny nandresena ny Amalekita sy ny nahazoana an' i Basàna.

Ny fizaràna farany (Nom. 22 - 36) dia mitantara ny fahatongavan' ny Zanak' i Israely teo amorony atsinanan' i Jordana, teo amin' ny tany Kanaana, ny lalàna isankarazany, ny amin' i Balama, ny ady tamin' ny Madianita, ny nanendrena an' i Jôsoa ho mpitarika, ary ny fomba hizaràna ny tany.

• Boky ao amin' ny Pentateoka:
  • Bokin' ny Genesisy
  • Bokin' ny Eksôdosy
  • Bokin' ny Levitikosy
  • Bokin' ny Nomery
  • Bokin' ny Deoterônômia

• Petra-kevitra momba ny fanoratana ny Pentateoka
  • Petra-kevitra ara-tahirin-kevitra
  • Petra-kevitry ny sombin-dahatsoratra
  • Petra-kevitry ny fameno

• Fizaràna hafa ao amin' ny Testamenta Taloha:
  • Bokin' ny Mpaminany
  • Boky ara-tantara
  • Bokim-pahendrena

• Testamenta Taloha
• Testamenta Vaovao