Suizzidi

Quest articol chì l'è scrivud in lombard, con la Noeuva Ortografia Lombarda

El suizzidi l’è l’azzion del copàss.^[1] Strasorden mentai e fisegh, inscì coma l’abusament de di sostanze, inn tucc di fator que meten una persona a ris’c de suizzidi.^[2][3][4]

Un quaj suizzidi l’è un’azzion impulsiva portada de l’istress, problema ind i relazzion, sgenadure e bullisem.^[5][6][7] Lor che hann sgiamò provad a copàss gh’hann un ris’c pussee volt de zircà la mort ancamò.^[5] Di sforz eficazz per la prevenzion del suizzidi tœuven denter la limitazzion a l’azzess ai metod de suizzidi – compagn dei arme de fœugh, drœughe e velen – el tratament di strasorden mentai e abusament de di sostanze, ma anca el mejorament di condizzion economeghe.^[5][8] Ancaben che ghe saja di numer comun de ciamà quand che s’è ind un brut moment, la sò eficazzia l’è staita gnancamò ben studiada.^[9][10]

I opinion intuitù del suizzidi inn staite influenzade de di gross tema esistenziai coma la religion, l’onor, e el sens de la vita.^[11][12] I religion abrameghe consideren tradizzionalment el suizzidi coma un’ofesa a Dia per via de la credenza ind la sagralitaa de la vita.^[13] Duranta l’era di samurai in Sgiapon, una forma de suizzidi cognossud coma seppuku (腹切り, harakiri) l’era respetada per compensà un falliment, o coma una forma de protesta.^[14] El suizzidi e i tentativ de suizzidi eren inlegai ind la pupart di pais ozzidentai, ma a l’è pu inscì,^[15] ancaben che el resti un’ofesa criminal ind un quaj pajes.^[16] El suizzidi l’è considerad coma una grossa desgrazzia che la mena i sgent del mort, i sò amis e i member de la sò comunitaa a tant patiment, donca, a l’è vedud negativament indepertut in tut el mond.^[17][18][19]