Steve Jobs

Steven Paul "Steve" Jobs (San Francisco, California, 24 de febrér del 1955 - Palo Alto, California 5 de utùer del 2011) l'è stat 'n inventur e imprendidùr americà. L'è stat co-fondadùr, ex-presidènt e ex-diretùr de la Apple Inc.^[1]

Envèrs la fì de i agn setànta del sècol XX, Jobs, ensèma a Steve Wozniak e Mike Markkula, el g'ha svelöpàt e mitìt söl mercàt giöna de le prìme lìnee de Personal Computer de söcès, la série ciamàda Apple II^[1]. A prensépe dei agn otànta l'è stat giü dei prim a capéser el potensiàl comerciàl de ìga 'n interfàcia gràfica per l'ütilizadùr (GUI), comandàda condèn mouse. Chèsta 'ntüisiù l'è stàda la strésa che g'ha portàt a la creasiù de la lìnea Macintosh.^[2]

Endèl 1984, Jobs, per vìa de divergènse col sò conséi de aministrasiù, el s'è dimitìs de la Apple e l'è nat a fondà la NeXT, 'na aziènda che svelöpàa piatafùrme 'nformàtiche per el mercàt de l'edücasiù süperiùr e l'aministrasiù. Endèl 1996 però la NeXT la vé crumpàda de la Apple e isé 'l Jobs el tùrna a troàs endèl gir de la società che 'l gh'ìa fondàt, e de la qual el deentarà aministradùr delegàt del 1997 al 2011, an endèl qual ghe tocarà molà l'encàrech per vìa de 'n pegiuramènt de la bröta malatìa che de 'n quach agn l'ìa dré a sercà de cürà^[3].

Steve Jobs l'è mórt a Palo Alto 'n California ai 5 de utùer del 2011, a 56 agn.

Endèla sò cariéra l'è stat, 'ntra i óter laùr, aministradùr delegàt de la Pixar, prima che la vignìes crumpàda de la Disney.

L'è famùs per vìga fat mèter söl mercàt dei prodócc de söcès compàgn de l'iPod, l'iPhone e l'iPad.

1. ↑ ^{1,0 1,1} "An 'Unknown' Co-Founder Leaves After 20 Years of Glory and Turmoil". New York Times
2. ↑ "Wired News: We're All Mac Users Now". Wired News
3. ↑ "Steve Jobs resigns as Apple CEO". The Guardian