Galata Capitel Trii

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

¹O Galatt balord! Chi 'l v'ha stiunaa^[1]?, a quij denanz a i ögg Gesü Crist l'è staa scrivüü cuma crusefiss? ²A vöri imparà dumà chèst de vialter: avii ricevüü el Spirit travèrs i oper de la lég, o travèrs el sentì de la féd? ³Inscì sii balord: ancabén avii cumenzaa per el Spirit, adèss finii per la carna? ⁴Avii patii tant robb sénza resún? Se veramént sénza resún. ⁵Alura, lü che 'l furn^[2] el Spirit e 'l prudüss puténz intra vialter l'è di oper de la lég, o del sentì de la féd?
⁶Cuma «Abraham l'ha credüü in del Signúr, e l'è staa metüü in cunt de giüstizia»; ⁷alura savii che quij che hinn de la féd hinn fiöö d'Abraham. ⁸E despö che l'ha vedüü prima che de féd Diu el avarìa fà giüst i naziún, la Scritüra l'ha prumess prima a Abraham che «In de tì tücc i naziún sarànn benedii»; ⁹alura de féd lur hinn benedii cun la féd del Abraham.
¹⁰Già che tant quant hinn di oper de lég, hinn suta una malediziún: degià che l'è scritt:
«Maledii l'è ognidün che 'l resta no in te tücc i robb che hinn scritt in del liber de la lég per fàj». ¹¹E l'è ciar che in de la lég nissün l'è faa giüst denanz a Diu, perchè 'l giüst el vivarà de féd; ¹²e la lég l'è no de féd, ma lü che l'i fa el vivarà in de lur. ¹³El Crist el m'ha cumpraa de la malediziún de la lég, devegnend una malediziún per nümm, cuma l'è scritt:
«Maledii l'è ognidün che l'è peciaa sü una pianta^[3], ¹⁴perchè la benediziún de l'Abraham la vegna a i naziún in del Gesü Crist, perchè ricevessum la prumèssa del Spirit per mèzz de la féd.
¹⁵Fradèj, a disi segund un vèss üman: nissün el cancela né giünta a un'acordi, ancabén d'un vèss üman, che l'è già staa cunfermaa^[4]. ¹⁶E i prumèss hinn parlaa a Abraham e la sua suménza. El dis no: «e a suménz», cuma a tant, ma cuma a vün: «e a la tua suménza», che l'è 'l Crist. ¹⁷E a disi chèst: la lég che l'è vegnüda despö 430 agn la cancela no l'acordi cunfermaa prima de Diu per abulì la prumèssa. ¹⁸Già che se l'ereditaa l'è de la lég, l'è pü d'una prumèssa; ma Diu l'ha daa liberamént a Abraham per mèzz d'una prumèssa. ¹⁹Dunca, che coss'è la lég? L'è stada giüntada per via di trasgressiún, fin che l'è vegnüda la suménza che l'è stada prumessa, urdinaa^[5] per angiuj^[6] in de la man d'un mediadúr. ²⁰Ma 'l mediadúr l'è no per una persona, ma Diu l'è vün.
²¹Dunca, l'è la lég segund i prumèss de Diu? Che la sia no! Perchè se una lég l'è stada dada che la pò fà viv, la giüstizia la sarìa veramént in de la lég. ²²Ma la Scritüra l'ha saraa denter insèma tüsscuss suta pecaa, perchè la prumèssa de féd in^[7] del Crist Gesü la sia dada a quij che creden.
²³E prima che la féd l'è vegnüda, sèmm staa vardaa suta la lég, saraa denter per la féd che l'era dree a vegnì revelaa, ²⁴perchè la lég l'è devegnüda 'l noster vardian fin al Crist, perchè sium faa giüst de féd, ²⁵e perchè la féd l'è vegnüda, sèmm pü suta un vardian.
²⁶Già che sii tücc fiöö de Diu per mèzz del féd in del Crist Gesü: ²⁷degià che tant de vialter^[8] quant sii staa batezaa in del Crist, ve sii vestii del Crist. ²⁸El gh'è no Giüdee né Grèch, el gh'è no s'ciav né liber, el gh'è no mas'c e fémna: perchè tücc vialter sii vün in del Crist Gesü. ²⁹E se sii del Crist, alura sii la suménza de l'Abraham, ered segund la prumèssa.

1. ↑ o striaa
2. ↑ Mil. furniss
3. ↑ spezialamént, un lègn o una trav
4. ↑ o ratifegaa
5. ↑ chèsta parola in del grech l'è mas'cil, ma suménza l'è neüter
6. ↑ It. angeli
7. ↑ el test grech el manca in
8. ↑ el test grech el manca de vialter

• ← Indree a Capitel Düü
• Inanz a Capitel Quater →
• A l'indes