Lamba Doia

Lamba Doia, (Zena, 1250 - Saña, 17 ott. 1321), capitan do poppolo do Comun de Zena e armiraggio, vinçitô da battaggia de Scurçoa.

Nasciuo verso o 1250 a Zena da Pê e da Mabilia Caxiçça, o l'ea o minô de quattro fræ (i atri figgi do Peo fun Oberto, Nichiozo e Giaccomo).

O l'intrò in afari, quande-o poæ l'aiva za lasciao a Oberto o compito de gestî a potente dita da famiggia; scarsci son, però, i documenti che resgoardan a so attivitæ privâ quantemeno inti anni zoenî. Into 1268 o fu testimonnio à 'na vendia de panni, insemme co-o barba Ansado (1º d'arvî) e o l'ascistette, into mæximo anno, a-a stezua de 'n cangio monetaio da pagâ a-a fea de Provins (2 mazzo). Into 1271 o risurta avei venduo 'na partia d'aime (13 de settembre). Montao a-o poei o fræ Oberto, elezuo apitannio do poppolo insemme con Oberto Spiñoa, o Doia, comme raprezentante de numioxi mercanti, o fu incaregao da-i capitagni do poppolo d'andâ co' l'Enrico Squarçafigo into "Garbo", in sce-a costa settentrionâ de l'Affrica; chì o doveiva zonze à 'n acordio co-o segnô de "Tremesen", pi acatâ un'enorme partia de gran (8.000 miñe), da trasportâ à Zena; a-i mercanti zeneixi o governo o garantì o pagamento do nóo e 'n margine de profito insci-a vendia do carrego (13 arv. 1272); se çercò, de tâ mainea, de superâ e dificortæ alimentæ chi-a çitæ a l'ea aprœuo à incontrâ à caoza do blocco impostoghe da-o Carlo d'Anjou, intençionao a creâ di dizordini e malumô contra-o zoeno governo da diarchia.

O Doia o dovette continoâ, dapœu, a so attivitæ privâ de aodaxe e intraprendente mercante, percorindo e stradde che da-e colonnie zeneixi do Mediterannio orientâ e do Mâ Neigro penetravan verso l'interno de l'Axia. Into zugno 1278 o risurta ancon à Zena, perchè, insemme co-o fræ Giaccomo, o riçevette, a nomme di eredi de l'atro fræ ascì, Nichiozo, morto inte quelli anni, o ricavao da l'appâto de feree, chi-a famiggia a possedeiva à Cugen. Into 1280 o se spinse scin à Sivas, dov'o deciarava de êse disposto a rimborsâ o mercante Luchetto da Recco (ch'o l'acuzava o Doia de no aveighe versao 180 lie d'argento ch'o ghe doveiva) a Sivas ò a Tabriz, capitâ do regno Perscian (15 mazzo).

Tornao a Zena, into 1281, comme tutô di eredi de so fræ Nichiozo, o l'apixonò doi moin e 'na folla sciti into teritoio de Cugen.

Trei anni doppo, inta faze ciu cada do conflito tra Zena e Piza, o contribuì co-ina nave a-o convollio de çinque galee armæ. Pe transportâ argento e d'atre merçe inte l'Impeo bizantin; pe difende o convoio, fu alestio 'na flotta de 11 galee e 2 gaioin, afiæ a l'armiraggio Enrico De Mai, a-o quæ se gh'azonzette atre 4 nave, armæ da-o Comun pi-a guæra de corsa. O convoio o sarpò o 22 arvî e o se diresse verso Ciongin. Doppo avei catturao arcuñe barche pizañe, l'armiraggio o fu informao che in Porto Pizan l'ea stæto alestio 'na flotta de 34 galee pe scortâ in Sardegna un contingente de cavalaja, ghiao da-o Bonifaçio (Façio) da Ghiardesca, conte de Donoratego, figgio de Gherardo, conscignô de Caggiai.

Se decidette, pertanto, de scorî a flotta nemiga. A-o largo da Taoæa fu preizo una nave veneta, insci-a quæ l'ea imbarcao o conte (1º mazzo); subbito doppo, aparse a-o largo a flotta pizaña che, ritegnindose supeiô de nummero, a l'attaccò battaggia. O scontro violento o se concruze a seja co-a cattua de 8 galee pizañe e l'afondamento de uña; i atre nave s'impegnon à consegnâse a-a matin. Fæto nœutte, se dettan a-a fuga a força de remme, inseguie da-a galea do Doia, ch'a l'ariescì a razonzine uña. A flotta zeneize a proseguì pe Bonifaçio e a ressegondò a Zena co-o bottin; e galee di mercanti, compreize quella do Doia, repigion a navegaçion e se dirizettan insce Agrigento, catturando doe nave pizañe, l'equipaggio de quæ o fu venduo à Siracuza. Infin o convoio o poe' razonze sença urteioî problemi Costantinopoli. Se-o Doia o s'ea imbarcao insci-a nave de so proprietæ, l'è assæ difiççile ch'o l'agge posciuo pigiâ parte a-a battaggia da Meloia (6 agosto 1284).

Into 1286 o fu ciammao à comandâ un atro convoio, formao da 5 galee e diretto sempre inte l'Impeo bizantin; zonto inti presci de l'Eubea, o catturò una sætía pizaña, ch'a fu incendiâ. In questi anni o governo di capitagni do poppolo o l'atraversò un periodo de grave crixi, no solo pei-a constante prescion eserçitâ da-i emigræ polittichi goerfi, ma ascì pe-e diverzençe de interesci ch'ean a prœuvo à avenâ a coaliçion tra o populus e e doe famigge (Doia e Spinnoa) a-o poei. Foscia fu pe raforçâ a prezença da so famiggia into governo (doppo o retio de l'Oberto da-a carrega de capitannio) che-o Doia o l'abandonò i traffeghi comerciæ e o se dedicò a l'attivitæ pubbrica. A sostituî o poæ inta gestion di afæ fun l'Oberto e o Tedixo, impegnæ à fondo inte l'area do Mediterraneo orientâ, gravitante insce Peia e insce Cafà, averta a-o comercio zeneize inte l'urtimo quarto do seccolo.

Into 1288 o Doia fu inviao comme poistæ a Vintimiggia, roccaforte ghibelliña de fronte a-e nemighe Menton e Moñego. L'anno doppo, comme vicaio e procuao di capitagni do poppolo, o l'ótègne da-o castellan de Roccabruña a consegna do castello, a-a quæ s'ea impegnao o Carlo II d'Angiò; into luggio o vègne ressarçio pe-e speize sostegnue durante a so attivitæ inta Rivea de Ponente. Into 1290 o deventò poistæ d'Arbenga; in tâ veste o fu incaregao da questa comunitæ d'arivâ à 'n acordio co-o Manoælo, marcheize de Gravezaña; fu domandao, pertanto, l'arbitrato do Ghigermo da Çiañexi, abao do poppolo de Zena, ch'o l'impoze 'na tregoa, ordenando a destruçion de forteççe construie da-o marcheize e proibindo a-o Comun de costruine di atre (26 de zugno). L'anno seguente o Tedixio, figgio do Doia, o finançiò a spediçion di fræ Vivadi, intençionæ probabilmente a circoñavegâ l'Affrica, pe zonze a-e Indie. Into 1296 o Doia o fu elezuo poistæ d'Asti e o l'ebbe moddo de socore o governo zeneize co-in contingente de cavalaja, bloccando o tentativo de corpo de man preparao da-i emigræ polittichi goerfi. A prescion di extrinseghi, tuttavia, a no diminuì, ascì perchè ean zœumoæ nette e diverzençe che contraponeivan i Doia a-i Spiñoa (divixi a-o so interno ascì da de rivalitæ personæ) e l'ea aprœuvo a ezaorise o consenso concesso da-o populus a-a diarchia. Into 1297, da-a supremma carrega de governo se dimisse o Corado, nevo do Doia, pe açetâ l'oferta de diventâ armiraggio do Regno de Seçilia. Coscì se poneiva fin a-a neutralitæ gioza che Zena a l'aiva osservao into scontro tra Angioin e Aragoneixi, sançionando o començo de 'n longo periodo de violente lotte intestiñe.

A-o posto do Corado fu çernuo o Doia, pe stâ a-o scianco do Corado Spiñoa comme capitagno do poppolo (ottobre 1297). L'anno doppo, pi apoggiâ o Giaccomo d'Aragon in lotta co-o fræ Federigo, fu alestio 'na flotta afiâ a-o Doia; tuttavia, o veo obiettivo o l'ea quello de inflizze un duo corpo a Veneççia, vegnua zœumoæ nemiga implacabile insci-i mercoei do Mediterrannio orientâ. Anco' ina votta di interesci generæ e di interesci personæ coincideivan inta çernia de l'armiraggio; de fæto, o Doia o dovette amiâ con procupaçion a-a minaccia venneta, peigoza pe-i frutoxi traffeghi, che i figgi Oberto e Tedixo gestivan inte l'Impeo bizantin e inta "Gazaja" (comme se ciammava e colonie zeneixi into Mâ Neigro).

A flotta (co-in nummero de nave ch'o varria, a segonda di cronisti, da 66 a 85) a se riunì a Portovennie, pigiando o largo inta stæ avançâ. Doppo avei fæto scâ a Mesciña pe rifornimenti, a se diresse verso l'Adriatego, navegando a-o largo de coste puggeixi. A traversâ verso a Darmaççia a fu però sfortunâ, perchè 'na tempesta a desperse a flotta; solo 20 nave seguin o Doia, ch'o se rifugiò into porto de Antivai. Arecugeito a ciu gran parte de galee, o Doia o decize de procede a-o sacchezzo de coste darmate, ocupando Scurçoa. Chì o s'arrestò, ò perchè sodisfæto di opiaçioin scin à aloa concruze, ò pe atendighe a flotta nemiga.

O 6 de settembre aparse a flotta veneçiaña, ghiâ da-o Dria Dandolo, forte de 'n çentanâ de galee e intençionâ a fâ vai a so superioritæ numerica. A matin do 7 de settembre començò a battaggia co-o lanço de proiettili; a flotta veneta a l'ataccò l'aa drita zeneize, pi anichilâ a meitæ da linnia aversaia; o primmo assâto o l'ebbe sucesso, percose dexe galee zeneize fun gravemente dannezzæ. Tuttavia l'aa senestra a no se lasciò pigiâ da-o panico e, con un'abile manœuvra ingugente, a l'ariescì a circondâ e nave nemighe. Queste, impedie da-o spaççio restreito e da-o mâ grosso, no ariescin a sfuzzî a l'açerciamento; a difeiza despiâ di Veneçien a diò scin a mezogiorno, quande, cheito a bandea de l'armiraggia, començò à difondise a poiia da sconfita. Enorme fu o danno subio da-a flotta veneta: l'armiraggio Dandolo o fu fæto prexonê e o s'amaçò, pochiscime nave ariescin a sarvâse, mentre i atre fun catturæ ò afondæ; assæ ærto o fu o nummero de vittime (sciben che e ziffre varrian da cronista a cronista).

Segondo una tradiçion lezendiaia, into scontro aviæ perso a vitta un figgio do Doia, ch'o l'aviæ ordinao de caciâlo in mâ, pe no imbaraççâ i opiaçioin a bordo. L'epizodio (ignorao da-a croneghistega zeneize contemporannia a-i avegnimenti) o fu probabilmente creao (ò acugeito) da-o Petrarca che, pe consolâ un amigo da perdia do figgio, o mençuña varri ezempi de stoiçismo paterno, tra-i quæ quello do Doia (Fam. II, 2); o fu da pœu o Federighi, into seccolo XVII, à repigiâ a notiççia, açetâ comme vea e intrâ a fâ parte da lezendia doiaña.

A vittoia de Scurçoa a fu pagâ caa da-a flotta zeneize ascì; foscia pe questo motivo (ò foscia ascì pe o timô de 'n corpo de man guerfo in sce Zena, arestaa desguernia) o Doia a tornò inderê, sci ben ch'o l'avesse a poscibilitæ de portâ l'attacco into cœu do stato veneçian. Fu coscì vanificao i risurtæ conseguii co-a vittoia. Bruxao e galee catturæ, o Doia o començò a navegaçion de ritorno, zonzendo a Zena o 6 d'ottobre. A Repubbrica, riconoscente, a ghe donò o palaççio in scia ciaçça de San Matê.

Into periodo ch'o fu capitan do Popolo, vègne intaoao de trattative de paxe con Veneççia, aospixe o Mattê Visconti, zonzendo à 'n acordio sottoscrito o 25 mazzo 1299; inte questo mæximo anno, o 21 de luggio, s'arivò à 'na tregoa pe 25 anni con Piza, esteiza ascì a-o zuxe de Arborea Zane, visconte de Bas. Into fratempo, l'asperto loeio politico do Bonifaçio VIII pe portâ a çitæ inte l'area de influença guerfa, o començò à dâ i so frûti, creando di dissensci sempre ciu profondi tra e famigge Doia e Spiñoa a-o poei. A conseguença a fu o liçençiamento di capitagni do Poppolo, sostituii da 'n poistæ foresto (28 ott. 1299). Ço no impedì, tuttavia, ch'a-o Doia foise afiao o comando de 'na flotta, no semmo con quæ obiettivo. Into mæximo anno, o trattò l'acatto do Çervo da-i cavagei de S. Zane de Geruzalemme (22 d'ottobre).

Inte sangoinente lotte che scciancon e famigge ghibeliñe e che viddan emerze o rammo doian de Brancalion e do figgio Bernabè, o Doia o dovette ghiâ quella parte da consciortaja ch'a l'ea stæta inrimediabilmente sconfita da l'aliança tra i Spiñoa de Luccoi e i Doia "sardi". Montæ a-o poei Obexin Spiñoa e Bernabè Doia (7 genn. 1306), o fu constreito a lasciâ Zena, tornandoghe, però, za a-a meitæ de março e parteçipando a-e sescioin di conseggi da Repubbrica. Tuttavia l'atmosfea in çitæ a l'arestò storbia, e perçò, into settembre, o Doia e di atri membri da famiggia fun torna costreiti à alontanâse, trovando repoæo a Sanremmo. L'anno seguente Bernabè Doia o poe' marciâ in sce-a Rivea de Ponente contra i "estrinseghi", che fun constreiti a trattâ; a-a fin de dexembre, co-o Doia in primma fia, questi preston in çitæ o zuamento de fedeltæ a-o nœuvo governo.

Fratanto esploze o contrasto tra l'Opexin Spiñoa e o Bernabè Doia, che into novembre do 1308 o fu deposto co-a força da-o collega; mentre molti membri da famiggia fun torna costreiti a lasciâ Zena, o Doia o poette arestâghe indisturbao. Quande a çittæ a se consegnò a l'impiatô Arigo VII (21 ott. 1311), o l'ebbe l'incarego d'alestî 'na flotta, foscia pe 'n atacco contra o Roberto d'Angiò, ma a campagna navâ a no dovette êse effettoâ. Into 1315, alliaose i Doia e i Grimadi contra i Spiñoa, l'ezerçito comandao da-o Manfredin do Caretto, into quæ s'atrovava ascì o Doia e i so figgi, o l'attaccò Buzalla, roccaforte nemiga. O castello o fu preizo doppo una fea battaggia, ma a reaçion di Spiñoa, ch'aveivan asódào de truppe todesche, a l'imbósò a scitoaçion. O Doia o fu catturao co-i so figgi e tegnuo in ostaggio da-i merçenai, che preteizan un forte rescatto a tittolo de ressarçimento pe-e paghe no ancon corisposte.

Cheito Zena in man goerfa into 1317, o Doia fu constreito à abandonâ a çitæ, finindo a so vitta in exilio. De fæto, o moì a Saña o 17 ott. 1321 ma o fu sepelio a Zena; segondo a so voentæ, o corpo o fu alugao inte 'n sarcoffago (provegninte, foscia, da-o bottin de Scurçoa) posto insci-a facciâ esterna da gexa de San Matê. Da Argentiña Spiñoa o l'ebbe Tedixio, Oberto (ch'o spozò Izotta, figgia do Ghigermo da Camilla), Zenoardo, Lamba, Çezare, Lonardo e Maja (ch'a spozò Porchetto de Ghigermo Sarvægo).

1. ↑ Anonnimo Zeneize, De vitoria facta per Januenses contra Venetos in gulfo Venicianorum prope ysolam Scurzule, anno MCCLXXXXVIII, die dominica, intrante VII septimo seiembris; existente Amirato domino Lamba de Auria, 1300ca.