Europese Gemeinsjappe

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

De Europese Gemeinsjappe (Ingels: European Communities, Frans: Communautés européennes, Duits: Europäische Gemeinschaften, Nederlands: Europese Gemeenschappen) is 'ne verzaomelnaom veur drei veurmaolege internationaol organisaties: de Europese Gemeinsjap veur Kole en Staol, de Europese Atoomenergiegemeinsjap (Euratom) en de Europese Ikkenomische Gemeinsjap, boevaan de lèste bij 't Verdraag vaan Mestreech woort herneump tot de Europees Gemeinsjap. Dees drei organisaties stoonde neet los vaan mekaar en woorte geregeerd door dezelfde institute (de Europees Kemissie, d'n Europese Raod en 't Europees Parlemint. Vaanaof 't Verdraag vaan Mestreech gonge dees drei organisaties same de Europese Unie (EU) hete.

Wie de EU woort opgeriech in Mestreech, woort dees organisatie opgebouwd oet de zoegenaomde Paolstructuur (de "Päöl"). De Europese Gemeinsjappe gónge d'n ierste Paol vörme, Gemeinsjappelek boetelands en veilegheidspolletiek vörmde d'n twiede Paol en Politiëel en zjustitiëel samewèrking in straofzake waor d'n daarde.

De Europese Gemeinsjap veur Kole en Staole woort aofgebroke in 2002 wie häör verdraag oet 1952 (deil vaan de Verdrage vaan Paries) waor verlope. De Europese Gemeinsjappe woorte opgeheve en al häör bevooghede woorte euvergedrage aon de EU mèt 't Verdraag vaan Lissabon in 2009. Dit verdraag woort de officieus constitutie vaan de EU. Euratom bleef bestoon es oonaofhaankeleke entiteit boete de EU meh zie weurt geregeerd door dezelfde instèllinge (zuug: instèllinge vaan de EU)