Verdraag vaan Breusel

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

't Verdraag vaan Breusel of 't Pak vaan Breusel waor 'n euvereinkoms geslote op 17 miert 1948 te Breusel door vief Wes-Europese len: Fraankriek, 't Vereineg Keuninkriek (VK), Belsj, Nederland en Luxembörg. 't Woort geïniteerd door 't VK. 't Buut vaan dit verdraag waor 'n Wes-Europese samewèrking op militair niveau wat ouch de ben zou versterke mèt de Vereinegde Staote (VS). 't Verdraag vaan Breusel waor 'n reactie op de Praogse Coup.

De VS waore evels nao d'n Twiede Wereldoorlog trökgekier nao 't isolationisme. Daoneve goof 't gein juridisch meugelekheid binne d'n Amerikaanse wèt die 't slete vaan militair verdrage tiejes vreistied touwleet. De Crisis vaan Berlien op 24 juni 1948, wie de Sovjet-Unie opins weeg riechting Oos-Berlien vaanoet Wes-Berlien blokkeerde veraanderde de Amerikaanse mentaliteit evels. Op 11 juli 1948 woort rizzelutie 239, genaomp "Vandenberg" (ingedeend door de Amerikaanse politici Hoyt S. Vandenberg en Tom Connally, die euvereges oet de twie tegeneuvergestèlde partije kaomde), aongenomme die dit wètkader doorbrook.

Heidoor koste de VS officieel conservaties beginne mèt de lede vaan 't Verdraag vaan Breusel en Canada. Oetindelek leide dees gesprekke tot de oprichting vaan de NAVO op 4 april 1949. 't Verdraag vaan Breusel bleef evels neve de NAVO veurtbestoon, bistot 't in 1954 opgóng in de Wes-Europese Unie ('ne veurgenger vaan de Europese Unie), boetouw ouch Italië en Wes-Duitsland touwtroje.

• Zuuch ouch: Historie vaan de Europese Unie