Wisjegrach

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

Wiesjegrach of Wisjegrach (Nederlands: Wissengracht) ies 'ne groate, van zjwoar mergelblök geboewde carré-vörmige haof in de buurt van Hölsberg in de gemeinte Baekdale in 't heuvelland van Zuud-Limburg. 't Tegewoordige woonhoes zou in vreuger jaore 'n jachhoes zin gewaes. Op kaarte oet de 16e ièw weurt 'r al geneump es Wasrad, 'n ièw later es Wusgrach en op 'n gemeintekaart van Hölsberg oet 1870 es Vissengracht. De haof liek miedde in 't veld en ies te bereike via 'ne holle waeg. Bie Wiesjegrach óntsjpringk de, vermoedelik nao diet good geneumde, Bièsebeek (Bissebeek) riechting Wienesrao en Zjwier.
Wie keuningin Beatrix in 2004 'n trip nao Zuud-Limburg maakde, brach zie 'n bezeuk aan Wiesjegrach.

De sjtraot vanoet Hölsberg riechting dees boerderiej dreug ouch de naam Wisjegrach. Aan 't begin, op de driesjprunk, op de moer van 'n boerderie hingk 'n groat houte waegkruus. Get wiejer sjteit 'n baksjteine neogotische Mariakapel oet 1937. Aan de waeg bevingk ziech nog 'n aantal hoezer.

De naam Wiesjegrach sjleit ouch op 't buurtsjap dat besjteit oet de sjtraot Wisjegrachterwaeg, de Verlingde Wisjegrachterwaeg en de Waakheuvelswaeg.