Missaal

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

'ne Missaal ies 't liturgisch book van de Heilige Mès bie de Katholieke, woa-in de tekste van 't vas gedeilte en de gewoon gebede sjtoon aafgedrök. Wiejer sjtoon d'r ouch de wieselende gebede in, gezange en lezinge veur alle daag en in de volgorde van 't kèrkelik jaor. In 't book sjtoon ouch de fièsdaag van alle heilige. De preester of celebrant maak gebruuk van de groate altaarmissaal en de kèrkgenger gebruuk de volksmissaal, handmissaal of kleine missaal.

Deze groate missaal weurt door de veurgenger gebruuk tiedes de viering. 't Book, dat rechs op de taofel sjteit, wieselt bie 't Evangelie van plaats (nao de linkerzie van 't altaor).

De ièrsjte missaal, Missale Romanum, woort oetegegeve in 1570 nao 't concilie van Trente (1545-1563) door Paus Pius V. 't Book woort veurgesjreve aan alle Katholieke kèrke ter vervanging van alle veurgaonde, land- en sjtreekgebónge beuk.

Tot hauverwaegs de 20e ièw ies d'r nieks wezeliks veranderd gewore aan de inhoud van de missaal. Nao de opkóms van de liturgische bewaeging kaome d'r extra oetgaves veur de kèrkbezeukersj, volksmissale woa-in neve de Latiense tekste ouch de vertalinge in de volkstaal waore opgenómme.

Saer 't Twiède Vaticaans Concilie maog bie de offieel vieringe de landstaal gebruuk were. De nuje Missaal van de Romeinse liturgie dateert van 1970, de gecorrigeerde versie van 1975. De oetgaaf van de volksmissale weurt meistal verzörg door liturgische apostolate van versjillende kloastersj. Veural de Benedictienersj en Norbertienersj hele ziech dao-mèt bezig.

In vreuger jaore krege kinger bie de 1e Heilige Communie of bie de Plechtige communie hunne 1e kingermissaal of 'ne handmissaal.

Allewiel weurt door de luuj in de kèrk gebruuk gemaak van 'n mèsbeukske (an de parochie i.p.v. 'ne missaal. Hie in sjtoon 'n aantal mèsse en gezange, ouch in naovolging van 't kèrkelik jaor.

'n Aantal pagina's mèt de tekste en gezange veur eine speciale deens hèt ouch 'n mèsbeukske.