Herre
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
't Herre vurmp 't deil van 't centraal zieënstèlsel det zich inne kop verbindj. 't Herre vurmp 't waornummendj, aansturendj, controlerendj en informatieverwirkendj orgaan bie bieëster. 't Guuef drie gruup aan bieëster mit herre: de gewèrveldje, en binne de groep vanne óngewèrveldje de geleedpoeatige (wie insecte, spinne, krieëfte) enne inkvisse. De euverige óngewèrveldje höbbe gein herre meh verzamelinge van individueel ganglia. 't Herre bevindj zich euver 't algemein inne kop van 't bieës.
't Herren is e kómpleks orgaan; 't miensjelik herren is opgeboewdj oet väöl tieëntaal aan miljarde neurone (zieëncelle) wovan edert in verbinjing steitj mit e groeat aantaal anger neurone, sómtieds väöl doezjendje. 't Is wersjienlik de kómplekste structuur in 't universum. 't Herre bestuurtj en coördineertj sensorische systeme, bewaeging, gedraag en homeostatische lichaamsfuncties wie aomhaoling, blooddrök en lichaamstemperatuur. 't Herre is de brón van bewaeging, ónthaad en (bie hoeager saorte) cognitie (bewöszeen) en emotie.
