Djibouti

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Djiboeti of Djibouti (officieel (Arabisch) جمهورية جيبوتي; (Frans) République de Djibouti) is e land in oostelek Afrika. 't Ligk ten weste vaan de Roej Zie en grens in 't weste en zuie aon Ethiopië, in 't noorde aon Eritrea en in 't zuidooste aon Somalië. Daobij ligk Jeme 20 kilometer oet de kös. Hoofstad is Djibouti-stad, boe de mierderheid vaan de bevolking woent. Oondanks ziene geringen umvaank kint 't land groete huugdeversjèlle: 't liegste punt is de spiegel vaan 't Assalmeer (155 meter oonder zieniveau), 't hoegste punt is de Moussa Ali-berg (2028 m.).

Djiboeti is ingedeild in zes cercles (distrikte):

• Arta
• Ali Sabih
• Dichil
• Djibouti
• Obock
• Tadjoura

De twie veurnaomste etnische grópe zien de Issa (Somaliërs) en de Afar, good veur 60 resp. 35 procent. De res weurt veural door Europeane, Arabiere en Ethiopiërs oetgemaak. Bei grópe zien sterk geïslamiseerd en leve traditioneel in oonvrei mètein.

Allewel tot Djiboeti in 't verleie door diverse volker bewoend moot zien, leve de Issa en de Afar al sinds minseheugenis op Djiboetiaanse bojem. Doortot Egypte, Nubië en Arabië zoe kortbij ligke kaome dees volker väöl mèt de besjaoving in aonraking, boevaan ze daan ouch väöl euvernaome. Zoe gónge ze al hiel snel op d'n islam euver.

In de negentienden iew woort 't gebeed door Ethiopië behiers, meh door versjèllende Europees expedities en de eupening vaan 't Suezkenaal in 1869 naom op de Roejzieköste de invlood vaan de Europeane touw. In 1884 en 1885 woorte e paar gebejer vereuverd, die de Franse vereinegde in 't Protectoraot Frans Somaliland. In 1897 lagte de Franse en de keizer vaan Ethiopië de grenze vas. In datzelfde jaor begós d'n aonlag vaan 'ne spoorweeg vaan Djibouti nao Addis Abeba.

In d'n Twiede Wereldoorlog stoont Djibouti in 't begin aon de kaant vaan 't Frankriek vaan Vichy, meh ind 1942 woort 't door de Britte bezat. Nao d'n oorlog begóste, zjus wie in aander kolonies, discussies euver oonaofhenkelekheid en ander statusse. In 1967 woort de naom veranderd in Territoire français des Afars et des Issas. In 1977 koos de bevolking in e referendum veur de oonaofhenkelekheid.