Poperinge

Poperinge es un munisipa locada en la provinse beljes de Flandre Ueste, e ave un istoria cual estende a retro a la eda medieval. Lo es locada sirca 13 km a ueste de Ipre. La rejion es famosa per la cultiva de lupulo, e lo furni sirca 80% de la produi de lo en Beljia. La vila es la casa de un museo nasional de lupulo. Un festa de lupulo aveni en setembre, cada tre anios. La bir local es conoseda como Hommel, cual sinifia lupulo en la dialeto de Flandre Ueste.

La carilion en la tore de la eglesa la plu vea de la vila, "Sint-Bertinuskerk", ia es notada como un de la plu bela en Flandre en la eda medieval. Lo ia es destruida en gera en 1677, e ia es restoraa en 1781.

Descovres arceolojial en la area dati abitas local a la neolitica. Su la romanes, un lia ia es construida a lo de la via entre Cassel e Aardenburg. En la eda de la francos, lo ia apare su la nom Pupurningahem, e ia es fada sujeto de la benefica eglesal de San Omer en la sentenio 7 media. La conte de Flandre, Dietrich de Alsas, ia dona un carta ofisial a la vila en 1147 pos un suplica par la abade. De esta tempo, lo ia comensa flori como un sentro de la fabrica de stofa e, per casi la cuantia de abitores cresente, la eglesas e San Joan e Nosa Dama ia es ajuntada en 1290 a la Sint-Bertinuskerk ja esistente

En 1322, Louis de Nevers ia proibi la fabrica de stofa estra Ipre, cual ia stimula la sitadanes per junta la revolui contra el la anio seguente. Los ia sede nunca a la restrinjes la conte ia comanda sur sua susede e ia es sempre trovante modos nova per evita la restrinjes. Sua resiste en esta periodo ia gania per los la nometa de keikoppen ("testas de petras ronda"), un terma prima notada en 1341, cuando la militia de Ipre ia ave sua venja sur la vila.

En la disturbas asosiada con la Gera de Sento Anios, Poperinge ia sufri de alias cambiante de la contes de Flandre e sua efetos comersial. Cuando los ia suporta la franses, la comersia de lana con England ia es interompeda. En la curso de la revolui seguente, la vila ia es sacada e ardeda par soldatos franses en 1382. Alora, en 1436, la vila ia sufri la mesma fortuna de la armada engles. En 1513, en un periodo de susede declinante, multe de la vila ia es denova destruida par foco, e un ves plu en 1563. En esta periodo, Poperinge ia es stimulada per suporta la caso protestante e ia ave un rol en la furia de iconoclasia de 1566. Lo ia es en la luta seguente e persegue cual la vila e sua comersia ia es final ruinada.

Cosas ia deveni plu mal par la geras entre la franses e la nederlandes per controla de la rejion. Par la Trata de Nijmegen en 1678, la vila ia pasa a la franses, e alora es redonada a la espanioles par la Trata de Ryswick de 1697, e alora sededa a la osteraices en 1713 par la Trata de Utrecht. En 1794, lo ia es asorbeda par Frans de la revolui en la departe de Lys. Seguente la defeta de Napoleon, lo ia es incluida en la Rena Unida de Nederland, de cual Beljia ia revoltada en 1830. De alora, Poperinge ia repara sua fortunas par consentra sur la produi de lupulos, la cultiva de cual ia es prima introduida en la sentenio 15.

En la Gera Mundal Un, la vila ia es un de sola du en Beljia no sua ocupa par la deutxes. Lo ia es usada per casi tempora la soldatos brites e ance furni un area secur per ospitales de campo. Familiar conoseda como "Pop", lo ia es apena pos la linia fronte, e ia formi un lia importante per la soldatos e sua familias, spesial tra la casa de reposa conose como la Talbot House (o "Toc B"). Un remente triste de esta tempo resta en la salon de la vila do du selulas de moria ia es conservada, e estra en la jardin, do on ave un palo de esecuta publica usada par scuadrones de spara. Un otra remente es la loca de alga semeteros militar a la fronteras de la vila, con enteras de soldatos canadian, brites, australian, franses, deutx, e american, e la omes de la corpos de labora xines. Un de estas es la Semetero Militar de Lijssenthoek per soldatos ci ia es ferida prosima a Ipre e plu tarda ia mori en la stasiones per estrae vitimes locada en la area.