Leopardo

La leopardo (Panthera pardus) es un de la sinco spesies esistente en la jenero Panthera. Lo ave un pelo pal jalin asta oscur oro con puntos oscur grupida en rosetas. Sua corpo es magra e musculosa, ateninte un longia de 92 a 183 cm con un coda de 66 a 102 cm e un altia de spala de 60 a 70 cm. Mases pesa tipal 30,9 a 72 kg, e femes 20,5 a 43 kg.

La leopardo ia es prima descriveda en 1758, e alga suspesies ia es proposada en la sentenios 19 e 20. Oji, oto suspesies es reconoseda en sua estende vasta en Africa e Asia. Lo ia evolui inisial en Africa en la plestosene temprana, ante migra a Eurasia sirca la cambia entre la plestosene temprana e media. Leopardos ia es presente a ante tra Europa, ma ia deveni estinguida en la rejion sirca la fini de la plestosene tarda e la comensa de la olosene.

La leopardo es adatada a un varia de abitadas, de la foresta pluvosa a la stepe, incluinte areas seca e montaniosa. Lo es un predor oportuniste, xasante xef ungulatos e primates. Lo depende de sua motif de puntos per camufla cuando lo segue e embosce sua preda, cual lo a veses tira en un arbor. Lo es un animal solitar estra la saison de copula e cuando lo eleva jovenes. Femes pari usual un grupo de 2 a 4 jovenes a un ves en 15 a 24 menses. E leopardos mas e fema ateni tipal maturia sesal a la eda de 2 a 2,5 anios.

Listada como vulnerable (riscada) sur la Lista Roja de la IUCN, poplas de leopardo es aora menasada par la perde e frati de abitada, e los es diminuinte en partes grande de sua estende global. Leopardos ia ave roles cultural en Elas antica, Africa ueste e la cultur ueste moderna. Peles de leopardo es popular en moda.