Viking 1

Viking 1 қонатын бөлігі
;
Ұйымы	NASA
Тапсырысы	Қонатын аппарат
Ұшыру күн-айы	20.08.1975
Сөре көлігі	Titan IIIE зымыраны/Centaur үдемелі блогы
Тапсырыс ұзақтығы	2306 күн
NSSDC нөмірі	1975-075C
Торабы	Деректер (ағылш.)
Массасы	572 кг
Қуаты	70 Вт

Viking 1 орбиталық бөлігі
;
Ұйымы	NASA
Тапсырысы	Орбиталық аппарат
Ненің серігі	Марс
Орбитаға орнату күн-айы	19.06.1976
Ұшыру күн-айы	20.08.1975, Канаверал
Сөре көлігі	Titan IIIE зымыраны/Centaur үдемелі блогы
Тапсырыс ұзақтығы	1846 күн
NSSDC нөмірі	1975-075A
Торабы	Деректер (ағылш.)
Массасы	883 кг
Қуаты	620 Вт
Шоғырласпауы	0,882213138
Орбита шағы	47,26 сағ
Апоапсисы	56000 км
Периапсисы	320 км

Viking 1 — Марсты зерттеуге арналған америкалық ғарыш кемесі, орбиталық және қону аппараттарынан тұрды. Viking 1 Марс бетіне сәтті қонған тарихтағы екінші ғарыш кемесі болды (Марс-3 станциясынан кейін), ал ғылыми миссиясын сәтті орындағандар ішінен алғашқысы болды.

Хронологиясы

Viking 1 1975 жылдың 20 тамызында сағат 21:22:00 UTC Флоридадағы Канаверал мүйісінен ұшырылды.

10 айдан кейін, 1976 жылдың 19 маусымында аппарат Марс орбитасына енді (оған бірнеше күн бұрын ғаламшардың түсірген суреттерін Жерге жіберді).

Қону бөлігінің Марс бетіне қонуы АКШ мемлекетінің 200-жылдығына орай 4 шілдеге жоспарланған еді. Бірақ қону аймағының бедері, жіберілген суреттерге қарағанда, қауіпсіз деп танылмады. Бұған байланысты жаңа қону аймағы іздестіріліп, миссия 20 шілдеге шегерілді, бұл күн Аполлон 11 Айға қонуының жеті жылдығына сәйкес келді. Қону аппараты сағат 08:51 UTC орбиталық аппараттан бөлініп, сағат 11:53:06 Хриса жазығына қонды.

Марс бетінен түсірілген тұңғыш фотосурет, 20.07.1976

Қонғаннан кейін 25 секунд өткенде, аппарат Марс бетінен түсірілген тұңғыш фотосуретті тікелей Жерге жібере бастады, бұл операция төрт минутқа созылды. Келесі жеті минуттың ішінде 300° панорамалық сурет түсіріліп жіберілді. Келесі күні түрлі-түсті суреттер де түсірілді. Қону бөлігі екі камерамен жабдықталған еді, бұған қоса сейсмометрі (қосылмай қалған), рентгендік спектрометрі, газ хроматографы, метеорологиялық құрылғылары, химиялық анықтағышары және басқа да сенсорлары болған. Жалпы, аппарат 1982 жылдың 11 қарашасына дейін істеп тұрды, сол күні Жерден жіберілген қате бұйрықтан байланыс тоқтап қалды.

Орбиталық аппарат екі камерамен, инфрақызыл спектрометрмен және инфрақызыл радиометрмен жабдықталған болатын. Сондай-ақ ақпаратты қабылдап, Жерге жеткізетін ретрансляторы болды, бұл қону бөлігінің Жермен тікелей байланысынан 10 есе жылдам еді. Жалпы, Жерге 57 000-нан астам сурет жіберілген еді. 1980 жылдың 17 тамызында орбиталық бөліктің кеңістіктегі бағдарлау жүйесінде газ бітіп қалғаннан соң, оның миссиясы аяқталды. Осы төрт жылдың ішінде ол Марсты 1489 рет айналып үлгерді.