Li Republicanes

Li Republicnanes (german: Die Republikaner) es un dextri political partise in Germania. Inter 1983 e 2001 it esset reprensentat in diversi german parlamentes e inter 1989 e 1994 anc in li Europan Parlament. Li partise es acurtat REP. It egarda se self quam national-conservativ, ma su adversios nomina it extrem-dextri.

• Fundation: 26-im de novembre 1983 in München
• Political direction: national-conservativ (self-perception), extrem-dextri e populistic (adversarios del partise)
• Presidente: Michael Felgenheuer desde 2019
• Vice-Presidentes: Thilo Schöne, Andreas Wirtz, Mike Baumgärtel
• General-Secretario: Peter Pätzold
• Membrité: 4033 (2016)
• Representantes in li national parlament: null (resultate in li national electiones 2014 0,2 percent)

• 1983-1985 Franz Handlos
• 1985-1994 Franz Schönhuber
• 1994-2014 Rolf Schlierer
• 2014-2016 Johann Gärtner
• 2016-2019 Kevin Krieger
• 2019 Michael Felgenheuer
• 2019 Tilo Schöne

Li Republicanes esset fundat del du ex-membres del Cristan Social Union de Bavaria Franz Handlos e Ekkehard Voigt qui esset membres del german parlament e del jurnalist e ex-moderator de television Franz Schönhuber li 26-im de novembre 1983. Franz Handlos esset electet quam presidente del partise e Ekkehard Voigt e Franz Schönhuber quam vice-presidentes.

Inter Schönhuber e Handlos e Voigt developat se un conflicte pri li direction del nov partise. Franz Schönhuber volet li Republicanes transformar in un dextri partise secun li exemple del Front National in Francia. In li partise-congress 1985 in Siegburg Schönhuber esset electet ye li 16-im junio 1985 quam nov presidente. Franz Handlos e su adherentes e anc Ekkehard Voigt forlassat li Republicanes. Schönhuber apertet li partise por membres del extrem-dextri partise. Talmen li ex-functionario del Nationaldemocratic Partise de Germania Harald Neubauer devenit general-secretario del Republicanes.

In li electiones al parlament del país federal Bavaria in li annu 1986 li Republicanes recevit 3,0 percent. In Berlin li Republicanes atinget 7,5 percent e intrat in li parlament. In li electiones al Europan Parlament li Republicanes 1989 recivet 7,1 percent e intrat con six membres in li parlament in Strasbourg.

In li fractiones in Strasbourg e in Berlin bentost developat se interni conflictes sovente pro li passate de quelc membres del fraction in extrem-dextri partises. Nu Franz Schönhuber volet limitar li influentie del ti membres pro li negativ reaction in li publica contra tal persones. Li consequentie esset un interni chaos in li partise e un serie de defetes in electiones.

Pro to Franz Schönhuber volet dissoluer li partise in li annu 1993. Il esset remplazzat quam presidente del partise in li annu 1994 per Rolf Schlierer qui ductet li partise til 2014. Franz Schönhuber propagat un cooperation con li extrem-dextri partise German Popul Union de Gerhard Frey. Li directoratu del Republicanes esset un tal cooperation e Schönhuber forlassat li Republicanes in li annu 1995.

Rolf Schlierer esset contra un cooperation con altri extrem-dextri partises, ma in li partise esset functionarios qui ne consentit e havet contactes al extrem-dextri partises.

Inter 1991 e 2001 li Republicanes esset representat in li parlament del país federal de Baden-Württemberg. Desde 2001 li Republicanes ne esset plu representat in parlamentes sur li nivelle del paises federal. Solmen in local parlamentes li Republicanes havet e have representantes. Desde 2001 li partise ne ha plu ludet un important rol sur li political scene in Germania e li resultates in electiones diminuet se plu e plu.

Rolf Schlierer ne candidat in li annu 2014 plu quam presidente del Republicanes pro catastrofal resultates in li electiones al german parlament 2013 con 0,2 percent e in li electiones al Europan Parlament 2014 con 0,4 percent. In august 2014 Johann Gärtner esset sur li partise-congress in Rosenheim electet quam presidente del partise.

Li ínconsequent delimitation del extrem-dextri positiones e partises esset un grand problema por li partise e evitat successes del partise. Li partise anc suffret sub li stigma del dextri-extremisme e ne posset atraer conservativ e borgesi electiones, ma solmen protest-electores.

Li 5-im novembre 2016 esset Kevin Krieger electet quam nov presidente del partise sur li partise-congress in Bächingen an der Brenz. Li partise decidet ne partipreder in li Federal electiones de Germania in li annu 2017. Krieger es egardat quam exponente del extrem-dextri parte del partise e esset ja membre in li dextri-extrem partise Nationaldemocratic Partise de Germania e ProNRW.

Adversarios e anc li german state egardat e egarda li Republicanes quam extrem-dextri partise. Inter 1992 e 2007 li Republicanes esset observat per li german Oficie por li protection del constitution quam extrem-dextri partise.

• National electiones de Germania: 0,2 % (2013), 0,4 % (2009), 0,6 (2005), 0,6 % (2002), 1,8 % (1998), 1,9 % (1994), 2,1 % (1990)
• Electiones al Europan Parlament: 0,4 (2014), 1,3 % (2009), 1,9 % (2004), 1,7 % (1999), 3,9 (1994), 7,1 % (1989) e six mandates.

Resultates in li recent electiones del países federal de Germania in queles li Republicanes candidat.

• Thuringia 0,2 % (2014)
• Brandenburgia 0,2 (2014)
• Hesse 0,3 % (2013)
• Bavaria 1,0 % (2013)
• Baden-Württemberg 1,1 % (2011)
• Rheinland-Palatinia 0,8 % (2011)
• Mecklenburg-Vorpommeria 0,1 (2011)

Li Republicanes esset reprensentat in li national parlament de Germania solmen per membres de altri partises qui hat deenit membres del Republicanes:

• 1983-1985 du mandates: Franz Handlos e Ekkehard Voigt ambi ex-membres del Crist Social Union in Bavaria
• 1993-1995: un representante : Rudolf Karl Krause qui esset electet por li Cristan Democratic Union de Germania

Li Republicanes esset electet in tri parlamentes del países federal in Germania

• Berlin: 1989-1990 con 11 representantes
• Baden-Württemberg: 1991-2001: 15 representantes (1991-1996) e 14 representantes (1996-2001)

In li parlament del país federal Bremen li Republicanes esset representat inter 1985 e 1987 per tri represantantes qui esset electet por li Cristan Democratic Union de Germania e transfertet al Republicanes.

Inter 1989 e 1994 li Republicanes havet six membres in li Europan Parlament, ma ja in li annu 1991 it restat solmen Franz Schönhuber pro que li altri membres esset expulset o abandonat li partise.

Li partise Li Republicanes havet e ancor have representantes in diversi local parlamentes.

• Li oficial internet-págine del partise Li Republicanes