Tao Teh King/Bab 36

1. Kapan Natuur hendak mengoerangken soeatoe barang, pastilah terlebih doeloe ia tambahken hingga semingkin banjak.
2. Kapan hendah melemahken, pastilah terlebih doeloe dibikin koeat.
3. Kapan hendak mendjatohken, pastilah terlebih doeloe diangkat ka tinggi.
4. Kapan hendak mengambil, pastilah terlebih doeloe mengasih.
5. Inilah ada apa jang dinamain persetoedjoean jang tersemboeni.
6. Sabagi djoega ikan tida moesti dikaloearken dari dalem aer, begitoe poen atoeran memerentah negri tida haroes dikasih liat kapada rahajat.

Kombali disini ada satoe fatsal jang penoeh paradox atawa pikiran-pikiran jang bertentangan dengen anggepan oemoem, dan kaliatannja sanget botjingli atawa tida masoek di akal, hingga tida heran kaloe Lao Tze sendiri, dalem fatsal XLI, soedah bilang lebih doeloe, „Kapan saorang bodo mendenger katerangan tentang Tao, ia nanti tertawa besar." Aken tetapi barang siapa soedah kenal baek sifatnja natuur dan djalannja penghidoepan di doenia, pastilah ia aken dapet liat dalem ini oedjar-oedjar jang gandjil dan bertentangan, ada tersemboeni satoe kabeneran besar jang tjoemah bisa dimengarti oleh achli-achli pemikir jang berpengataoean tinggi. Itoe kabeneran ada ​dasar atas boekti, bahoea semoea jang ada di ini doenia bersifat fana, tida bisa kekel selamanja, dan segala apa jang terlahir moesti alamken itoe ampat rintakan dari kahidoepan jang dimoelai dengen lemah dan tida berdaja, komoedian bagoes dan koeat, lantes djadi toea dan berpenjakitan, aken achirnja djadi moesna kombali.

Laen dari itoe, menoeroet natuur wet, segala jang penting di ini alam ada saling mengim­bangi satoe pada laen, hingga apa jang bertam­bah terlaloe banjak boekan mendjadi koeat, hanja semingkin lemah, dan malah mendjoeroes pada kamoesna'an. Inilah ada dari lantaran, boeat machloek jang hidoep, itoe djoemblah jang semingkin banjak membikin pergoeletan hidoepnja semingkin soeker, kerna kakoerangan makanan dan sabaginja, hingga itoe pertam­bahan melekasken datengnja kamoesna'an. Dalem kalangan economie orang bisa liat tjonto jang njata sekalih atas kabenerannja ini peladjaran. Kapan samatjem hatsil boemi kaloear terlaloe banjak, harganja lantes merosot hingga itoe matjem tetaneman orang tida maoe oesahaken lagi. Pendeknja, apa sadja jang selaloe bertambah banjak lantes koerang dapet pengharga'an, baek dalem perdagangan maoepoen dalem anggepan oemoem, hingga achirnja merosot dengen keras dan djadi lebih ketjil djoemblahnja dari-pada sabelon bertambah. Jang kamamoeran ada djadi permoelahan dari kasoekeran itoelah soedah tertjatet beroelang-oelang dalem hikajat. Inilah ada dari lantaran, kama­moeran menimboelken kalojaran, kateledoran dan kamalesan, sifat-sifat mana dengen pasti sekalih aken mengantar manoesia pada kamelaratan.(Ajat 1). ​Seperti djoega itoe remboelan jang kapan soedah poernama lantes moelai petjok aken achirnja djadi soerem dan linjap kombali, atawa itoe matahari jang kapan soedah naek tjoekoep tinggi di atasan boemi lantes moelai dojong ka Barat dan achirnja soeroep, atawa itoe kembang jang sasoedahnja megar dengen sampoerna be­serta kaharoemannja, lantes moelai lajoe aken djadi kering dan rontok, begitoe poen , dengen berdasar atas wet dari kamoesna'an, atawa kafana'an, apa jang soedah tjoekoep moelja, tjoe­koep indah, tjoekoep koeat dan gagah, moesti berbalik kombali djadi merosot, goerem, djelek dan lemah.

Bagi penghidoepan kabanjakan orang malah itoe kakoeatan (dalem hal tenaga, oewang ata­wa kakwasa'an) menimboelken kasombongan dan ka'angkoean, kepala besar dan rasa dirinja paling djempol sendiri, sikep mana pastilah menimboelken reactie atawa perlawanan jang membikin ia roeboeh, hingga achirnja djadi le­bih lemah dari-pada sabelomja ia terpandang „koeat". (Ajat 2).

Ada satoe pepatah, „Naek tinggi djatohnja dalem," Ini pepatah boleh ditambah lagi, „Sia­pa rebah di bawah tida bisa djatoh," kerna boeat alamken „djatoh" (fall down, jaitoe dari tempat tinggi ka bawah) lebih doeloe orang moesti berada di atas, dalem kadoedoekan ting­gi, agoeng atawa moelja. Maka saorang jang rendahken diri, tida soeka oendjoek sombong aken kasih liat kapinteran, tida gemer mereboet kakwasa'an atawa ingin pentang pengaroeh atas laen orang, dan begitoe poen jang tida soeka kedjer kadoedoekan tinggi, pastilah ia terbebas dari itoe bähaja „djatoh", dan selamanja aken ​tingga slamet. Kapan ia soedah moelai dapet pikiran temaha aken pandjat kadoedoekan ting­gi, atawa merasa girang dan bangga kaloe mendadak moentjoel bebrapa kadjadian jang membikin ia terӓngkat naek, zonder insjaf pada risico dan bahajanja, inilah tandanja ia soedah deket boeat alamken bahaja „djatoh." (Ajat 3).

Jang paling banjak manoesia sedihin adalah lantaran kailangan milik, kapoenja'an, angen-angen atawa poen pengharapan. Orang jang tida poenja anak tida bisa koetjoerken aer mata boeat kailangan anak jang diambil oleh malaikat El Maut, Orang jang tida poenja kakaja'an tida bisa alamken itoe kadjengkelan dan kasoekeran koetika mendjadi bangkroet dan miskin. Orang jang tida poenja kekasih tida bisa alamken itoe kadoekaa'n heibat lantaran pengharepannja gagal atawa moesna. Maka itoe siapa dikasih anak, dikasih kakaja'an, dikasih sobat atawa kekasih jang tertjinta, dan laen-laen lagi jang menjenangken, selaloe ada terantjem oleh kailangan, jang soedah pasti äken diboentoetin oleh kasedihan, lantaran segala apa di doenia tida bisa kekel. Maka orang jang, waktoe trima sang natuur atawa „nasif baek" poenja pengasih­an, tjoemah pikir senang dan girangnja sadja, zon­der inget jang di saban sa'at itoe pengasihan, aken diambil poelang kombali, ialah selama-lamanja ada terantjem oleh kasangsara'an. Maka saorang jang mengenal Tao tida kasih dirinja teriket pada barang doenia, hanja pandang sama rata pada kakaja'an dan kamiskinan, kaoentoengan dan karoegian, kamoelja'an dan kanina'an, jang tida bisa pengaroehken pada iapoenja katentreman, kerna ia soedah mengarti adanja itoe „perdjandjian resia" atawa ​toedjoean jang tersemboeni", dalem mana segala apa ada saling mengimbangin, hingga itoe datang dan pergi, moentjoel dan linjap, madjoe dan moendoer. ia pandang saroepa sadja. (Ajat 4 dan 5). Ini matjem „persetoedjoean jang tersem­boeni", jang djadi resia dari bekerdjanja wet alam, kapan didjalanken dalem pamerentahan negri, pastilah aken memberi banjak kaberesan dan kafaedahan. Tetapi manoesia jang kabanjakan, lantaran tabeatnja kouwkati dan tjoemah pikir kaoentoengan dan kasenangan sendiri, tjoemah maoe trima enaknja sadja. Kaloe soedah kaja kapingin lebih kaja, soedah banjak kapingin lebih banjak, dan soedah koeat kapingin lebih koeat. Marika tida maoe mengarti jang terpoeternja ini roda doenia membikin jang ada di atas toeroen ka bawah dan jang ada di bawah bisa naek ka atas. Marika maoe tjoba lawan, singkirken, atawa djaoehken diri dari itoe na­tuur wet jang sabenernja tida bisa dirobah lagi. Maka satoe Gouvernement jang bidjak dan bekerdja menoeroet natuur wet selaloe atoer segala apa dengen diam-diam, tida perloe diterangken satoe per satoe pada rahajat, kerna begitoe lekas orang banjak, jang tjoemah pikirin kapentingan sendiri, dikasih tjampoer dalem oeroesan negri, kakaloetan doenia lantes timboel, kerna atoeran jang bener ada seperti ikan jang tida bisa diangkat ka loear dari dalem itoe aer (Tao) kerna begitoe lekas dikaloearken — kapan orang adaken pamerentahan jang ber­tentangan sama Tao — pastilah kakaloetan aken timboel. (Ajat 6).