Cedro de California

É unha grande árbore, que acada tipicamente alturas de 40–60 m e un toro cun diámetro de até 3 m (máximo, 69 m de alto e 4,5 m de diámetro^[2]), estreitamente cónico, de ramallada mesta. A casca é dunha cor parda alaranxada que co tempo se torna agrisada, macía ao principio e despois vai formando fendas e exfoliándose en longas fitas na parte baixa do toro nos exemplares máis vellos. Os acios das follas son aplanados en forma de abano. A follaxe é persistente, composta de follas en pseudoverticilos de 4, escuamiformes, de ápice agudo e incurvado, longamente decorrentes na base, de cor verde escura brillante e que teñen un recendo resinoso intenso e peculiar. A árbore é monoica, con flores masculinas de preto de 3 mm en grupos nos extremos das franzas, globulares e douradas con 3-5 sacos polínicos e con estróbilos femininos de 6 escamas: 2 estériles, 2 reducidas e 2 seminíferas. Ditos conos son pequenos (15–25 mm), estreitos, rematados en punta, e ovoides. Dunha cor verde intensa ao principio, estes conos tórnanse pardos na madureza (logo dun ano), ceibando 4 (ou menos) sementes alíferas cando abren.^[3]

Nativo do oeste de América do Norte, estando o groso da súa área de distribución nos Estados Unidos, dende o centro-oeste de Oregón a través da maior parte de California e o extremo oeste de Nevada, e tamén no noroeste de México, na parte norte da Baixa California.

Medra desde os 50 deica os 2900 m de altitude, sendo a especie máis estendida do xénero.^[3][4][5]

A madeira lixeira da árbore utilízase para a elaboración de lapis, en particular nos Estados Unidos onde é a principal materia prima para a súa fabricación, por mor a que é macía e tende a se aguzar de xeito doado sen formar achas ou estelas, ou en marquetaría. Tamén é unha árbore ornamental popular, valiosa pola súa resistencia á seca. A madeira é moi aprezada polos escultores. A súa casca pode se queimar coma incenso.

O cedro de California do Pazo de Torrecedeira en Redondela, figura no catálogo de árbores senlleiras de Galiza elaborado pola Xunta de Galicia.

• Abies cupressoides Poir.
• Heyderia decurrens (Torr.) K.Koch
• Libocedrus decurrensTorr.
• Thuja craigana A.Murray
• Thuja decurrens (Torr.) Voss^[6]

•  
  Vista xeral dun exemplar mediano.
•  
  Unha póla "aplanada".
•  
  Folla e conos masculinos.
•  
  Póla con conos masculinos e femininos.
•  
  Cono feminino en frutificación incipiente.
•  
  Sementes alíferas inmaturas.
•  
  Conos femininos abertos in situ.
•  
  Conos e sementens maduros.
•  
  Froito chegado aberto con sementes alíferas in situ.
•  
  Sementes alíferas soltas.
•  
  Calocedrus decurrens

Wikimedia Commons ten máis contidos multimedia na categoría:  Cedro de California

• Arboretum de Villardebelle - fotos de los conos
• Calocedrus en The Gymnosperm Database
• USDA Plants Profile: Calocedrus decurrens
• Calocedrus decurrens en USDA, ARS/ GRIN. National Germplasm Resources Laboratory, Beltsville, Maryland.