Boeing 787

A versión máis curta do Dreamliner, o 787-8 foi a primeira variante do aparello en voar, no mes de decembro de 2009, a seguinte foi o 787-9 en setembro de 2013, e por último a versión máis longa, o 787-10, en marzo de 2017. Estas variantes chámanse B788, B789, e B78X, respectivamente na lista de designacións de tipos de avións da ICAO. O 787-3 de curto alcance cancelouse en 2010.^[3]

 

O 787-8 é o modelo básico da familia 787, cunha lonxitude de 57 metros, unha envergadura de 60 e un alcance de entre 14 200 e 15 200 km, dependendo da configuración de asentos. O 787-8 pode levar 210 pasaxeiros nunha configuración de tres clases. Esta foi a primeira variante en entrar en servizo no ano 2011,^[4] e Boeing pensou nela para que substituíse aos 767-200ER e 767-300ER, ademais de para expandirse cara a mercados sen escalas onde os avións máis grandes non sexan economicamente viables.

En outubro de 2019 un 29% dos pedidos do 787 son para o 787-8, con 366 entregas ata esa data.^[5] Cando foi lanzado, un B787-8 novo debería custar só un pouco máis que o B767-300ER, valorado en 85 millóns de dólares no seu pico dos 90, pero rematou custando un 20% máis.^[6]

O 787-9 foi a primeira versión do 787 cunha fuselaxe alongada, acadando así unha capacidade de entre 250 e 290 pasaxeiros cun alcance de entre 14.800 e 15.750 km. Esta variante diferenciase do 787-8 en varios puntos, entre os que están unha fuselaxe 6,1 metros máis longa, a estrutura fortalecida, maior capacidade de combustible e un peso máximo de engalaxe 24 700 kg maior, pero conserva a mesma envergadura que o 787-8. O obxectivo de Boeing con esta variante é o de competir co Airbus A330 e substituír os seus propios 767-400ER. Ao igual que o 787-8, tamén se abrira cara a mercados sen escalas, voando de forma máis eficiente que o 777-200ER ou o A340-300/500.

Orixinalmente agardábase que entrase en servizo no ano 2010, pero en outubro do 2011 Boeing agardaba facer as primeiras entregas a principios do 2014.^[7]

O prototipo do 787-9 realizou o seu voo de estrea dende Paine Field o 17 de setembro de 2013.^[8] O 8 de novembro dese ano levaba 141 horas de voo.^[9] Un 787-9 estivo na exposición estática do Farnborough Air Show de 2014 antes da súa primeira entrega.^[10] O 8 de xullo de 2014 Air New Zealand, o cliente de lanzamento, recibiu a súa primeira unidade, cunha distintiva librea negra, nunha cerimonia en Paine Field.^[11] O seu primeiro voo comercial foi o día 9 de agosto entre Auckland e Sydney.^[12]

Cando foi lanzado, o 787-9 tiña a mesma capacidade de combustible que as outras variantes. As diferenzas de deseño significaron un maior peso e polo tanto un menor alcance que o 787-8. Despois de novas consultas coas aeroliñas, incorporouse un novo tanque dianteiro para incrementar a súa capacidade de combustible.

En decembro de 2005, empurrado polo interese de Emirates e Qantas, Boeing estaba estudando a posibilidade de alongar o 787-9 para sentar entre 290 e 310 pasaxeiros. Esta variante tería unha capacidade semellante ao Airbus A350-900 e ao Boeing 777-200ER.^[13] Asdiscusións cos clientes continuaron a principios de 2006. Mike Bair, o vicepresidente de Boeing e xerente xeral do programa de desenvolvemento do 787 na época, dixo que era doado continuar co desenvolvemento do 787-10 despois de que outros clientes se unisen ao requirimento de Emirates.^[14] O modelo estápensado como substituto do Boeing 767-400ER.

O 30 de maio de 2013 Singapore Airlines converteuse no clinete de lanzamento ao pedir 30 787-10, que serían entregados entre 2018 e 2019.^[15][16] O 18 de xuño dese mesmo ano Boeing lanzou oficialmente o 787-10 no Paris Air Show, con pedidos ou compromisos por 102 avións de Air Lease Corporation (30), Singapore Airlines (30), United Airlines (20), British Airways (12), e GE Capital Aviation Services (10).^[17] En xaneiro de 2020 o avión tiña 205 pedidos, dos cales 61 xa foran entregados.^[18]

A variante foi concibida como substituto dos Boeing 777-200, Airbus A330 e Airbus A340.^[19] O -10 compite contra o Airbus A350-900. Segundo Boeing é máis económico que o A350 en rutas curtas.^[20] Steven Udvar-Hazy, presidente de ILFC, dixo "se está configurado de forma idéntica, o -10 ten un pouco de vantaxe sobre o -900", pero menor que a estimación de Boeing do 10%.^[21] O 787-10 terá 68 m de longo, sentará a 330 pasaxeiros en dúas clases e voará a unha distancia de 11 910 km.^[22]

Boeing completou o deseño detallado do 787-10 o 2 de decembro de 2015.^[23] A súa montaxe comezou en marzo de 2016.^[24] Os deseñadores apuntaron ao 90% de compoñentes comúns entre o 787-9 e o -10 e lograron finalmente un 95%; o alongamento de 5 metros e medio conseguiuse engadindo algo máis de 3 metros diante da á, e 2,4 metreos por detrás, e reforzando a fuselaxe para as cargas de flexión no centro da caixa das ás. Debido á súa lonxitude o avión precisa unha proteción adicional contra os impactos da cola, un tren de aterraxe igual que o 777-300ER, e o sistema de aire acondicionado da cabina ten un 15% máis de capacidade. O primeiro o terceiro -10 de proba incorporaron os novos motores Rolls-Royce Trent 1000 TEN, mentres que o segundo foi equipado cos General Electric GEnx-1B.^[25]

 

As principais partes da fuselaxe foron recibidas para a montaxe final o 30 de novembro de 2016. As secións medias da fuselaxe do 787-10 son demasiado grandes para ser transportadas a Everett, Washington e o avión é construído en Charleston, Carolina do Sur;^[26] é o primeiro avión de pasaxeiros en ser montado exclusivamente alí. O primeiro -10 presentouse o 17 de febreiro de 2017.^[27] O primeiro voo da variante tivo lugar o 31 de marzo dese ano e durou 4 horas e 48 minutos.^[28]

O primeiro 787-10 de probas realizou traballos de expansión da envolvente de voo e o segundo uniuse ao programa a principios de maio de 2017, mentres que o terceiro co interior dunha cabina de pasaxeiros usouse para probar o mellorado sistema de control ambiental e o rendemento de consumo dos motores Trent apartir do mes de xuño. O -10 apareceu no Paris Air Show de 2017.^[29] O segundo -10 usouse para probar os motores GE Aviation e o terceiro voou por vez primeira o 8 de xuño de 2017, cando o programa de probas de voo tiña o 30% completado.^[30] Boeing rematou a montaxe e o traballo de pintura do primeiro 787-10 de produción en outubro de 2017, antes da súa certificación.^[31]

Cando comezou o Dubai Air Show de novembro de 2017 o 787-10 tiña 171 pedidos; Emirates comprometeuse a mercar 40 787-10, con cabinas de dúas e tres clases de entre 240 e 330 pasaxeiros, que serán entregados a partir de 2022 e con dereitos de conversión ao máis pequeno 787-9.^[32][33] Estes avións adaptaríanse para voos de 7-8,5 horas, nunha configuración de tres clase de 280 asentos.^[34] Tim Clark, presidente de Emirates, tiña dúbidas sobre se o avión acadaría o MTOW para o alcance e a carga útil requirido cos motores iniciais de 310-320 kN de pulo, aínda que os acuais turboventiladores de 340 kN e as primeiras marxes do -9 dábanlle ao 787-10 un rendemento prometedor.^[35] A principios de 2019, Emirates estaba considerando cancelar o seu pedido de 787-10, debido a que as marxes dos motores eran insuficientes para o clima cálido de Dubai, en favor do Airbus A350 (que tamén podería substituír o seu último pedido de Airbus A380).^[36] O pedido non se mencionou no informe anual de Emirates de maio de 2019, mentres que no informe anterior aparecía como "autorizado e non contratado".^[37] No Dubai Air Show de 2019 Emirates colocou un pedido por 30 787-9 en vez de decantarse polo 787-10.^[38]