Ñora

A ñora é unha variedade cultivada de pemento (Capsicum annuum) tradicional do Levante español, de pequeno tamaño, forma arredondada e pel de cor encarnada, que se utiliza preferentemente desecado ao sol como condimento^[1]. Denomínase bola en Alacante e Murcia, onde se considera orixinaria. Ten un sabor doce e é moi utilizada na gastronomía do Levante español, especialmente na Rexión de Murcia, a Comunidade Valenciana (Alacante) e en Cataluña.

En Cataluña utilízase tamén en sofritos e arroces, pero sobre todo é o ingrediente principal e característico da salsa romesco, que adereza a típica ensalada xató e que combina tan ben con todo tipo de verduras, carnes e peixes que, xunto co allioli, nunca falta nas grelladas catalás. Tamén é o ingrediente característico da salsa de calçots que se prepara nas calçotades.