Denghoog

Söl'ring

Di Denghoog, wat nuurđern di Serk fan Woningstair üp Söl liit, es en  Gurtstiingreev, wat ön di  Jungstiintir becht uuren es. Des Tir es uk di Denghoog-Stufe neemt uuren. Di Denghoog es sa ombi 5000 Jaar ual. Dü kenst ön des Megalithstiin-Önlaag  iingung, wat öner en 3,20 Meeter hoogi Öörtstak liit.
Di Hoog es 1868 fan di Geoloog Ferdinand Wibel (beren 1840, stürewen 1902) üt Hamborig önersaacht uuren. Sent 1930 ken di Baarigasten dit beest pleeget Gunggreev ön Sleeswig-Holstiin bisjuk.

Di Kaamer heer di Fuarem fan en Ai en mat 5 Meter fan Uasten hentö Weesten en sa ombi 3 Meeter fan Nuurđen hentö Süđern. Di Höögdi es 1,90 Meeter üp di Weester- en 1,50 Meeter ön di Uastersir. Di Kaamer es fan Dikstiiner üt di Istir. Des sen bit hentö 18.000 Kilogram swaar. 12 Dikstiiner stuun ön en Krans, wat 3 jit gurter Stiiner drai, en dit es di Aurskot.

Di Gung es becht fan 12 Stiiner en jit 2, wat di Düür fuarstel skel. Di Hööler twesken di Dikstiiner sen me Ruarsönstiiner techt maaket uuren. Ön jer Tiren skul em döör en 6 Meeter lüng Gung, wat 1 m hoog en breer wiar en wat me litj Stiiner plaasterit uuren wiar, ön di Kaamer iingung. Deling kum di Liren fan boowen iin.
Des Gung weeget hen tö Süđern, sa dat di Sen ön di 21.Detsember üp di Spailstiin ön di Greev skinjt.
Ön di uastermuar Hualev fan di Kaamer sen 2 Reegen Stiiner hoogkant stelt uuren en diili di Rüm. Jir heer di Geoloog Ferdinand Wibel en Jölstair fünen, wat üp en akuraat becht Bröch öntjent uuren wiis maast.

Wat heer hi diar fünen? Hi fuan iin ön di Greev Aurbliifsel fan en ünforbronen Lik, en Ter fan en Nuat, 6 Röfstiinperlken, en Muk, Toonfaten en –potsjaart, Eeksen, forskelig Baitels en Flentstiinklingen. Di originaal Diilen kenst Dü ön Schloss Gottorf ön Schleswig finj en önluki. Kopiien sen iin ön dit Sölring Museeum ön Kairem ütstelt uuren.

Di Naam „Denghoog“ es Söl'ring en jit sa fuul üs Thinghoog (Deng: Thing). Man Spreckelsen meent, Denghoog kumt fan „d’eng“ of „d’inge“. Dit Uurt „Eng“ es deensk en jit Ingi, üp Dütsk „Wiese“.
Ön jer Tiren wiar trinjom di Denghoog bluat Eeker en di Kiar. Deling es diar al di Tērp.
Hat es möögelk, dat des Stair uk fan üüs Fuarfaaren üs Plaats brükt uuren es, om Rocht tö spreeken.

(En Tekst fan Birgit Hussel, Sölring Foriining)

Didiar artiikel as uun det list faan gud artiikler, diar det leesen luane apnimen wurden. Uun uugenblak jaft at diar 73 faan.