Düner

Didiar artiikel ment a sunhuuger. Luke uk bi Dün

Tekst üüb Öömrang

En dün as en huug ütj sun, di faan a winj tuupstöwen wurden as.

Am dat en dün waaks koon, brükt hat sun an knaaphaid faan plaanten. Diaram kem jo fööraal uun drüg regiuunen föör, man uk diar, huar a plaanten ei so gau waaks kön üs diar nei sun tu komt.

• En primeerdün stäänt tesken weederskaant an dünemkaant an as so gud üs goorei bewoksen.

• En dün, wat knaap mä halem bewoksen an ei stabiil as, het witjdün.

• En stabiil dün, wat starker bewoksen as, het grädün.

• Wan diar muar plaanten tu kem an am di sun knaap noch sä koon, sait am diar bründün tu.

• Kem ütj a istidj, stun uun't banlun an san bewoksen.
• Kem uk föör, huar't mä a büürerei üüb skraalen grünj uun Nuurdsjiisklun auerdrewen wurden as. (Luke uk bi: Hias.)

• Sakeldün of uk Barchan: Komt föör uun drüg kliima, sjocht ütj üs en sakel an sticht uun luv flaak uun an fäält uun lee stark uf. Jo sakelaanjer waanre gauer üs di maden.

• Paroobeldün: Komt föör uun hualewdrüg kliima, sjocht uk ütj üs en sakel, man jo sakelaanjer waanre ei so gau üs a maden, auer jo al en betj bewoksen san.

• Swäärsdün: Komt föör, huar föl sun uunleewert woort an a winj fööraal ään wai weit, as lung an smääl an wääkst swäärs tu a winj.

• Loongsdün: Komt föör, huar ei so föl sun uunleewert woort an a winj konstant as, as uk lung an smääl an koon 100 m huuch wurd.

• Draadün: Komt uun a Sahara föör, as grat an stabiil. Draas san banendüner.

• Krüsdün of uk Stäärdün: Komt föör, huar föl sun uunleewert woort an a winj auer't juar wakselt.

 Wikimedia Commons hää bilen of filmer tu: Düner