Dioptrio

La dioptrio (simbolo dpt) estas la mezurunuo de la refrakta kapablo de lenso aŭ optika sistemo. Unu dioptrio estas difinita kiel 1 dpt = 1 m⁻¹. La dioptrio estas derivita mezurunuo en la Internacia sistemo de unuoj.

La nombro de dioptrioj de lenso aŭ optika sistemo egalas al inverso de la fokusdistanco mezurata en metroj:

${\displaystyle D={\frac {1}{f{\text{ (m)}}}}}$

Por la lenso de homa okulo la fokusdistanco egalas al proksimume f_norm = 17 mm kaj je tiu distanco en normala okulo troviĝas la retino, kie la lumradioj konverĝas. Ĉe miopeco la okulo estas plej ofte iom pli longa ol normale. Tial en stato de neakomodo, la lumradioj konverĝas antaŭ la retino, estigante konfuzan bildon. Por estigi klarkonturan bildon necesas pli granda fokusdistanco. Oni supozas ekzemple, ke la okulo estu pli longa je unu milimetro kaj sekve necesas fokusdistanco egala al f = 18 mm. Por pligrandigi la fokusdistancon necesas diverĝiga lenso kun taŭga fokusdistanco f_kor. Por la sistemo kunmetita el du lensoj validas proksimume ^[1]:

${\displaystyle {\frac {1}{f}}={\frac {1}{f_{\text{norm}}}}+{\frac {1}{f_{\text{kor}}}}}$ , el kio

${\displaystyle {\frac {1}{f_{\text{kor}}}}={\frac {1}{f}}-{\frac {1}{f_{\text{norm}}}}=\left({\frac {1}{18}}-{\frac {1}{17}}\right)\cdot 10^{3}{\text{ m}}^{-1}=-3,3{\text{ dioptrioj}}}$,

kie la signo minus rilatas al diverĝiga lenso.

Por ĝuste korekti la miopecon de la ekzemplo estas uzata lenso negativa (konkava) kun 3,25 dioptrioj, ĉar la lensoj disponeblas nur en ŝtupoj de 0,25 dioptrioj.