Jacques-Nicolas Bellin
Jacques-Nicolas Bellin (Pariz, 1703 – Versailhez, 21 Meurzh 1772) a oa ur c'hartennour gall.
E 1721, da 18 vloaz, e voe anvet e Servij hidrografek ar verdeadurezh, nevez-krouet. E miz Eost 1741 e teuas da vezañ "Ijinour ar verdeadurezh" e Dalc’had kartennoù ar verdeadurezh. Diwezhatoc’h e teuas da vezañ ezel eus Akademiezh ar mor, e Pariz, hag eus ar Royal Society e Londrez.
E labour
[kemmañ | kemmañ ar vammenn]A-hed e vuhez e tresas kartennoù a-leizh, eus kement lec’h a zo dre ar bed. Dindan e renerezh e voe graet un eil embannadur eus « Le Neptune françois », un dastumad kartennoù eus aodoù Bro-C’hall. Talvoudus-bras eo e gartennoù eus Kanada ha douaroù gall ar Bed Nevez, ha koulskoude n’eo ket bet eno gwech ebet. Reiñ a rae kartennoù da voraerien a yae du-hont ha goulenn diganto reizhañ anezho gant an dorn, diouzh an ezhomm. Pa zistroent da Vro-C’hall e laboure Bellin gant o notennoù da sevel kartennoù resisoc’h.
Brud a dapas e labour buan a-walc’h en Europa : adembannet e voe e gartennoù meur a wech en XVIIIvet kantved hag eilskrivet e voent gant kartennourien all.
Kenlabourat a reas ivez gant an Encyclopédie, un holloueziadur e 35 levrenn embannet gant Diderot ha d’Alembert, pa savas evito ur mil pennad bennak, diwar-benn ar verdeadurezh dreist-holl.
- Kartennoù embannet gantañ
- Hydrographie française (1753)
- Carte de l'Amérique septentrionale (Kartenn eus hanternoz Amerika) (1755)
- Le petit Atlas François. Recueil de Cartes et Plans des quatre parties du Monde (1758)
- Petit Atlas Maritime (1764)
- Nouvelle méthode pour apprendre la géographie (1769)
- Description géographique du golfe de Venise et de la Morée (1771)
Levrlennadur
[kemmañ | kemmañ ar vammenn]- Jean-Marc Garant. Jacques-Nicolas Bellin (1703–1722), cartographe, hydrographe, ingénieur du ministère de la Marine: sa vie, son oeuvre, sa valeur historique. Tezenn, Montréal: 1973
