Marih atawa Marik (hurup Arap gundul: مريخ; Indonésia: Mars; lambang: ) ya'entu planit keëmpat nyang paling deket deri mataari. Enni planit juga sering dipoyok sebagé "planit mèrah" bahna warna planitnya kalo diliat paké mata telanjang entu kemèrahan lantaran besi oksida nyang ada di amparan tanah planitnya. Marih entu planit batu nyang atmospèrnya rada nipis. Daratannya ada kawah, gunung api, lebak, gurun, èn tutupan ès. Lamanya Marih punya puteran sumbu dan perobahan kapra sama kaya' di bumi. Ada gunung nyang paling tinggi di Marih, gunung Olympus Mons namanya, nyang juga jadi gunung paling tinggi seantèro Tata Kemataarian[1]. Terus, Valles Marineris juga jadi lebak paling jero èn gedé seantèro Tata Kemataarian. Ini planit ada punya dua bulan, yaitu Pobos èn Démos. Lama kiteran kuliling mataarinya 687 ari. Laèn entu, juga Marih ngiter di sumbunya. Lamanya entu 25,62 jam, bèda tipis ama Bumi punya puteran sumbu.
