Buku Josua

1:1 Jadi dung mate si Musa, naposo ni Jahowa, ninna Jahowa ma tu si Josua, anak ni si Nun, parhalado ni si Musa, songon on: ᯐᯑᯪ ᯑᯮᯰ ᯔᯖᯩ ᯘᯪ ᯔᯮᯘ ᯉᯇᯬᯘᯬ ᯉᯪ ᯐᯂᯬᯋ ᯉᯉᯪ᯲ᯉ ᯐᯂᯬᯋ ᯔ ᯖᯮ ᯘᯪ ᯐᯬᯘᯮᯀ ᯀᯉᯄ᯦᯲ ᯉᯪ ᯘᯪ ᯉᯉᯮ᯲ ᯇᯒ᯲ᯂᯞᯑᯬ ᯉᯪ ᯘᯪ ᯔᯮᯘ ᯘᯬᯝᯉᯬ᯲ ᯀᯉᯬ᯲

1:2 Nunga mate ianggo si Musa, naposongki, on pe borhat ma ho, taripari ma Jordan on, ho dohot sandok bangso on laho tu tano silehononku tu nasida, tu halak Israel i.

1:3 Sude tano, sidalanan ni palak ni patmuna, nunga hulehon tu hamu, songon na hudok tu si Musa hian.

1:4 Olat ni halongonan dohot Libanon sahat ro di batang aek na bolon, i ma batang aek Euprat, sandok tano ni halak Het, jala sahat ro di laut na bolon tungkan hasundutan, i ma parbalohanmuna.

1:5 Ndang adong manang ise na manahan jongjong di jolom saleleng ho mangolu, songon pandonganingku di si Musa, dongananku ho; ndang tagamon pasombuonku manang tadingkononku ho.

1:6 Pir ma tondim jala marsihohot, ai ingkon ho do marbagi tano on bahen partalian ni bangso on, na huuarihon tu ompunasida, lehononku tu nasida.

1:7 Asal pir tondim, jala marsihohot situtu mangaradoti dohot patupahon hombar tu sude patik, angka na tinonahon ni si Musa, naposongki tu ho. Unang manimbil ho sian i tu siamun manang tu hambirang, asa marmulia ho manang dompak dia ho mangalangka.

1:8 Unang meret buku ni patikon sian pamanganmu, sai pingkirpingkiri ma i arian dohot borngin, asa diradoti ho, jala dipatupa ho, hombar tu sude na tarsurat di bagasan i, asa maruntung ho di angka dalanmu, jala marmulia parulaonmu.

1:9 Nda nunga hudok tu ho: Pir ma tondim, jala Jahowa Debatam do donganmu, manang dompak dia pe ho mangalangka.

1:10 Jadi ditonai si Josua ma angka partogi ni bangso i, songon on:

1:11 Bolus hamu ma tongatonga ni parsaroan i, jala dok hamu ma tu bangso i, songon on: Padiri hamu ma bohalmuna, ai di bagasan tolu ari on dope tariparanmuna ma Jordan on, asa bongot jala teanonmuna tano silehonon ni Jahowa, Debatamuna tu hamu, bahen partalianmuna.

1:12 Jala tu halak Ruben, Gad dohot satonga marga Manasse, didok si Josua songon on:

1:13 Ingot hamu ma hata na tinonahon ni si Musa, naposo ni Jahowa, tu hamu di na nidokna i: Nunga sonang hamu dibahen Jahowa Debatamuna, jala dilehon tu hamu tano on.

ᯤᯝᯖᯬ᯲ ᯂᯔᯮ ᯔ ᯂᯖ ᯉ ᯖᯪᯉᯬᯉᯂᯉᯬ᯲ ᯉᯪ ᯘᯪ ᯔᯮᯘ, ᯉᯇᯬᯘᯬ ᯉᯪ ᯐᯂᯬᯋ, ᯗᯖᯮ ᯂᯔᯮ ᯑᯪ ᯉ ᯉᯪᯑᯂᯬ᯲ᯉ ᯤ: ᯉᯮᯝ ᯘᯬᯉᯰ ᯂᯔᯮ ᯑᯪᯅᯂᯉᯩ᯲ ᯐᯂᯬᯋ ᯑᯩᯅᯖᯔᯮᯉ, ᯐᯞ ᯑᯪᯞᯩᯂᯉᯬ᯲ ᯖᯮ ᯂᯔᯮ ᯖᯉᯬ ᯀᯉᯬ᯲.

1:14 Ianggo jolmamuna, anakkonmuna dohot pinahanmuna, itenang tading di tano na nilehon ni si Musa tu hamu, di bariba ni Jordan; alai anggo hamu, ingkon marsinjata be hamu, nasa sialo musu manguluhon donganmuna taripar mangurupi nasida.

1:15 Paima dipasonang Jahowa donganmuna, suang songon hamu, jala dohot nasida mangingani tano silehonon ni Jahowa Debatamuna, tu nasida. Dung i mulak ma hamu tu tano partalianmuna, asa hamu nampunasa na nilehon ni si Musa, naposo ni Jahowa tu hamu, di bariba ni Jordan tungkan habinsaran.

1:16 Jadi didok nasida ma mangalusi si Josua: Sude na tinonahonmu tu hami bahenonnami ma, jala manang tudia pe hami disuru ho, topotonnami do.

1:17 Sandok songon panangihonnami di si Musa, songon i do tangihononnami ho; asal didongani Jahowa Debatam ho, songon na nidongananna si Musa.

1:18 Manang ise na mangalo parentam, jala ndang ditangihon angka hatam, taringot tu sude na tinonahonmu tu hami, ingkon marutang hosa ibana; asal pir tondim jala marsihohot.

2:1 Dung i disuru si Josua, anak ni si Nun, dua halak pangkahap sian Sitim, ninna ma: Laho ma hamu, hahapi hamu ma tano i dohot huta Jeriko. Jadi laho ma nasida, dibongoti nasida ma bagas ni boruboru sibabijalang sada, na margoar si Rahab, laos modom ma nasida disi.

2:2 Dung i didok halak ma tu raja ni Jeriko songon on: Ida ma, ro do na borngin tuson angka baoa sian halak Israel mangkahapi tano on.

2:3 Jadi disuru raja ni Jerikoi ma tu si Rahab, didok ma: Togihon tu ruar baoa, angka na ro tu ho, angka na ro tu jabum, ai mangkahapi sandok tano on, hinorhonnasida i.

2:4 Alai nunga diboan boruboru i hian baoa sidua halak i jala dibunihon nasida, gabe didok ma: Tongon do, ro do dua halak manopot ahu, alai ndang huboto manang sian dia nasida.

2:5 Jadi martahi mangkinsu harbangan i, dung holom, ruar ma angka baoa i, ndang huboto manang dompak dia nasida laho. Haru eahi hamu ma nasida, sai dapot hamu do eahanmuna.

2:6 Alai nunga didokkon boruboru i hian nasida manaek tu tarup, jala dibunihon nasida tu toru ni hori, na jinomurna di ginjang tarup i.

2:7 Jadi dieahi angka jolma i ma nasida di dalan tungkan Jordan, sahat ro di hatariparan, jala dihinsu harbangan i, dung ruar angka pangeahi di nasida.

2:8 Alai tagan so laho modom dope nasida, dipanaek boruboru i ma tarup i manopot nasida.

2:9 Jala didok ma mandok angka baoa i: Nunga huboto, naung dilehon Jahowa tano on tu hamu, jala naung madabu hasonggoton tu hami maradophon hamu, jala malala ateate ni sandok isi ni tano on maradophon hamu.

2:10 Ai nunga hubege hami na niarsik ni Jahowa aek ni laut Arung maradophon hamu, uju na ruar i hamu sian Misir, dohot na binahenmuna tu na dua raja ni halak Amori na di bariba ni Jordan, tu raja Sihon dohot tu raja Og, na nirotongkonmuna nasida.

2:11 Jadi dung hubege hami barita i, malala ma ateatenami, jala ndang be manggulmit roha ni manang ise, dibahen biarna mida hamu, ai Jahowa Debatamuna, Ibana do Debata di banua ginjang dohot di banua tonga on.

2:12 On pe, ua mangmangkon hamu ma tu Jahowa, paboa na olo dohot hamu mambahen asi ni roha tu isi ni bagas ni damang, ala asi ni roha na hubahen i tu hamu, jala lehon hamu ma di ahu tanda haburjuon.

2:13 Paboa pangoluonmuna damang dohot dainang dohot angka ibotongku dohot hahaanggingku, ro di sude na di nasida, jala paluaonmuna hosanami sian hamatean.

2:14 Jadi didok baoa na dua i ma tu ibana: Hosanami singkatmuna tu hamatean! Molo so dipaboaboa hamu hatantaon, jala ia dilehon Jahowa tano on tu hami, sai bahenonnami do tu ho asi ni roha dohot haburjuon.

2:15 Jadi ditantan ma nasida na dua i dohot tali sian pandiloan tu toru, ai hombarhon parik ni huta i do bagasna, jala maringan di atas parik i do ibana.

2:16 Dung i didok ma tu nasida: Dompak dolok ma hamu laho, asa unang pajumpang hamu dohot pangeahi, jala martabuni ma hamu disi tolu ari lelengna, paima mulak angka pangeahi, dung i tulus hamu ma dalanmuna.

2:17 Dung i ninna baoa na dua i ma tu ibana: Lias ma hami sian na minangmanganmon, na pinamangmangmu hami.

2:18 Ida ma molo masuk hami tu tano on, ingkon gantungonmu do tu pandiloan tali na rara i, panantananmu di hami, jala papunguonmu tu lambungmu di jabu on natorasmu dohot angka ibotom dohot sandok pinompar ni amam.

2:19 Jala manang ise na ruar sian pintu ni jabum tu balian, marsapata tu ibana do mudarna, lias ianggo hami; alai manang ise donganmi di jabu on marsapata tu hami do mudarna, molo tung dihahua tangan ni manang ise ibana.

2:20 Jala molo tung dipaboaboa ho hatantaon, lias ma hami sian na minangmanganmon, na pinamangmangmu hami.

2:21 Jadi didok ibana ma: Songon na nidokmuna ma tutu, dung i dipalaho ma nasida, gabe mardalan nasida. Jadi digantungkon ibana ma tali na rara i tu pandiloan.

2:22 Jadi laho ma baoa na dua i, gabe tolhas ma nasida tu dolok, laos disi ma nasida tolu ari lelengna, paima mulak angka pangeahi; ai sai diburu angka pangeahi do nian nasida di saluhut dalan i, hape ndang jumpangsa nasida.

2:23 Dung i mulak ma baoa sidua halak i, jala tuat sian dolok i, jala taripar, gabe sahat nasida tu si Josua, anak ni si Nun, jala dipajojor tu ibana sude na masa tu nasida.

2:24 Angka didok nasida ma tu si Josua: Nunga sahat tu tanganta dilehon Jahowa sandok tano i, jala nunga malala huhut ateate ni sandok isi ni tano i dibahen biarna mida hita.

3:1 Dung i dipasogot si Josua ma manogotna i hehe, jala borhat nasida sian Sitim sahat ro di Jordan, ibana dohot sude halak Israel, laos disi nasida marborngin, tagan so taripar dope nasida.

3:2 Jadi dung salpu tolu ari, dibolus angka partogi ma tongatonga ni parsaroan i.

3:3 Jala martona nasida tu bangso i, songon on: Molo diida hamu poti parpadanan ni Jahowa, Debatamuna i, angka malim dohot halak Lepi, angka na mangusungsa, borhat ma hamu sian ingananmuna laho mangihuthon tusi.

3:4 Alai ingkon adong arga dua ribu elak holangholangmuna sian i. Ndang jadi hamu dumonok tusi, asa diboto hamu dalan sidalananmuna, ai ndang dung dope dibolus hamu dalan i anggo nasailaonna i.

3:5 Dung i didok si Josua ma tu bangso i: Manguras ma hamu, ai marsogot ma bahenon ni Jahowa angka halongangan di tongatongamuna.

3:6 Dung i didok si Josua ma tu angka malim, songon on: Usung hamu ma poti parpadanan i, jala taripar ma hamu manguluhon bangso i! Jadi diusung nasida ma poti parpadanan i laho manguluhon bangso i.

3:7 Dung i didok Jahowa ma tu si Josua: Sadarion ma pungkaonku patimbul ho di jolo ni sandok Israel, asa tung diboto nasida, ia songon i pandonganingku di si Musa, laos songon i dongananku ho.

3:8 Alai anggo ho martona ma ho tu angka malim, angka na mangusung poti parpadanan i, songon on: Molo sahat hamu ro di pasir ni aek Jordan, togang ma hamu jongjong di pasir ni Jordan i.

3:9 Dung i didok si Josua ma tu halak Israel i: Pajonok hamu tuson, jala tangihon hamu angka hata ni Jahowa Debatamuna i!

3:10 Jadi didok si Josua ma: On ma partinandaanmuna, paboa Debata na mangolu i di tongatongamuna, jala onjaronna situtu maradophon hamu halak Kanaan, halak Het, halak Hevi, halak Perisi, halak Girgasi, halak Amori dohot halak Jebusi.

3:11 Ida ma, poti parpadanan ni Tuhan, Sigomgom sandok tano on taripar di Jordan manguluhon hamu.

3:12 On pe, buat hamu ma di hamu sampulu dua halak sian angka marga ni Israel, sahalak be sian ganup marga.

3:13 Molo mangulon palak ni pat ni malim, angka na mangusung poti ni Jahowa, Tuhan Sigomgom sandok tano on di bagasan aek Jordan, tolak ma angka aek Jordan, togang ma angka aek na mabaor sian julu, manjadi hira dorpi.

3:14 Jadi di na borhat bangso i sian undungundungnasida laho manaripari Jordan, jala malim angka siusung poti parpadanan i manguluhon bangso i.

3:15 Jala sahat angka siusung poti i ro di Jordan, jala dais pat ni malim, angka siusung poti i tu aek i (alai binsat do Jordan i di sandok pasirna saleleng masa gotilon).

3:16 Jadi togang ma aek angka na mabaor sian julu, jongjong songon dorpi, mangalantap situtu sahat ro di huta Adam, na tungkan lambung sian Zaretan; alai anggo aek na mabaor tu laut, tu holbung ni laut sira, lam marsik situtu ma. Jadi taripar ma bangso i tondong ni Jeriko.

3:17 Jadi jongjong marsihohot ma malim, angka na mangusung poti parpadanan ni Jahowa, di na mahiang, di parsitongaan ni Jordan; jadi sandok Israel taripar di na mahiang, paima timpas ditaripari sandok bangso i Jordan.

4:1 Alai dung timpas ditaripari sandok bangso i Jordan i, didok Jahowa ma tu si Josua songon on:

4:2 Buat hamu ma di hamu sian bangso i sampulu dua halak, sahalak be sian ganup marga.

4:3 Jala dokkon hamu ma nasida: Hindat hamu ma sian on, sian tongatonga ni Jordan, sian hajongjongan ni pat ni angka malim, sampulu dua batu, jala boan hamu tu bariba i, jala peakkon hamu di parbornginanmuna saborngin on.

4:4 Dung i dijou si Josua ma na sampulu dua halak i, angka na pinillitna sian halak Israel, sahalak be sian ganup marga.

4:5 Jadi didok si Josua ma tu nasida: Taripar ma hamu manguluhon poti ni Jahowa Debatamuna tu tongatonga ni Jordan, diporsan be ma di abarana sada batu mangihuthon bilangan ni angka marga ni halak Israel.

4:6 Asa manjadi sada parningotan ma i di tongatongamuna. Molo manungkun sogot anakmuna: Aha do lapatan ni angka batu on di hamu?

4:7 Jadi dohononmuna ma tu nasida: Na tolak i angka aek ni Jordan maradophon poti parpadanan ni Jahowa; ai uju na tinariparanna i Jordan i, tolak ma aek ni Jordan, jala angka batu on ma bahen parningotan di halak Israel ro di saleleng ni lelengna.

4:8 Jadi dibahen halak Israel ma songon na nidokkon ni si Josua tu nasida, dihindat nasida ma sampulu dua batu sian parsitongaan ni Jordan, songon na nidok ni Jahowa tu si Josua, mangihuthon bilangan ni marga ni halak Israel, jala diboan tu parbornginan, jala dipajongjong disi.

4:9 Dipajongjong si Josua huhut sampulu dua batu di parsitongaan ni Jordan, apala di hajongjongan ni pat ni malim, angka na mangusung poti parpadanan i, laos disi dope rasirasa sadarion.

4:10 Alai anggo malim, angka na mangusung poti parpadanan i, jongjong do di parsitongaan ni Jordan, paima sun tulus saluhut hata na tinonahon ni Jahowa tu si Josua, sidohononna tu bangso i, hombar tu sude na tinonahon ni si Musa tu si Josua. Jadi humalaput ma bangso i laho taripar.

4:11 Jadi dung impi taripar sandok bangso i, taripar ma dohot poti ni Jahowa, jala angka malim manguluhon bangso i.

4:12 Taripar ma dohot halak Ruben, halak Gad dohot satonga marga Manasse, marsinjata be manguluhon halak Israel, songon na nidok ni si Musa hian tu nasida.

4:13 Arga opatpulu ribu angka sialo musu nasida taripar di jolo ni Jahowa laho tu tongtangan di adaran Jeriko.

4:14 Di ari na sasada i timbul ma si Josua, dibahen Jahowa di adopan ni sandok Israel, gabe mabiar nasida mida ibana, songon na hinabiarannasida si Musa saleleng mangolu ibana.

4:15 Dung i didok Jahowa ma tu si Josua songon on:

4:16 Dokkon ma malim, angka na mangusung poti panindangion, asa manaek nasida sian Jordan.

4:17 Jadi didok si Josua ma tu angka malim: Manaek ma hamu sian Jordan!

4:18 Jadi dung manaek malim, angka na mangusung poti parpadanan ni Jahowa sian parsitongaan ni Jordan, dung diojakkon angka malim palak ni patnasida tu na mahiang, sumuang ma aek ni Jordan tu ingananna hian, jala mabaor songon na somal, binsat di sandok pasirna.

4:19 Asa manaek ma bangso i sian Jordan di ari sampulu di bulan sipahasada, jala marsaro nasida di Gilgal, di parbalohan tungkan habinsaran ni Jeriko.

4:20 Jala batu na sampulu dua i, angka na binoannasida sian Jordan i, dipatindang si Josua ma di Gilgal.

4:21 Jadi didok ma tu halak Israel songon on: Molo disungkun anakkonmuna sogot amanasida: Aha do lapatan ni angka batu on ninna?

4:22 Ingkon pabotohononmuna ma tu anakkonmuna mandok: Mardalan di na mahiang ditaripari Israel Jordan on.

4:23 Uju na niarsik ni Jahowa, Debatamuna i, aek ni Jordan i maradophon hamu, paima sahat hamu taripar, songon na binahen ni Jahowa Debatamuna, uju di laut Arung, na niarsikna i maradophon hita, paima sahat hita taripar.

4:24 Asa tung saluhut angka bangso ni tano on mananda di tangan ni Jahowa na gogoi! Asa tongtong hamu mabiar mida Jahowa Debatamuna i.

5:1 Jadi dung dibege sude raja ni halak Amori, angka na di bariba ni Jordan tungkan hasundutan, dohot sude raja ni halak Kanaan i, angka na di topi laut, naung niarsik ni Jahowa aek ni Jordan maradophon halak Israel, paima impi taripar hita, gabe giang ma ateatenasida, jala ndang be di ingananna rohanasida, dibahen biarna maradophon halak Israel.

5:2 Uju i ma didok Jahowa tu si Josua: Bahen ma di ho raut angka sian batu, jala ulahi sunati halak Israel paduahalihon.

5:3 Jadi dibahen si Josua ma di ibana raut angka sian batu, jala disunati halak Israel di atas buntulbuntul Aralot.

5:4 Jala on do alana umbahen disunati si Josua nasida: Sandok bangso i na ruar sian Misir, i ma angka baoa, sude angka sialo musu, nunga marragean di halongonan, di dalan, dung ruar nasida sian Misir.

5:5 Ai tarsunat do anggo sandok bangso na ruar i, alai sandok bangso, angka na tubu di halongonan, di dalan, dung ruar nasida sian Misir, ndang tarsunat.

5:6 Ai opatpulu taon lelengna maotaot halak Israel di halongonan, paima sun siap sandok baoa sialo musu, angka na ruar sian Misir, ala so ditangihon nasida suara ni Jahowa, umbahen pola marmangmang Jahowa tu nasida, na so tupa idaonnasida tano na niuarihon ni Jahowa tu ompunasida lehononna tu hita, tano habaoran ni susu dohot situak ni loba.

5:7 Alai anggo anaknasida tahe, dipatindang ibana singkatnasida, nasida ma na sinunat ni si Josua, ai marsibursibur do nasida, ala so tarsunat nasida di tongan dalan.

5:8 Jadi dung impi sandok bangso i disunat, tading ma nasida di inganannasida di parsaroan i, paima malum dihilala nasida.

5:9 Dung i ninna Jahowa ma tu si Josua: Sadarion Ahu manggulangi haurahon Misir sian hamu, gabe targoar ma inganan i Gilgal rasirasa sadarion.

5:10 Jadi di na marsaro i halak Israel di Gilgal, marulaon Paska ma nasida di ari sampulu opat di bulan i mareak botari di adaran Jeriko.

5:11 Jadi marsogot ni dung marulaon Paska i, dipangan nasida ma gogo ni tano i, i ma sagusagu angka na so niigaran dohot eme na binoltok di ari na sasada i.

5:12 Jadi mansohot ma Manna i, marsogotna i dung dipangan nasida gogo ni tano i, gabe ndang adong be Manna di halak Israel, jadi dipangan nasida ma gogo ni tano Kanaan di na sataon i.

5:13 Alai mandapothon huta Jeriko si Josua, manaili ma ibana manatap humaliang, gabe diida ma sada halak jongjong di jolona patioptiop podang na niumpat di bagasan tanganna. Jadi didapothon si Josua ma ibana, didok ma tu ibana: Dongan do Ho, manang alo?

5:14 Jadi didok Ibana ma: Ndangana, partogi ni parangan ni Jahowa do Ahu, apala ipe Ahu ro. Jadi manungkap ma si Josua tu tano, jala marsomba, jala didok ma tu Ibana: Aha do dohonon ni Tuhanku tu naposona?

5:15 Jadi didok partogi ni parangan ni Jahowa ma tu si Josua: Tanggali ma sipatum sian patmu, ai na badia do tano hajongjonganmon. Jadi dibahen si Josua ma songon i.

6:1 Alai tarhinsu situtu do pargumbangan ni huta Jeriko didapot halak Israel, ndang tarbahen ruar manang bongot manang ise.

6:2 Dung i ninna Jahowa ma tu si Josua: Ida ma, nunga hupasahat tu tanganmu huta Jeriko dohot rajana, ro di sude sialo musu.

6:3 Dibahen i halianganmuna ma huta i, nasa sialo musu mangkaliangi huta i sahali, songon i do bahenonmu onom ari on lelengna.

6:4 Jala usungon ni pitu malim ma na pitu sarune ni taon parolopolopon manguluhon poti i; alai papituarihon, ingkon pitu hali halianganmuna huta i, jala paluon ni angka malim i angka sarune i.

6:5 Jadi ia lambat mangkuling sarune parolopolopon i, jala dibege hamu suara ni sarune i, marsurak toletole ma sandok bangso i, jadi angka gargar ma parik ni huta i, jala panaehon ni bangso i ma, martahop tu jolona be.

6:6 Jadi dijou si Josua, anak ni si Nun, angka malim, jala didok tu nasida: Usung hamu ma poti parpadanan i! Jala pitu malim mangusung na pitu sarune parolopolopon i manguluhon poti ni Jahowa.

6:7 Didok ma dohot tu bangso i: Laho ma hamu, jala haliangi hamu huta i, jala saparduan na marsinjata manguluhon poti ni Jahowa.

6:8 Jadi dung songon i didok si Josua tu bangso i, mardalan ma na pitu malim, angka na mangusung na pitu sarune parolopolopon i di jolo ni Jahowa, jala dipalu angka sarune i, jala mangihut tu nasida do poti parpadanan ni Jahowa.

6:9 Jadi diuluhon na saparduaan na marsinjata i ma malim angka na umpalu sarunena be, jala mangihut tu poti i do angka situan na torop, mardalan ma nasida huhut umpalu angka sarune.

6:10 Alai nunga martona hian si Josua tu bangso i, songon on: Unang marsuraksurak hamu, jala unang tarbege suaramuna, jala ndang jadi ruar nanggo sada hata sian pamanganmuna, paima jumpang ari pandohanki tu hamu: Marsuraksurak ma hamu! Disi pe asa marsurak hamu.

6:11 Jadi dihaliangi poti ni Jahowa ma huta i sahali humaliang, gabe sahat ma nasida muse tu parsaroan, laos marborngin di parsaroan i.

6:12 Dung i dipasogot si Josua ma hehe manogotna i, jala diusung angka malim poti ni Jahowa.

6:13 Jala na pitu malim, angka na mangusung na pitu sarune parolopolopon i, manguluhon poti ni Jahowa, sai mardalani do nasida huhut umpalu sarune, jala na saparduaan na marsinjata i manguluhon nasida, alai mangihut tu poti ni Jahowa ianggo situan na torop; sai mardalani nasida huhut umpalu angka sarune.

6:14 Paduaarihon pe dihaliangi nasida do huta i sahali, dung i mulak nasida tu parsaroan. Songon i dibahen nasida padohot onom ari.

6:15 Alai anggo papituarihon, dipasogot nasida ma hehe, di hananaek ni sibalik hunik, jala dihaliangi nasida huta i, songon na somal pitu hali; holan di ari na sasada i pitu hali dihaliangi nasida huta i.

6:16 Tole papituhalihon, dung dipalu angka malim sarunena be, didok si Josua ma tu bangso i: Marsurak ma hamu, ai nunga dilehon Jahowa huta i tu hamu.

6:17 Alai ingkon harom bahenon huta i; ro di sude na di bagasan di Jahowa; holan si Rahab sibabijalang i pangoluon, ibana ro di sude na rap dohot ibana di jabu; ai dibunihon do angka suruan na itasuru.

6:18 Alai ramoti hamu dirimuna maradophon na hona harom i, asa unang tarharom hamu, molo adong dibuat hamu sian na hona harom i, gabe hona harom maon parsaroan ni Israel bahenonmuna mambahen marhinamago.

6:19 Alai nasa perak dohot sere, ro di ulaula sian tombaga dohot bosi, parbadiaan ma i di Jahowa, pamasuhon ma i tu bilut parugasanan ni Jahowa.

6:20 Jadi marsuraksurak ma bangso i, jala dipalu angka malim sarunena be. Jadi dung dibege bangso i suara ni sarune, dipangiar be ma suarana, marsuraksurak, gabe magargar ma parik i, jala dipanaek na torop i ma huta i martahop be tu jolona, gabe ditaban nasida huta i.

6:21 Jadi diharomhon nasida nasa na di huta i, nang baoa ro di inaina, nang dakdanak ro di na ubanon, ro di lombu, birubiru dohot halode ditampuli dohot podang.

6:22 Alai tu na dua halak, angka na mangkahapi tano i didok si Josua: Bongot i hamu ma bagas ni boruboru sibabijalang i, jala togihon hamu ruar sian i boruboru i, ro di sude na di ibana, songon na niuarihonmuna tu ibana.

6:23 Jadi bongot ma dolidoli pangkahap na dua i, jala ditogihon ruar si Rahab dohot amana dohot inana dohot angka ibotona, ro di nasa na di ibana dohot sandok pinompar ni ompuna, jala dipaulon nasida di balian parsaroan ni Israel.

6:24 Alai anggo huta i disoksohi nasida dohot api ro di nasa na di bagasan; holan perak dohot sere, ro di ulaula sian tombaga dohot bosi tu bilut parugasanan di bagas ni Jahowa dibahen nasida.

6:25 Alai anggo si Rahab, sibabijalang i dohot pinompar ni amana, ro di nasa na di ibana, dipangolu si Josua do; laos maringan di tongatonga ni Israel do ibana rasirasa sadarion, ala dibunihon ibana angka suruan, na sinuru ni si Josua laho mangkahapi Jeriko.

6:26 Dung i maruari ma si Josua uju i, didok ma: Ingkon ripur baoa na hehe sogot, pauli huta Jeriko on bahenon ni Jahowa! Anak buhabajuna ma ali ni ojahanna, jala siampudanna ali ni pargumbangan pinajokna i.

6:27 Jadi sai didongani Jahowa do si Josua, jala tarbarita ibana di sandok tano i.

7:1 Alai mangalaosi situtu do halak Israel di ugasan na hona harom; ai adong do dibuat si Agan, anak ni si Karmi, tubu ni si Sabdi, anak ni si Jara sian marga Juda, sian ugasan na hona harom. Jadi marpiarpiar ma rimas ni Jahowa tu halak Israel.

7:2 Dung i disuru si Josua ma angka baoa sian Jeriko tu Ai mardonokkon Bet Apen, tungkan habinsaran ni Betel, jala didok ma tu nasida songon on: Nangkok ma hamu, jala hahapi hamu ma tano i. Jadi nangkok ma angka baoa i, jala dihahapi nasida huta Ai.

7:3 Jadi dung mulak nasida tu si Josua, didok nasida ma tu ibana: Unang pola sandok bangso i nangkok! Arga dua ribu manang tolu ribu halak pe nasida nangkok, jala papatu Ai, unang pola sandok bangso i loja tusi, ai na otik do nasida.

7:4 Jadi arga tolu ribu halak sian bangso i nangkok tusi, hape maporus do nasida maradophon isi ni Ai.

7:5 Jala dibunu isi ni Ai arga tolupulu onom halak sian nasida, jala dilele nasida, olat ni harbangan ni huta i sahat ro di Sebarim, jala dibunui nasida di robean. Jadi malala ma ateate ni bangso i manjadi hira aek.

7:6 Dung i diribahi si Josua ma angka ulosna, jala manungkap ibana tu tano, di jolo ni poti ni Jahowa ro di botari, ibana dohot angka sintua ni Israel, jala dibahen be sirabun tu uluna.

7:7 Dung i ninna si Josua ma: Iale Tuhan Jahowa, boasa tung patariparonmu bangso on sian Jordan i laho mangalehon hami tu tangan ni halak Amori, asa mangago hami? Tung so tading hami nian di bariba ni Jordan!

7:8 Iale Tuhan, aha nama dohononku, dung mundur halak Israel dibahen angka musuna?

7:9 Begeon ni halak Kanaan i dohot sandok isi ni tano on ma barita i, jadi haliangannasida ma hami, jala siaphononna goarnami sian tano on, jadi aha ma bahenonmu humongkop Goarmi na timbul i?

7:10 Dung i ninna Jahowa ma tu si Josua: Hehe ma ho! Boasa tung sai manungkap ho?

7:11 Nunga mardosa Israel, jala dilaosi nasida huhut padan na hutonahon i tu nasida, dibuat nasida huhut sian ugasan na hona harom i, jala manangko nasida, huhut mamorso, lam dibahen do tu tongatonga ni ulaulanasida.

7:12 Dibahen i ndang tarbahen Israel jongjong maradophon musunasida i, sai na maporus nama nasida maradophon musunasida, ai tarharom nasida. Ndang be dongananku hamu, molo so diago hamu na tarharom i sian tongatongamuna.

7:13 Hehe ma ho, urasi ma bangso on, jala dok ma: Urasi hamu ma dirimuna tu marsogot! Ai songon on do didok Jahowa, Debata ni Israel: Adong do jolma siharomon di tongatongamu, ale Israel! Ndang tarbahen ho jongjong moradophon musum, paima dipaholang hamu jolma siharomon i sian tongatongamuna.

7:14 Ro be ma hamu manogot mangihuthon margamuna, jala ia marga na tinudu ni Jahowa ro be marompuompu, jala ompu na tinudu ni Jahowa ro be marsasaama, jala ama na tinudu ni Jahowa ro be marsasahalak baoa.

7:15 Jala baoa na tinudu i siharomon, soksohan ma ibana di bagasan api, ro di sude na di ibana i, ala na nilaosanna i padan ni Jahowa, jala ala na binahenna haurahon di Israel.

7:16 Jadi dipasogot si Josua ma hehe manogotna i, jala didokkon ro be halak Israel marmargamarga, gabe tartudu ma marga Juda.

7:17 Dung i didokkon ro be angka ompu ni Juda, gabe tartudu ma ompu Jara, dung i didokkon ma ro be pinompar ni ompu Jara marsasaama, gabe tartudu ma si Sabdi.

7:18 Dung i didokkon ma ro be pinomparna marsasahalak, gabe tartudu ma si Agan, anak ni si Karmi, anak ni si Sabdi, anak ni si Jara sian marga Juda.

7:19 Dung i didok si Josua ma tu si Agan: Ale anaha, sai pasangap ma Jahowa, Debata ni Israel, jala lehon ma pujipujian tu Ibana, topoti tu Ibana, jala paboa tu ahu manang aha na binahenmi, unang porso tu ahu.

7:20 Jadi didok si Agan ma mangalusi si Josua: Tongon do tahe, nunga mardosa ahu tu Jahowa, Debata ni Israel, jala songon on do na hubahen i.

7:21 Huida di tongatonga ni tabantaban sada baju Babel na uli dohot dua ratus rupia dohot ponding sere sada, limapulu hati dokdokna, gabe impol matangku disi, laos hubuat; jala ida ma, tartanom do i di tombara, di tongatonga ni undungundungku, jala perak i di toruna.

7:22 Dung i disuru si Josua ma angka suruan, gabe marlojong ma nasida tu undungundung i, jala ida ma, tartanom do i di undungundungna, jala perak i di toruna.

7:23 Dung i dibuat nasida ma i sian tongatonga ni undungundung i, jala diboan tu si Josua dohot tu sandok halak Israel, jala dipeakkon di jolo ni Jahowa.

7:24 Jadi diboan si Josua ma si Agan, anak ni si Jara dohot perak i dohot baju i dohot ponding sere i, ro di angka anakna dohot boruna, ro di lombu dohot halodena dohot birubiruna, ro di undungundungna dohot nasa na di ibana, jala sandok Israel donganna manogihon nasida nangkok tu rura Akor.

7:25 Dung i didok si Josua ma, ala mago hami dibahen ho, agoon ni Jahowa ma ho di ari sadarion, jadi sandok halak Israel, mandangguri ibana mate dohot batu, jala disoksohi nasida di bagasan api, jala ditimbuni batu di nasida.

7:26 Jadi dipatindang di atas ibana sada timbunan batu bolon rasirasa sadarion. Jadi marpangulahi ma roha ni Jahowa sian parpiarpiar ni rimasna. Ala ni dibahen halak goar ni inganan i rura Akor rasirasa sadarion.

8:1 Dung i didok Jahowa ma tu si Josua: Unang ho mabiar, jala unang tahuton! Arahon ma sandok sialo musu, jala borhat ma ho nangkok dompak Ai. Ida ma, nunga hupasahat tu tanganmu raja ni Ai dohot bangsona, ro di hutana dohot tanona.

ᯑᯮᯰ ᯤ ᯑᯪᯑᯂᯬ᯲ ᯐᯂᯬᯋ ᯔ ᯖᯮ ᯘᯪ ᯐᯬᯘᯮᯀ: ᯥᯉᯰ ᯂᯬ ᯔᯅᯪᯀᯒ᯲, ᯐᯞ ᯥᯉᯰ ᯖᯂᯮᯖᯉᯬ᯲! ᯀᯒᯂᯉᯬ᯲ ᯔ ᯘᯉ᯲ᯑᯂᯬ᯲ ᯘᯪᯀᯞᯬ ᯔᯮᯘᯮ, ᯐᯞ ᯅᯒᯬ᯲ᯂᯖ᯲ ᯔ ᯂᯬ ᯉᯰᯂᯂᯬ᯲ ᯑᯔᯬ᯲ᯇᯂ᯲ ᯀᯤ? ᯤᯑ ᯔ ᯉᯮᯝ ᯂᯮᯇᯘᯂᯖ᯲ ᯖᯮ ᯖᯝᯉ᯲ᯔᯮ ᯒᯐ ᯉᯪ ᯀᯤ ᯑᯬᯂᯖ᯲ ᯅᯰᯘᯬᯉ, ᯒᯬᯑᯪ ᯂᯮᯖᯉ ᯑᯬᯂᯖᯬ᯲ ᯖᯉᯬᯉ.

8:2 Jala bahenonmu do tu Ai dohot tu rajana, songon na binahenmi tu Jeriko dohot tu rajana; holan tabantabanna dohot pinahanna, jadi do bagionmuna di hamu; alai bahen ma paronggopan sada di pudi ni huta i.

8:3 Jadi borhat ma si Josua dohot sandok sialo musu laho nangkok tu Ai; jala dipillit si Josua ma tolupulu ribu halak, angka na begu marmusu, jala disuru nasida bornginna i.

8:4 Jala ditonai ma nasida songon on: Monggop ma hamu tu pudi ni huta i; alai unang maholangku hamu sian huta i, jala managam ma saluhut hamu.

8:5 Alai anggo ahu dohot sandok bangso na rap dohot ahu, dapothononnami ma huta i. Jadi molo ruar nasida manjumpangkon hami, songon na parjolo i, maporus ma hami maradophon nasida.

8:6 Jadi ruar ma nasida mangeahi hami, paima husirang hami nasida sian huta i; ai dohononnasida ma: Maporus do nasida maradophon hita songon parjolo i. Jala di na maporus i hami maradophon nasida.

8:7 Hehe ma ianggo hamu sian paronggopan, jala manoluk huta i; ai lehonon ni Jahowa Debatamuna ma huta i tu bagasan tanganmuna.

8:8 Jala ia dung ditaban hamu huta i, surbuonmuna ma huta i dohot api; hombar tu hata ni Jahowa ma bahenonmuna. Ida ma, ahu do manonahon i tu hamu.

8:9 Jadi disuru si Josua ma nasida, gabe laho nasida tu paronggopan i, jala monggop nasida diholangkolang ni Betel dohot Ai, tungkan hasundutan sian Ai, laos marborngin anggo si Josua di na saborngin i di tongatonga ni bangso i.

8:10 Dung i manogotna i dipasogot si Josua ma parentahon angka parangan i, jala nangkok ibana dohot angka sintua ni Israel manguluhon angka parangan i tu Ai.

8:11 Jala sandok sialo musu na rap dohot ibana, nangkok do tolhas ro di tondong ni huta i, jala marsaro nasida tungkan utara sian Ai, holan rura sada holangholangna sian Ai.

8:12 Dung i dibuat ibana ma arga lima ribu halak, jala didokkon nasida monggop di holangholang ni Betel dohot Ai, tungkan hasundutan ni huta i.

8:13 Dung i dipaodor nasida ma parangan ni sandok parsaroan i na tungkan utara ni huta i, dohot angka na monggop i tungkan hasundutan ni huta i. Jadi mardalan ma si Josua di na saborngin i tu tongatonga ni rura i.

8:14 Jadi dung diida raja ni Ai songon i, humalaput ma nasida, dipasogot angka baoa ni huta i ma ruar manjumpangkon Israel laho martongtang, rajai dohot sandok naposona tu tongtangan na tiniti di jolo ni adaran, ai ndang diboto ibana naung adong monggop musuna di pudi ni huta i.

8:15 Jadi lumindak ma si Josua dohot sandok Israel maradophon nasida, jala maporus sian dalan tu halongonan.

8:16 Dung i satingting ma sandok pangisi ni huta i mangeahi, jala dieahi nasida si Josua, gabe sirang nasida sian huta i.

8:17 Jala ndang adong tading nanggo sahalak di Ai dohot di Betel, na so ruar mangeahi Israel, jala talak huta i ditadingkon nasida laho mangeak Israel.

8:18 Dung i didok Jahowa ma tu si Josua: Paunjur ma hujur na di tanganmi dompak Ai; ai nunga hupasahat tu tanganmu huta i. Jadi dipaunjur si Josua ma hujurna di bagasan tanganna dompak huta i.

8:19 Jadi hapogan ma angka na monggop i hehe sian ingananna, jala marlojong nasida, dung dipatoltol ibana tanganna, gabe masuk ma nasida tu huta i, jala ditaban, disiluhon nasida manurbu huta i.

8:20 Dung i humusor ma angka baoa sian Ai dompak pudi, gabe diida nasida ma martimpul timus ni huta i dompak langit, jala ndang adong be gogonasida maporus manang dompak dia; jala bangso na maporus dompak halongonan mulak muse mangalo dompak pangeahi.

8:21 Alai dung diida si Josua dohot sandok Israel naung ditaban angka na monggop i huta i, jala naung martimpul timus ni huta i, mulak nasida, jala dibunu nasida sude angka baoa sian Ai.

8:22 Ruar ma dohot angka nasida sian huta i manjumpangkon nasida, jadi dihapit Israel i ma nasida tuk humaliang, jala dibunui nasida, paima soadong tading sian nasida nanggo sahalak maporus manang malua.

8:23 Dung i ditangkup nasida ma raja ni Ai songon i mangolu, jala diboan ibana tu si Josua.

8:24 Jadi dung siap dibunu Israel sandok isi ni Ai angka na di adaran na di halongonan, haporusanna nilelenasida i, jala ditampuli nasida saluhutna dohot podang sun siap, gabe mulak ma sandok Israel tu Ai, jala ditampuli pangisina i.

8:25 Jadi sude angka na rage di na sadari i sian baoa ro di boruboru, sampulu dua ribu ma sude isi ni huta Ai.

8:26 Alai ndang dipasuang si Josua tanganna, na pinaunjurna i hujur i, paima sun siap sude isi ni Ai.

8:27 Holan pinahan dohot taban sian huta i dibagi halak Israel di nasida, hombar tu hata ni Jahowa na tinonahonna tu si Josua.

8:28 Jadi disurbu si Josua ma Ai, jala dibahen parturanggongan tarulang salelenglelengna rasirasa sadarion.

8:29 Ianggo raja ni Ai digantung do tu hau sahat ro di botari. Alai manihir mata ni ari, didokkon si Josua ma paijuron bangkena i sian hau, jala ditimpalhon nasida ma i tu baba pintu ni harbangan ni huta i, jala dipatindang di atasna sada tambak bolon sian batu rasirasa sadarion.

8:30 Uju i ma dipauli si Josua sada langgatan di Jahowa, Debata ni Israel di atas dolok Ebal.

8:31 Songon na tinonahon ni si Musa, naposo ni Jahowa tu halak Israel, songon na tarsurat di bagasan buku patik ni si Musa, sada langgatan sian batu angka na sobinarbar, na so hona bosi, gabe dipelehon ma di ginjangna angka pelean situtungon tu Jahowa, jala dipelehon angka pelean hamauliateon.

8:32 Dung i diuhirhon ibana ma disi tu angka batu i manduai patik ni si Musa, na tarsurat di adopan ni halak Israel.

8:33 Jadi sandok Israel dohot angka sintuana ro di angka partogi dohot panguhum jongjong angkupangkup di lambung ni poti di adopan ni angka malim dohot halak Lepi, angka na mangusung poti parpadanan ni Jahowa, songon i parripe, songon i raja huta satonga di robean ni dolok Gerizim, na satonganari di robean ni dolok Ebal, songon na tinonahon ni si Musa, naposo ni Jahowa hian laho mamasumasu bangso Israel na jolo.

8:34 Dung songon i, dijaha ibana ma saluhut hata ni patik i, pasupasu i dohot torutoru i, sude songon na tarsurat di bagasan buku patik.

8:35 Ndang adong nanggo sada hata sian saluhut hata ni tinonahon ni si Musa, na so jinaha ni si Josua di adopan ni sandok luhutan Israel, ro di angka inaina dohot dakdanak dohot halak dagang na manompang di tongatonganasida.

9:1 Jadi dung sar barita i dibege sude raja, angka na di bariba ni Jordan, di dolok dohot di pea dohot di sandok pasir ni laut bolon, tondong ni Libanon, i ma halak Het, Amori, Kanaan, Perisi, Hevi dohot Jebusi.

9:2 Jadi marluhut ma nasida, marsatahi laho marmusu dompak si Josua dohot dompak Israel.

9:3 Alai anggo pangisi ni Gibeon, dung dibege na binahen ni si Josua tu Jeriko dohot tu Ai.

9:4 Dohot ma nasida mambahen angkal, laho ma nasida masibohal, dibuat nasida ma pardahanonan, angka na buruk, dihuli angka halode nasida dohot isian anggur angka na basebasean, jala na maribak, jala na nirahutan.

9:5 Dohot sipatu angka na buruk, jala na nidungkapan di patnasida, jala dialithon angka ulos na buruk tu nasida, jala nasa sagusagu bohalnasida i pe, pir do jala lapuhon.

9:6 Dung i laho ma nasida mandapothon si Josua tu parsaroan di Gilgal, jala didok ma tu ibana dohot tu halak Israel: Na ro sian tano na dao do hami, on pe bahen hamu ma parjanjian tu hami.

9:7 Dung i didok halak Israel ma tu halak Hevi: Atik tung di tongatonganami do ho maringan, beha ma pambahennami umpungka parjanjian tu hamu?

9:8 Alai ninna angka nasida ma tu si Josua: Naposom nama hami on! Jadi didok si Josua ma tu nasida: Ise hamu, jala sian dia hamu ro?

9:9 Dung i didok nasida ma tu ibana: Na ro sian tano na dao situtu do hami angka naposomon, ala ni barita ni Jahowa Debatamu; ai hubege hami baritana dohot sude na binahenna di Misir.

9:10 Ro di sude na binahenna tu na dua raja ni halak Amori, na di bariba ni Jordan, tu Sihon, raja ni Hesbon dohot tu Og, raja di Basan, na maringan di Astarot.

9:11 Jadi didok angka sintuanami dohot sude isi ni tanonami tu hami, songon on: Boan hamu ma bohal di dalan, jala laho ma hamu manjumpangkon nasida, jala dok hamu ma tu nasida: Naposomuna do hami on, on pe sai pungka hamu ma parjanjian tu hami!

9:12 Rotinamion, las dope huboan hami sian jabunami bahen bohalnami di ari haboborhatnami laho tu hamu on; alai anggo nuaeng, ida ma, nunga pola pir jala lapuhon.

9:13 Jala isian ni anggurnami on, angka na hugoki hami imbaru dope, hape ida ma, nunga pola maribak, jala angka ulosnami on dohot sipatunami on, nunga pola buruk dibahen pardalanan na dao situtu.

9:14 Jadi dijalo angka baoa i ma sian bohalnasida, alai ndang jolo disungkunhon nasida tu Jahowa.

9:15 Jadi dibahen si Josua ma pardemahan tu nasida, jala dipungka parjanjian tu nasida, pangoluonna nasida didok, pola diuarihon angka induk ni luhutan i tu nasida.

9:16 Alai salpu tolu ari, dung dipungka parjanjian i tu nasida, dibege nasida ma jonok do hape nasida di lambungna, jala maringan di tongatonganasida.

9:17 Dung i borhat ma halak Israel, gabe sahat ma nasida tu hutanasida patoluarihon; angka hutanasida ondo: Gibeon, Kepira, Beerot dohot Kiriat Jearim.

9:18 Jadi ndang dibunu halak Israel nasida, ala naung dimangmangkon angka induk ni luhutan i tu Jahowa, Debata ni Israel di nasida. Jadi marmungutmungut ma sandok luhutan i dompak angka induk i.

9:19 Jadi didok sude angka induk i tu sandok luhutan i: Nunga pola huuarihon hami di nasida tu Jahowa, Debata ni Israel, dibahen i ndang tarbahen hita mangkahua nasida.

9:20 Alai on ma tabahen tu nasida, tapangolu nasida, asa unang ro rimas manginona tu hita ala ni uawari, na huuarihon hami tu nasida.

9:21 Jadi didok angka induk i ma tu nasida: Loas mangolu nasida, asa angka parsoban jala partuaek nasida di sandok luhutan i, songon na nidok ni angka induk i tu nasida.

9:22 Jadi dijou si Josua ma nasida, jala didok tu nasida songon on: Boasa tung paotootoonmuna hami, mandok: Na holang situtu do hami sian hamu, hape maringan di tongatonganami do hamu?

9:23 On pe sitoruan ma hamu, ndang be mansohot sian hamu gabe hatoban dohot parsoban dohot partuaek di bagas ni Debata.

9:24 Jadi didok angka nasida ma mangalusi si Josua: Tangkas do tarbortik tu angka naposomon, na tinonahon ni Jahowa Debatam tu si Musa, naposona, lehononna tu hamu sandok tano on, jala siaphononmu sude isi ni tano on maradophon hamu; jadi mabiar situtu hami taringot tu hosanami maradophon hamu, gabe hubahen hami songon i.

9:25 On pe, ida ma, guru dokmu do hami; na denggan jala na tigor di roham bahenonmu tu hami, i ma bahen.

9:26 Jadi dibahen ma songon on tu nasida, dipalua nasida sian tangan ni halak Israel, asa unang nasida dibunu.

9:27 Jadi dibahen si Josua ma nasida di ari na sasada i, gabe parsoban dohot partuaek di luhutan i dohot di langgatan ni Jahowa, rasirasa sadarion tu inganan sipillitonna.

10:1 Alai dung dibege si Adonizedek, raja sian Jerusalem, naung ditaban si Josua huta Ai, jala disiaphon, songon na binahenna i tu Jeriko dohot tu rajana, laos songon i dibahen tu Ai dohot tu rajana, jala naung mardemak i isi ni Gibeon tu Israel, laos maringan di tongatonganasida.

10:2 Jadi mabiar situtu ma nasida, ai huta na bolon do Gibeon i, sobokkon sada sian angka huta hundulan ni harajaon, jala umbalga huta i sian Ai, jala angka na begu sude baoa isi ni huta i.

10:3 Dibahen i marhara ma si Adonizedek, raja sian Jerusalem tu si Hoham, raja sian Hebron dohot tu si Piram, raja sian Jarmut, dohot tu si Japia, raja sian Lakis, dohot si Debir, raja sian Eglon, didok ma:

10:4 Nangkok ma hamu mandapothon ahu, jala urupi hamu ma ahu, asa itapapatu Gibeon, ai nunga mardemak nasida tu si Josua dohot tu halak Israel.

10:5 Jadi marpungu ma, jala nangkok na lima raja ni halak Amori, i ma raja sian Jerusalem, raja sian Hebron, raja sian Jarmut, raja sian Lakis, raja sian Eglon, nasida rap dohot sude parduan ni parangannasida, gabe marsaro nasida tondong ni Gibeon, laos marmusu dompak huta i.

10:6 Dung i disuru angka baoa sian Gibeon ma suruanna tu si Josua, tu parsaroan ni Gilgal, angka didok nasida ma: Unang tallushon tanganmi sian hami angka naposom, haru tibu ma ho nangkok mandapothon hami, paluahon dohot urupi hami; ai nunga marpungu dompak hami sude raja ni halak Amori, angka na maringan di dolok.

10:7 Jadi nangkok ma si Josua sian Gilgal, ibana dohot sandok sialo musu donganna, ro di sude angka na begu marmusu.

10:8 Dung i didok Jahowa ma tu si Josua: Unang ho mabiar mida nasida, ai nunga hupasahat nasida tu tanganmu; ndang adong na pang manang ise sian nasida mandopang ho.

10:9 Jadi dirampok si Josua ma nasida; manipat sabornginna i mardalan nasida nangkok sian Gilgal.

10:10 Jadi disonggoti Jahowa ma nasida maradophon Israel, marragean situtu ma nasida di Gibeon, jala dieak nasida di dalan tungkan robean sian Bethoron, jala dilotong nasida sahat ro di Azeka, sahat ro di Makkedah.

10:11 Jadi di na maporus i nasida maradophon Israel, jala dituatan sian Bethoron nasida, gabe ditinggangkon Jahowa ma tu nasida angka batu bolon sian banua ginjang sahat ro di Azeka, gabe marmatean nasida; tumorop do nasida mate dibahen angka batu ambolas, sian na dibunu halak Israel marhitehite podang.

10:12 Uju i ma didok si Josua tu Jahowa, di ari pangalehonan ni Jahowa di halak Amori tu halak Israel, jala didok ma di adopan ni Israel: Sulon ma ho mata ni ari di Gibeon, jala ho bulan di rura Aialon.

10:13 Jadi sulon ma mata ni ari i, jala so bulan i, paima martubol bangso i tu musuna. Nda tarsurat do i di bagasan buku ni partigor? Jadi so ma mata ni ari di parsitongaan ni langit, jala ndang humalaput laho sundut, hira manipat sadarina i.

10:14 Jala ndang adong sobokkon ari na sasada i na sai laon dohot tu pudina on, tung ditangihon Jahowa do suara ni sada halak ai Jahowa do marporang humongkop Israel.

10:15 Dung i mulak ma si Josua dohot sandok Israel donganna i tu parsaroan di Gilgal.

10:16 Alai nunga maporus anggo raja na lima i, jala martabuni nasida tu bagasan liang di Makkedah.

10:17 Jadi tarbortik ma tu si Josua songon on: Nunga jumpang raja na lima i, angka martabuni do nasida di bagasan liang di Makkedah.

10:18 Jadi didok si Josua ma: Antong gulang hamu ma angka batu bolon tu baba ni liang i, jala dokkon hamu angka baoa tusi, jumaga nasida.

10:19 Alai unang togang anggo hamu, lele hamu ma musumuna, jala bunu hamu ma parpudinasida, unang loas hamu nasida bongot tu hutanasida i, ai nunga dipasahat Jahowa Debatamuna nasida tu tanganmuna.

10:20 Jadi dung rendep nasida dibahen si Josua dohot dibahen halak Israel martongtang bolon situtu; alai adong deba malua, angka na maporus i sian nasida, sanga bongot tu angka huta na gonting.

10:21 Jadi mulak ma sandok bangso i tu parsaroan, tu si Josua di Makkedah mardamedame, ndang adong na hum manang ise pahurehure dilana dompak manang ise sian halak Israel.

10:22 Dung i didok si Josua ma: Ungkap hamu ma baba ni liang i, jala togihon hamu ruar sian liang i raja na lima i mamboan tu ahu.

10:23 Jadi dibahen nasida ma songon i, ditogihon ma ruar sian liang i tu ibana na lima rajai: Raja sian Jerusalem, raja sian Hebron, raja sian Jarmut, raja sian Lakis dohot raja sian Eglon.

10:24 Jadi dung ruar ditogihon nasida angka rajai tu si Josua, dipaluhut si Josua ma sude baoa ni Israel, jala didok ma tu angka partogi ni parangan, angka na borhat rap dohot ibana: Ro ma hamu tuson, bahen hamu ma patmuna tu tangkuhuk ni angka rajai! Jadi jumonok ma nasida, jala dibahen be patna tu tangkuhuknasida i.

10:25 Dung i didok si Josua ma tu nasida: Unang hamu mabiar, jala unang tahuton hamu; pir ma tondimuna jala marsihohot; ai songon i do bahenon ni Jahowa tu saluhut musumuna, angka siporangonmuna i.

10:26 Dung i dibunu si Josua ma nasida, jala digantung nasida tu lima hau, laos targantung ma nasida di angka hau i sahat ro di botari.

10:27 Alai marhira laho mate mata ni ari, didokkon si Josua ma paijuron nasida sian angka hau i, jala timpalhononhon nasida tu bagasan liang, partabunianasida na jolo, jala dibahennasida angka batu bolon tu baba ni liang i, angka na disi rasirasa sadarion.

10:28 Makkedah pe ditaban si Josua do di ari na sasada i, jala ditampuli pangisina i dohot podang, diharomhon dohot rajana ro di sude hosa na di bagasan huta i, ndang adong malua nanggo sada; jala dibahen do tu raja ni Makkedah, songon na binahenna i tu raja ni Jeriko.

10:29 Dung i borhat ma si Josua rap dohot sandok Israel sian Makkedah tu Libna, laho marporang dompak Libna.

10:30 Huta i pe dilehon Jahowa do tu tangan ni Israel, ro di rajana, jala ditampuli saluhut hosa na di bagasan huta i, jala ndang adong na malua nanggo sada, jala dibahen tu rajana, songon na binahenna i tu raja ni Jeriko.

10:31 Dung i borhat ma si Josua rap dohot sandok Israel sian Libna tu Lakis, jala ditungkum huta i, jala diporang.

10:32 Dung i dilehon Jahowa ma nang Lakis tu tangan ni Israel, gabe ditaban huta i paduaarihon, jala ditampuli sude hosa, angka na di bagasan huta i, sandok songon na binahenna i tu Libna.

10:33 Uju i ma nangkok si Horam, raja sian Gezer laho manogari Lakis; alai dipapatu si Josua do ibana ro di bangsona, paima soadong tading di ibana nanggo sada.

10:34 Dung i borhat ma si Josua rap dohot sandok Israel sian Lakis tu Eglon, jala ditungkum huta i, jala diporang.

10:35 Jadi ditaban nasida ma huta i di ari na sasada i, jala ditampuli sude hosa na di bagasan huta i, diharomhon ma di ari na sasada i, sandok songon na binahenna i tu Lakis.

10:36 Dung i nangkok ma si Josua rap dohot sandok Israel sian Eglon tu Hebron, jala diporang huta i.

10:37 Jadi ditaban nasida huta i, jala ditampuli pangisina ro di rajana dohot nasa hosa angka na di bagasan huta i, ndang adong tading nanggo sada, sandok songon na binahenna i tu Eglon, jala diharomhon huta i ro di sude hosa angka na di bagasan.

10:38 Dung i mulak ma si Josua rap dohot sandok Israel tu Debir, jala diporang huta i.

10:39 Jadi ditaban ma huta i ro di rajana dohot nasa hutana, ditampuli jala diharomhonnasida ma saluhut hosa angka na di bagasan huta i, ndang adong malua nanggo sada, songon na binahenna i tu Hebron, songon i ma dibahen tu Debir dohot tu rajana, jala songon na binahenna i tu Libna dohot tu rajana.

10:40 Asa dipapatu si Josua ma sandok tano i: Tor Juda dohot tano tungkan dangsina dohot tano pea i ro di angka tuatan rap dohot rajanasida sudena, ndang adong tading nanggo sada, diharomhon do saluhut na marhosa, songon na tinonahon ni Jahowa, Debata ni Israel.

10:41 Jadi dipapatu si Josua ma nasida, olat ni Kades-Barnea sahat ro di Gaza dohot sandok tano Gosen, jala sahat ro di Gibeon.

10:42 Jala sude angka rajai, ro di tanonasida, rap sahali ditaban si Josua do; ai Jahowa Debata ni Israel marporang humongkop Israel.

10:43 Dung i mulak ma si Josua rap dohot sandok Israel tu parsaroan na di Gilgal.

11:1 Alai dung dibege si Jabin, raja sian Hazor barita i, marhara ma ibana tu Jobab, raja sian Madon, dohot tu raja sian Simron, dohot tu raja sian Aksap.

11:2 Dohot tu raja, angka na tungkan utara, di dolok dohot di tano adaran, tungkan dangsina sian Kinerot dohot di tano pea dohot di angka luat Dor martopihon laut.

11:3 Tu halak Kanaan tungkan habinsaran dohot tungkan hasundutan, tu halak Amori, halak Het, halak Perisi, halak Jebusi, angka na di dolok dohot tu halak Hevi, tungkan bona ni Hermon di luat Mispa.

11:4 Jadi borhat ma nasida rap dohot sude parangannasida, bangso na bolon situtu, sobokkon horsik na di pasir ni laut toropna, tole hoda dohot hureta mansai torop.

11:5 Marluhut ma sude angka raja ondeng, jala ro rap marsaro mardonokkon tao Merom laho marmusu dompak Israel.

11:6 Jadi didok Jahowa ma tu si Josua: Unang ho mabiar maradophon nasida, ai marsogot songon on pasahatonku ma nasida luhut ragehonon ni halak Israel; tangkaonmu ma ianggo pat ni hodanasida, jala tutungonmu huretanasida dohot api.

11:7 Jadi dirampok si Josua rap dohot nasa paranganna nasida so pangkirimanna martopihon tao Merom.

11:8 Jadi dilehon Jahowa ma nasida tu tangan ni halak Israel, angka na manaluhon nasida, jala dilele sahat ro di Sidon na bolon, sahat ro di Misrepot-Maim, jala sahat ro di rura Mispa tungkan habinsaran, jala diragehon nasida paima soada tading sian nasida nanggo sahalak.

11:9 Jadi dibahen si Josua ma tu nasida songon na nidok ni Jahowa tu ibana, ditangka ma pat ni hodanasida, jala ditutung angka huretanasida dohot api.

11:10 Dung i mulak ma si Josua uju i, jala dipapatu Hazor, jala ditampuli rajana dohot podang, ai Hazor do nasailaon huta sabungan ni saluhut angka harajaon i.

11:11 Jala ditampuli sude jolma isi ni huta i, huhut harom dibahen, ndang adong tading nanggo sada na marhosa, jala disurbu Hazor dohot api.

11:12 Ro di sude huta ni angka raja ondeng dohot sude rajanasida i ditaban si Josua, jala ditampuli nasida dohot podang, huhut harom nasida dibahen, songon na tinonahon ni si Musa, naposo ni Jahowa.

11:13 Holan sude huta angka na ojak di buntulbuntul, ndang disurbu Israel, dungkon ni Hazor sambing disurbu si Josua.

11:14 Dung i dibagi halak Israel ma di nasida sandok tabantaban ni angka huta i, ro di pinahan; holan jolma i luhut ditampuli nasida, paima sun siap nasida, ndang adong tading na marhosa nanggo sada.

11:15 Songon na tinonahon ni Jahowa tu si Musa, naposona i, songon i do ditonahon si Musa tu si Josua, jala songon i do dibahen si Josua, ndang adong tading dibahen sian sude na tinonahon ni Jahowa tu si Musa, nanggo sada hata.

11:16 Jadi disoluk si Josua ma sandok tano i: Tano dolok dohot sandok tano tungkan dangsina ro di sandok tano Gosen, tano pea dohot adaran, ro di dolok Israel dohot angka rurana.

11:17 Olat ni tor saesae, na nangkok tungkan Seir sahat ro di Baal-Gad, di rura ni Libanon, marbonahon dolok Hermon, jala sude rajanasida i ditaban, jala dibunu nasida.

11:18 Alai nania leleng do si Josua marmusu dohot sude angka raja ondeng.

11:19 Ndang adong nanggo sada huta na mardemak tu halak Israel sian dengganna, dungkon ni halak Hevi, angka na maringan di Gibeon; saluhut huta i dibuat nasida marhite sian porang.

11:20 Ai sian Jahowa do tangkang ni rohanasida i laho marmusu dompak Israel, asa harom nasida, jala unang nasida jumpangan asi ni roha, asa tung siap nasida, songon na tinonahon ni Jahowa tu si Musa.

11:21 Uju i ma huhut ro si Josua mangaripurhon halak Enak sian tor, sian Hebron, sian Debir, sian Anab, sian sandok tor Juda dohot sian sandok tor Israel, jala harom nasida rap dohot hutanasida i dibahen si Josua.

11:22 Ndang adong tading halak Enak di tano ni halak Israel, holan di Gaza, di Gad dohot di Asdod adong tading nasida.

11:23 Jadi dipapatu si Josua ma nasa tano i, sandok hombar tu na nidok ni Jahowa tu si Musa, jala diparlehon si Josua tano i bahen partalian ni Israel, hombar tu sagisagiannasida marmargamarga. Dung i sohot ma hamusuon sian tano i.

12:1 Alai ondo raja ni tano i, angka na tinaluhon ni halak Israel, jala disoluk tanonasida di bariba ni Jordan, tungkan habinsaran, olat ni batang aek Arnon sahat ro di dolok Hermon dohot sandok adaran tungkan habinsaran.

12:2 I ma Sihon, raja ni halak Amori, na maringan di Hesbon, ia ginomgomanna olat ni Aroer na martopihon batang aek Arnon sahat ro di parsitongaan ni batang aek i, ro di satonga Gilead sahat ro di batang aek Jabok, parbalohan ni tano ni halak Amon.

12:3 Salpu adaran sahat tu tao Kinnerot tungkan habinsaran, jala sahat ro di laut ni rura i, i ma laut sira tungkan habinsaran, di dalan laho tu Betjesimot, jala di dangsina marbonahon angka tuatan ni Pisga.

12:4 Angkup ni luat ni si Og, raja sian Basan, sian pasipasi ni halak Repaim, angka na maringan di Astarot dohot Edrei.

12:5 Jala digomgomi dolok Hermon dohot Salka, ro di sandok Basan sahat tu parbalohan ni halak Gesur i dohot Maaka i dohot satonga Gilead, parbalohan ni tano ni Sihon, raja sian Hesbon.

12:6 Si Musa dope, naposo ni Jahowa rap dohot halak Israel manaluhon nasida, laos si Musa naposo ni Jahowa mangalehon tano i bahen partalian ni halak Ruben, Gad dohot satonga Manasse.

12:7 Alai ondo raja di tano i, angka na tinaluhon ni si Josua rap dohot halak Israel di bariba ni Jordan tungkan hasundutan, olat ni Baal-Gad na di rura ni Libanon, sahat ro di tor na saesae, laho nangkok tungkan Seir, jala dilehon si Josua tano i bahen partalian di angka marga ni Israel, mangihuthon sagisagiannasida.

12:8 Tano di dolok, di rura, di adaran, di angka tuatan, di halongonan dohot di tano tungkan dangsina: Halak Het, Amori, Kanaan, Perisi, Hevi dohot Jebusi.

12:9 Raja sian Jeriko sada, raja sian Ai, na tungkan lambung sian Betel sada.

12:10 Raja sian Jerusalem sada, raja sian Hebron sada.

12:11 Raja sian Jarmut sada, raja sian Lakis sada.

12:12 Raja sian Eglon sada, raja sian Gezer sada.

12:13 Raja sian Debir sada, raja sian Geder sada.

12:14 Raja sian Horma sada, raja sian Arad sada.

12:15 Raja sian Libna sada, raja sian Adullam sada.

12:16 Raja sian Makkedah sada, raja sian Betel sada.

12:17 Raja sian Tappua sada, raja sian Heper sada.

12:18 Raja sian Apek sada, raja sian Lasaron sada.

12:19 Raja sian Madon sada, raja sian Hazor sada.

12:20 Raja sian Simron-Meron sada, raja sian Aksap sada.

12:21 Raja sian Taanak sada, raja sian Megiddo sada.

12:22 Raja sian Kedes sada, raja sian Jokneam sada marbonahon Karmel.

12:23 Raja sian Dor, na di luat Dor sada, raja ni parbegu angka na di Gilgal sada.

12:24 Raja sian Tirza sada. Saluhut angka rajai tolupulu sada halak toropna.

13:1 Jadi dung sarimatua si Josua, didok Jahowa ma tu ibana: Nunga sarimatua ho, jala godang situtu dope tano i tading sipapatuon.

13:2 On do tano na tading i dope: Sandok parbalohan ni halak Palistim dohot sandok tano Gesur i.

13:3 Olat ni Sihor na mardalan di Misir sahat ro di parbalohan Ekron tungkan utara, na masuk etongan tu halak Kanaan: Na lima raja ni halak Palistim, raja sian Gaza, Asdod, Askelon, Gad dohot sian Ekron, ro di halak Awi.

13:4 Tungkan dangsina sandok tano ni halak Kanaan dohot Meara, na di halak Sidon, sahat ro di Apek, sahat tu parbalohan ni halak Amori.

13:5 Angkup ni tano ni halak Gebal i dohot sandok Libanon, tungkan habinsaran, olat ni Baal-Gad na marbonahon dolok Hermon, tolhas ro di Hamat.

13:6 Sude pangisi ni tor, olat ni Libanon sahat ro di Misrepot-Maim, sude halak Sidon, Ahu ma mangonjar nasida maradophon halak Israel. Rujirujihon sambing bahen partalian di Israel, songon na hutonahon i tu ho.

13:7 On pe bagihon ma tano on bahen partalian di na sia marga dohot di satonga marga Manasse.

13:8 Marga Manasse na satonganari rap dohot marga Ruben dohot Gad, nunga manjalo partalianna be, na nilehon ni si Musa tu nasida di bariba ni Jordan tungkan habinsaran, songon na nilehon ni si Musa, naposo ni Jahowa tu nasida.

13:9 Olat ni Aroer, na martopihon sunge Arnon dohot huta na di tongatonga ni sunge i, ro di sandok adaran Medeba sahat tu Dibon.

13:10 Dohot sude huta ni Sihon, raja ni halak Amori, na manggomgomi Hesbon sahat ro di parbalohan ni halak Amon.

13:11 Angkupni Gilead dohot tano ni halak Gesur i dohot Maaka i dohot sandok dolok Hermon dohot sandok Basan sahat tu Salka.

13:12 Sandok gomgoman ni Og di Basan, na manggomgomi Astarot dohot Edrei: Ibana do na tinggal sian pasipasi ni pinompar ni si Repaim, na pinapatu ni si Musa jala dionjar.

13:13 Alai ndang dionjar halak Israel anggo halak Gesur i dohot halak Maaka, maringan di tongatonga ni halak Israel do Gesur dohot Maaka rasirasa sadarion.

13:14 Holan tu marga Lepi ndang dilehon ibana partalian, angka pelean situtungon tu Jahowa, Debata ni Israel tahe partalianna, songon na pinarbagana i tu nasida.

13:15 Asa nunga dilehon si Musa hian partalian, anggo tu marga Ruben marsuhusuhu.

13:16 Ia parbalohannasida olat ni Aroer na martopihon sunge Arnon dohot huta na di parsitongaan ni sunge i, ro di sandok tano pea na di lambung ni Medeba.

13:17 Hesbon ro di sude hutana angka na di pea, Dibon dohot Bamot-Baal dohot Bet-Baal-Meon.

13:18 Jahaz, Kadermat dohot Mepaat.

13:19 Kiriataim, Sibma, Zeret Hasahar di atas dolok ni rura i.

13:20 Betpeor, angka tuatan ni Pisga dohot Betjesimot.

13:21 Dohot sude huta di tano pea, ro di sandok harajaon ni Sihon, raja ni halak Amori, na manggomgom di Hesbon, na pinapatu ni si Musa, ibana dohot angka induk sian Midian, i ma Evi, Rekem, Sur, Hur dohot Reba, angka raja wakil ni Sihon, angka na maringan di tano i.

13:22 Dohot Bileam, anak ni si Beor, pangarunding i dibunu halak Israel marhitehite podang, ro di dongannasida angka na tartiham.

13:23 Jadi parbalohan ni tano ni halak Ruben, batang aek Jordan do ro di tobingna. I ma partalian ni halak Ruben marsuhusuhu, angka huta dohot sosor.

13:24 Nunga dilehon si Musa hian anggo tu marga Gad, tu angka anak ni si Gad marsuhusuhu.

13:25 Ia parbalohannasida, i ma Jaser dohot sude huta di Gilead, dohot satonga ni tano ni halak Amon sahat ro di Aroer na di jolo ni Rabba.

13:26 Jala olat ni Hesbon sahat ro di Ramot-Mispa dohot Betonim, jala olat ni Mahanaim sahat ro di parbalohan ni Debir.

13:27 Dohot di rura Betharam, Betnimra, Sukot dohot Zapon, ebaeba sian harajaon ni Sihon, raja sian Hesbon, Jordan dohot tobingna, sahat ro di ujung ni tao Kinerot di bariba ni Jordan tungkan habinsaran.

13:28 I ma partalian ni halak Gad marsuhusuhu, angka huta dohot sosor.

13:29 Nunga dilehon si Musa hian partalian, nang tu satonga marga Manasse, gabe satonga Manasse nampunasa marsuhusuhu.

13:30 Jadi parbalohanna olat ni Mahanaim sandok Basan, saluhut harajaon ni si Og, raja sian Basan, dohot sude huta ni si Jair na di Basan, onompulu huta toropna.

13:31 Dohot satonga Gilead, Astarot, Edrei, angka huta ni harajaon ni si Og di Basan, dilehon tu angka anak ni si Mahir, anak ni si Manasse, tu anak ni si Mahir na satonga marsuhusuhu.

13:32 I ma na binagi ni si Musa di adaran ni Moab, di bariba ni Jordan, tondong ni Jeriko tungkan habinsaran.

13:33 Alai tu marga Lepi ndang adong partalian dilehon si Musa, Jahowa Debata ni Israel, Ibana do partaliannasida, songon na pinarbagana i tu nasida.

14:1 Alai on do partalian, angka na jinalo ni halak Israel di tano Kanaan, na binagihon ni malim Eleasar dohot Josua, anak ni si Nun dohot angka induk ni halak Israel marmargamarga.

14:2 Marhite sian rujiruji do dibagi partaliannasida, songon na tinonahon ni Jahowa marhitehite si Musa, lehonon tu na sia margai dohot tu satonga Manasse.

14:3 Ai nunga dilehon si Musa partalian ni na dua marga dohot na satonga i di bariba ni Jordan, alai tu halak Lepi, ndang adong dilehon partalian di tongatonganasida.

14:4 Ai angka anak ni si Josep manjadi dua marga, i ma Manasse dohot Epraim; dibahen i ndang dilehon nasida partalian anggo tu halak Lepi di tano i, dungkon ni angka huta bahen inganan dohot upa parik bahen panjampalan di pinahannasida dohot sinamotnasida.

14:5 Songon na tinonahon ni Jahowa tu Musa hian, songon i dibahen halak Israel, jala dibagi nasida tano i.

14:6 Dung i ro ma halak Juda mandapothon si Josua di Gilgal, gabe didok si Kaleb, anak ni si Jepune, marga Keni tu ibana: Diboto ho do hata na nidok ni Jahowa tu si Musa, naposo ni Debata, taringot tu ahu dohot taringot tu ho di Kades-Barnea.

14:7 Marumur opatpulu taon ma ahu, uju na sinuru ni si Musa, naposo ni Jahowa, ahu sian Kades-Barnea laho mangkahapi tano i, gabe mulak ahu mamboan barita tu ibana marguru tu panimbang ni rohangku.

14:8 Alai anggo donganku, angka na nangkok rap dohot ahu, mangganggui roha ni na torop i; alai anggo ahu sun do parsihohot ni rohangku, mangihuthon Jahowa, Debatangku.

14:9 Jadi maruari ma si Musa di ari na sasada i, songon on: Tano na nidalanan ni patmu, di ho ma i bahen partalian, ro di angka anakmu salelenglelengna, ala parsihohot ni roham di Jahowa, Debatangku.

14:10 On pe, ida ma, dipangolu Jahowa do ahu songon na nidokna i, na opatpulu lima taon on, olat ni dung didok Jahowa hata ondeng tu si Musa, saleleng mardalan Israel di halongonan; on pe, ida ma, ualupulu lima taon ahu sadarion.

14:11 Tong dope gogongku sadarion, songon uju di ari parsuru ni si Musa di ahu; songon gogongku uju i, laos songon i dope gogongku nuaeng, nang marporang, nang laho marmeang muli.

14:12 On pe sai lehon ma tu ahu tor on, na nidok ni Jahowa di ari na sasada i, ai dibege ho do uju i, halak Enak disi, jala huta angka na bolon dohot na gonting; anggiat didongani Jahowa ahu, asa huonjar nasida, songon na ni dok ni Jahowa.

14:13 Jadi dipasupasu si Josua ma ibana, jala dilehon Hebron tu si Kaleb, anak ni si Jepune bahen partalian.

14:14 Ala ni do gabe Hebron partalian ni si Kaleb, anak ni si Jepune, marga Keni rasirasa sadarion, ala parsihohot ni rohana di Jahowa, Debata ni Israel.

14:15 Alai goar ni Hebron di na robi Kiryat-Arba; jolma na bolon do ibana di halak Enak. Jadi sonang ma tano i sian hamusuon.

15:1 Ia partalian ni marga ni angka anak ni si Juda marsuhusuhu tungkan parbalohan ni Edom, halongonan Sin tungkan dangsina, di partalpahan dangsina.

15:2 Jala parbalohannasida tungkan dangsina sian ujung ni laut Sira, sian tanjung na mamedu tungkan dangsina.

15:3 Jala rura tungkan dangsina sahat tu robean Akrabim, jala taripar tu Sin, jala nangkok tungkan dangsina sian Kades-Barnea, taripar muse tu Hezron, jala nangkok tungkan Adar, jala mamedu tungkan Karka.

15:4 Jala taripar tu Azmon, jala ruar sahat ro di sunge Misir, gabe partalpahan ni parbalohanna tungkan laut. I ma parbalohanmuna tungkan dangsina.

15:5 Ia parbalohanna tungkan habinsaran, laut Sira sahat ro di ujung ni Jordan. Ia parbalohanna di lambung tungkan utara olat ni tanjung ni laut sian ujung ni Jordan.

15:6 Jala nangkok parbalohanna tungkan Bethoglah, jala mamolus sian utara tungkan Bet-Araba, jala nangkok parbalohan i tu batu ni si Bohan, anak ni si Ruben.

15:7 Jala nangkok parbalohan i tungkan Debir sian rura Akor, jala tungkan utara mamedu tu Gilgal, tondong ni robean Adumim, na tungkan dangsina sian sunge i. Dung i taripar parbalohan i tu aek Ensemes, jala partalpahanna tu mual Enrogel.

15:8 Dung i nangkok parbalohan i tu rura ni anak ni si Hinnom, sambola tungkan dangsina ni halak Jebusi, i ma Jerusalem; dung i nangkok parbalohan i tu punsu ni dolok, na di jolo ni rura Hinnom tungkan laut, na di ujung ni rura Repaim tungkan utara.

15:9 Dung i gistang parbalohan i sian punsu ni dolok tu mual ni aek Neptoa, jala ruar tu angka huta ni tor Epron, jala gistang parbalohan i tungkan Baalah, i ma Kiriat-Jearim.

15:10 Dung i mamedu parbalohan i sian Baalah tungkan laut tu tor Seir, jala taripar tu lambung ni tor Jearim sian utara, i ma Kesalon, jala tuat tungkan Betsemes, jala taripar tu Timna.

15:11 Jala ruar parbalohan i jonok tu Ekron tungkan utara, jala gistang parbalohan i tungkan Sikron, jala taripar tu dolok Baalah, jala ruar tungkan Jabnel, gabe angka partalpahan ni parbalohan i tungkan laut.

15:12 Jala parbalohan tungkan laut, i ma laut na bolon ro di pasirna. I ma parbalohan ni angka anak ni si Juda humaliang marsuhusuhu.

15:13 Alai tu si Kaleb, anak ni si Jepune, dilehon ibana sada bagian di tongatonga ni angka anak ni si Juda, hombar tu tona ni Jahowa tu si Josua, i ma huta ni si Arba, ama ni si Enak, i ma Hebron.

15:14 Jadi dionjar si Kaleb ma sian na tolu anak ni si Enak, i ma si Sesai, si Ahima dohot si Talmai, angka tubu ni si Enak.

15:15 Dung i nangkok ma ibana sian i tu pangisi ni Debir; ia goar ni Debir di na robi Kiriat Seper.

15:16 Jadi didok si Kaleb ma manang ise na papatu Kiriat Seper, jala ditaban, lehononku ma tu ibana borungku si Aksa bahen jolmana.

15:17 Jadi ditaban si Otniel, anak ni si Kenas, anggi ni si Kaleb huta i, gabe dilehon ma tu ibana si Aksa, boruna i bahen jolmana.

15:18 Jadi di na bongot i parompuan i disosoi ma ibana mangido hauma santurpuk sian amana, laos mijur ibana sian halode. Jadi didok si Kaleb ma tu nasida: Aha di ho?

15:19 Gabe didok nasida ma: Lehon di ahu pasupasu sada! Ai nunga dilehon ho tano na hasang tu ahu, ba lehon huhut di ahu angka mual. Jadi dilehon ma tu nasida angka mual di julu dohot di toruan.

15:20 On ma partalian ni marga ni angka anak ni si Juda marsuhusuhu.

15:21 Jala angka huta ni marga Juda sian ujung ni sada sahat ro di parbalohan tungkan Edom, di dangsina on do: Kabseel, Eder, Jagur.

15:22 Kina, Dimona, Adada.

15:23 Kedes, Hazor, Jitnan.

15:24 Sip, Telem, Belot.

15:25 Hazor-Hadata, eriot Hesron, Hezron, i ma Hazor.

15:26 Amam, Sema, Molada.

15:27 Hazor-Gadda, Hesmon, Betpelet.

15:28 Hasar-Sual, Berseba, Biziotia.

15:29 Baalah, Ijim, Esem.

15:30 Eltolat, Hesil, Horma.

15:31 Ziklag, Madmana, Sansana.

15:32 Lebaot, Silhim, Ain dohot Rimmon. Saluhut huta i duapulu sia do toropna ro di sosorna.

15:33 Ia di rura: Estaol, Zora, Asna.

15:34 Samoah, En Ganim, Tappua, Enam.

15:35 Jarmut, Adullam, Soko, Azeka.

15:36 Saraim, Aditaim, Gedera, Gederotaim; sampulu opat huta ma i ro di sosorna.

15:37 Zenan, Hadasa, Migdal-Gad.

15:38 Dilon, Mispa, Joktel.

15:39 Lakis, Boskat, Eglon.

15:40 Khabon, Lahmas, Kitlis.

15:41 Gederot, Bet-Dagon, Naama, Makkedah; sampulu onom huta ma i ro di sosorna.

15:42 Libna, Eter, Asan.

15:43 Ipta, Asna, Nesib.

15:44 Keila, Aksib, Maressa; sia huta ma i di sosorna.

15:45 Ekron ro di angka boruna (huta) dohot sosorna.

15:46 Sian Ekron jala tungkan laut, sude na marbalokkon Asdod, dohot sosorna.

15:47 Asdod ro di boruna dohot sosorna, Gaza ro di boruna dohot sosorna, sahat ro di sunge Misir, jala laut na bolon parbalohanna.

15:48 Jala di atas tor: Samir, Jatir, Soko.

15:49 Danna, Kiriat Sanna, i ma Debir.

15:50 Anab, Estemo, Anim.

15:51 Gosen, Holon, Gilo; sampulu sada huta ma i ro di sosorna.

15:52 Arab, Duma, Esan.

15:53 Janum, Bettapua, Apeka.

15:54 Humta, Kiryat-Arba, i ma Hebron, Zior; sia huta ma i ro di sosorna.

15:55 Maon, Karmel, Sip, Jutta.

15:56 Jisreel, Jokdeam, Sanoa.

15:57 Kain, Gibea, Timna; sampulu huta ma i ro di sosorna.

15:58 Halhul, Betzur, Gedor.

15:59 Maarat, Bet-Anot, Eltekon; onom huta ma i ro di sosorna.

15:60 Kiryat-Baal, i ma Kiriat-Jearim dohot Rabba, dua huta ma i ro di sosorna.

15:61 Di halongonan: Bet-Araba, Midin, Sekaka.

15:62 Nibsan-Ir-Hamela dohot Engedi, onom huta ma i ro di sosorna.

15:63 Alai anggo halak Jebusi, isi ni Jerusalemi hian, ndang taronjar halak Juda, gabe maringan halak. Jebusi rap dohot halak Juda di Jerusalem rasirasa sadarion.

16:1 Dung i ruar ma rujiruji ni partalian di angka anak ni si Josep olat ni Jordan mardonokkon Jeriko sian aek Jeriko tungkan habinsaran sahat tu halongonan, na nangkok sian Jeriko laho tu tor Betel.

16:2 Dung i ruar sian Betel tu Lus, jala taripar sahat ro di parbalohan ni halak Arki tungkan Atarot.

16:3 Jala tuat tungkan laut tu parbalohan ni halak Japlet i, sahat ro di parbalohan ni Bethoron parjae dohot tu Gezer, jala angka partalpahanna mardonokkon laut.

16:4 I ma gabe partalian ni anak ni si Josep, i ma Manasse dohot Epraim.

16:5 Ia parbalohan ni angka anak ni si Epraim marsuhusuhu, parbalohan ni partalian nasida tungkan habinsaran, i ma Atarot-Adar, sahat ro di Bethoron parjulu.

16:6 Jala ruar parbalohan i tungkan laut, sian Mikhmetat tungkan utara, gabe mamedu parbalohan i tungkan habinsaran ni Taanat Silo, jala taripar sian i tungkan habinsaran tu Janoa.

16:7 Jala tuat sian Janoa tu Atarot dohot tu Naara, jala manihir tu Jeriko, jala ruar tu Jordan.

16:8 Sian Tappua laho do parbalohan i tungkan laut tu sunge Kana, jala partalpahanna tu laut. I ma partalian ni marga Epraim marsuhusuhu.

16:9 Angkupni huta angka na pinapulik di halak Epraim, di tongatonga ni partalian ni halak Manasse, sude angka huta ro di sosorna.

16:10 Alai ndang dionjar nasida halak Kanaan, angka na maringan di Gezer. Jadi maringan ma halak Kanaan di tongatonga ni Epraim rasirasa sadarion, asal di rodi do nasida.

17:1 Maruli partalian dohot marga Manasse marhite sian rujiruji, ai ibana do buhabaju ni si Josep; di si Mahir buhabaju ni si Manasse, ama ni si Gilead dilehon Gilead dohot Basan ala baoa sialo musu ibana.

17:2 Angka anak ni si Manasse na asing pe maruli do marsuhusuhu, angka anak ni si Abieser, angka anak ni si Helek, angka anak ni si Asriel, angka anak ni si Sekem, angka anak ni si Heper dohot angka anak ni Semida. I ma angka anak ni si Manasse tubu ni si Josep, angka baoa marsuhusuhu.

17:3 Alai anggo di si Zelapehat anak ni si Heper, anak ni si Gilead, anak ni si Mahir tubu ni si Manasse ndang adong anakna, holan angka boru do; jala on do goar ni angka boruna: Malala, Noah, Hoglah, Milka dohot Tirza.

17:4 Dung i laho ma nasida manopot tu jolo ni malim Eleasar, dohot tu jolo ni si Josua, anak ni si Nun, dohot tu jolo ni angka induk, angka ninna ma: Martona do Jahowa tu si Musa, ingkon lehonon tu hami sada partalian di tongatonga ni angka ibotonami. Jadi dilehon ma tu nasida sada partalian di tongatonga ni angka hahaanggi ni amanasida i, hombar tu tona ni Jahowa.

17:5 Alai anggo Manasse maruli sampulu partalian di ruar di tano Gilead dohot Basan, angka na di bariba ni Jordan.

17:6 Ai maruli partalian angka boru ni Manasse di tongatonga ni angka anakna; ianggo tano Gilead di angka anak ni si Manasse na asing do dilehon.

17:7 Ia parbalohan ni Manasse olat ni Aser tungkan Mikhmetat na di jolo ni Sikem, jala laho parbalohanna tungkan siamun sahat ro di pangisi ni Entappua.

17:8 Di Manasse do nian tano Tappua; alai anggo tano Tappua marbalokkon Manasse di angka anak ni si Epraim do.

17:9 Dung i tuat parbalohanna tu sunge Kana, tungkan dangsina sian sunge i. Di Epraim do angka huta i di tongatonga ni huta ni Manasse. Alai anggo parbalohan ni Manasse tungkan utara sian sunge i, jala partalpahanna tungkan laut.

17:10 Tano tungkan dangsina di Epraim, jala tano tungkan utara di Manasse, gabe laut parbalohanna; manihir tu Aser do tungkan utara, jala manihir tu Isasar tungkan habinsaran.

17:11 Jadi tu Manasse ma di Isasar dohot di Aser Betsean ro di sosorna, dohot Ibleam ro di sosorna, dohot angka pangisi ni Dor ro di sosorna, dohot angka pangisi ni Endor ro di sosorna, dohot angka pangisi ni Taanak ro di sosorna, dohot angka pangisi ni Megiddo ro di sosorna, tolu luat do i.

17:12 Alai ndang tarsoluk halak Manasse angka huta i, gabe laos dihalomohon halak Kanaan maringan di tano i.

17:13 Alai dung lam marhuaso halak Israel, gabe dirodi ma halak Kanaan i, alai ndang anggo tung dionjar nasida.

17:14 Dung i ro ma hata ni angka anak ni si Josep tu si Josua, angka ninna ma: Boasa tung holan sada partalian dohot sada bagian lehononmu tu ahu bahen parjambaranku, ai bangso na torop do ahu tahe, dipasupasu Jahowa ahu rasirasa nuaeng.

17:15 Jadi ninna si Josua ma tu nasida: Molo bangso na torop ho hape antong nangkok ma ho tu tombak, jala rabi di ho disi, di tano ni halak Perisi dohot Repaim, molo tung masompithu di ho di dolok Epraim.

17:16 Jadi ninna angka anak ni si Josep ma: Ndang tagamon tuk di hami tano dolok i; jala marhureta bosi do sude halak Kanaan, angka na maringan di tano pea angka na di Betsean ro di sosorna nang angka na maringan di rura Jisreel.

17:17 Dung i didok si Josua ma tu pinompar ni si Josep, tu Epraim dohot tu Manasse, songon on: Bangso na torop do ho, jala marhuaso bolon do ho, ndang maruli partalian ho.

17:18 Ingkon dolok i do di ho, ai tombak do i, ingkon rabionmu do i, jala di ho do angka partalpahanna, ai onjaronmu do halak Kanaan i, atik pe marhureta bosi nasida, jala parhuaso.

18:1 Dung i marluhut ma sandok huria ni halak Israel tu Silo, jala dipajongjong nasida disi undungundung luhutan i, jala patu do tano i di jolonasida.

18:2 Alai adong dope pitu marganari tading di halak Israel, angka na so maruli partalian dope.

18:3 Jadi didok si Josua ma tu halak Israel; sadia leleng on marlemba hamu so laho manoluk tano i, na nilehon ni Jahowa Debata ni ompumuna, tu hamu.

18:4 Buat hamu ma tolu halak sian ganup marga, asa hupaborhat nasida mangaliati tano i, huhut di surat i mangihuthon partaliannasida be, dung i mulak nasida tu ahu.

18:5 Ingkon pitu bagian tano i bagionnasida, hot do ianggo Juda di parbalohanna hian tungkan dangsina, pinompar ni si Josep hot jongjong di parbalohanna tungkan utara.

18:6 Alai anggo hamu pitu bagian tano i surat i hamu, dung i boan hamu tu ahu, asa hudabu, rujiruji di hamu dison di jolo ni Jahowa Debatanta i.

18:7 Ai ndang marpartalian anggo halak Lepi di tongatongamuna, ai hamalimon ni Jahowa do partaliannasida. Ianggo Gad, Ruben dohot satonga marga Manasse, nunga maruli partalian di bariba ni Jordan tungkan habinsaran, na nilehon ni si Musa naposo ni Jahowa tu nasida.

18:8 Jadi borhat ma angka baoa i mardalan, gabe ditonahon si Josua ma tu angka na laho i manurati tano i, ninna ma: Laho ma hamu mangaliati tano i, jala surat i hamu, dung i mulak hamu tu ahu, asa dison hudabu rujiruji di hamu, di jolo ni Jahowa, di Silo.

18:9 Dung i mardalan ma angka baoa i, jala diliati nasida tano i, jala disurati mangihuthon angka huta, pitu bagian dibahen tu buku, dung i mulak ma nasida tu si Josua, tu parsaroan Silo.

18:10 Jadi didabu si Josua ma rujiruji di nasida di Silo, di jolo ni Jahowa; asa disi do dibagi si Josua tano i di halak Israel mangihuthon sagisagiannasida.

18:11 Jadi ruar ma partalian ni marga Benjamin marsuhusuhu; ia parbalohan ni partaliannasida ruar do di holangholang ni angka anak ni si Juda dohot di holangholang ni anak ni si Josep.

18:12 Jala parbalohannasida tungkan utara sian Jordan, boti nangkok parbalohan i tu lambung ni Jeriko tungkan utara, nangkok muse tu dolok tungkan laut jala angka partalpahanna tungkan halongonan Bethapen.

18:13 Taripar muse sian i parbalohan i tu Lus, tu lambung ni Lus i ma Betel, tungkan dangsina; tuat muse parbalohan i tu Aterot-Adar, tu dolok, na tungkan dangsina sian Bethoron, parjae.

18:14 Gistang muse parbalohan i jala mamedu dompak laut, tungkan dangsina sian dolok na di jolo ni Bethoron tungkan dangsina, jala angka partalpahanna tu Kiryat-Baal, i ma Kiriat-Jearim, sada huta ni anak ni si Juda; i ma unjurna tungkan hasundutan.

18:15 Alai bohangna tungkan dangsina sian ujung ni Kiriat-Jearim, ruar muse parbalohan i tungkan laut, ruar muse tu mual ni aek Neptoa.

18:16 Dung i tuat parbalohan i tu ujung ni dolok, na di jolo ni rura ni anak ni si Hinnom, na di rura ni halak Repaim tungkan utara, tuat muse tu rura Hinnom, tu lambung ni halak Jebusi, tungkan dangsina, tuat muse tu mual Enrogel.

18:17 Gistang muse tungkan utara jala ruar tu mual Ensemes, ruar muse tu Gelilot, tondong ni buntulbuntul Adumim, jala tuat tu batu ni si Bohan, anak ni si Ruben.

18:18 Jala taripar tu tanggurung ni dolok tondong ni adaran tungkan utara, tuat muse tu pea.

18:19 Dung i taripar parbalohan i tu tanggurung ni dolok sian Bethoglah tungkan utara, jadi sahat partalpahan ni parbalohan i tu dila ni laut Sira tungkan utara, tu ujung ni Jordan tungkan dangsina. I ma parbalohan tungkan dangsina.

18:20 Alai anggo tungkan habinsaran Jordan i do balokna. I ma partalian ni halak Benjamin marsuhusuhu mangihuthon parbalohannasida humaliang.

18:21 Alai huta ni marga Benjamin marsuhusuhu angka on do: Jeriko, Bethoglah, Emek-Kesis.

18:22 Bet-Araba, Semaraim, Betel.

18:23 Anim, Para, Opra.

18:24 Keperhamonai, Opni dohot Geba. Sampulu dua huta ma i ro di sosorna.

18:25 Gibeon, Rama, Beerot.

18:26 Mispa, Kepira, Mosa.

18:27 Rekem, Irpel, Tarala.

18:28 Sela, Elep dohot Jebusi, i ma Jerusalem, Gibea dohot Kiriat Jearim. Sampulu opat huta ma i ro di sosorna. I ma partalian ni halak Benjamin marsuhusuhu.

19:1 Dung i ruar ma rujiruji paduahon di si Simeon, di marga ni angka anak ni si Simeon marsuhusuhu, jala di tongatonga ni partalian ni anak ni si Juda do partaliannasida i.

19:2 Jadi sahat ma tu nasida bahen partaliannasida: Huta Berseba, Seba, Molada.

19:3 Hasar-Sual, Bala, Esem.

19:4 Eltolat, Betul, Horma.

19:5 Ziklag, Betmarkbotot, Hasar-Susa.

19:6 Betlebaot dohot Saruhen. Sampulu tolu huta ma i ro di sosorna.

19:7 Ain, Rimmon, Eter dohot Asan. Opat huta ma i ro di sosorna.

19:8 Angkupni sude sosor na humaliang angka huta i sahat ro di Baalat-Beer-Ramat tungkan dangsina I ma partalian ni marga ni angka anak ni si Simeon marsuhusuhu.

19:9 Sian partalian ni angka anak ni si Juda do partalian ni angka anak ni si Simeon; ai malambashu partalian ni angka anak ni si Juda, jadi maruli partalian angka anak ni si Simeon di tongatonga ni partaliannasida i.

19:10 Dung i ruar ma rujiruji patoluhon di angka anak ni si Zebulon marsuhusuhu. Jadi sahat tu Sarit parbalohan ni partaliannasida i.

19:11 Dung i nangkok parbalohannasida tungkan laut dohot tungkan Mareala, jala mandolos tu Dabaset, mandolos muse tu sunge, na di jolo ni jokneam.

19:12 Dung i mamedu sian Sarit tungkan habinsaran sahat ro di parbalohan ni Krislot Tabor, jala ruar muse tu Daberat, nangkok muse tu Japia.

19:13 Jala sian i taripar tungkan habinsaran tu Gat Heper, boti tu Etkazin, ruar muse tungkan Rimmon, gistang tu Nea.

19:14 Dung i mamedu parbalohan i tungkan utara tu Hannaton, jala partalpahanna tu rura Jepta-El.

19:15 Dohot Karta, Nahalal, Simron, Idale, dohot Betlehem. Sampulu dua huta ma i ro di sosorna.

19:16 I ma partalian ni angka anak ni si Zebulon marsuhusuhu; i ma angka hutanasida ro di sosorna.

19:17 Dung i ruar ma rujiruji paopathon di angka anak ni si Isasar marsuhusuhu.

19:18 Jala parbalohannasida sahat tu Jesreel dohot Hesulot dohot Sunem.

19:19 Boti tu Hapraim, Sion, Anaharat.

19:20 Boti tu Rabit, Kision, Ebez.

19:21 Boti tu Ramat, En-Ganim, En Hada dohot Betpases.

19:22 Jala tolhas parbalohanna tu Tabor, Sahagim, Betsemes, jala partalpahan ni parbalohanna di Jordan. Sampulu onom huta ma i ro di angka sosorna.

19:23 I ma partalian ni marga ni angka anak ni Isasar marsuhusuhu, angka huta ro di sosorna.

19:24 Dung i ruar ma rujiruji palimahon di marga ni angka anak ni si Aser marsuhusuhu.

19:25 Jala parbalohannasida on do: Helkat, Hali, Beten, Aksap.

19:26 Alamelek, Amad dohot Miseal jala mandolos tu Karmel tungkan laut boti tu Sihor-Libnat.

19:27 Dung i mamedu tungkan habinsaran tu Bet-Dagon, jala mandolos tu Zebulon boti tu rura Jepta-El tungkan utara sian Betemek dohot Nahiel jala ruar tu Kabul tungkan hambirang.

19:28 Boti tu Ebron, Rehob, Hamon, Kana sahat ro di Sidon na bolon i.

19:29 Dung i mamedu muse parbalohan i tungkan Rama sahat ro di huta Tirus na gonting i; mamedu muse parbalohan i tungkan Hosa jala partalpahanna tungkan laut, sahat tu Aksib.

19:30 Boti tu Umma, Apek dohot Rehob; duapulu dua huta ma i ro di angka sosorna.

19:31 I ma partalian ni marga ni angka anak ni Aser marsuhusuhu; angka huta ro di sosorna.

19:32 Dung i ruar ma rujiruji paonomhon di angka anak ni si Naptali marsuhusuhu.

19:33 Jala parbalohannasida sian Helep, sian hariara marbalokkon Zaannim di Adami-Nekeb, Jabnel sahat ro di Lakum, jala parbalohanna di Jordan.

19:34 Dung i mamedu parbalohan ni tungkan laut, tungkan Aznat-Tabor jala ruar sian i tungkan Hukok jala mandolos tu Zebulon tungkan dangsina jala tu Aser tungkan laut dohot tu Juda marbalokkon tungkan habinsaran.

19:35 Ia huta angka na gonting i: Zidim, Zer dohot Hamat, Rakat dohot Kineret.

19:36 Adma, Rama, Hazor.

19:37 Kedes, Edrei, En-Hazor.

19:38 Jiron, Migdal-El, Horem, Bet-Anat dohot Betsemes; sampulu sia huta ma i ro di angka sosorna.

19:39 I ma partalian ni marga ni angka anak ni si Naptali marsuhusuhu; angka huta i ro di sosorna.

19:40 Dung i ruar ma rujiruji papituhon di marga ni angka anak ni si Dan marsuhusuhu.

19:41 Ia parbalohan ni partaliannasida: Zora, Estaol, Irsemes.

19:42 Salabin, Aialon, Itla.

19:43 Elon, Timna, Ekron.

19:44 Elteke, Gibeton, Baalat.

19:45 Jehud, Beneborak, Gatrimon.

19:46 Meyarkon, Rakon padohot tano tondong ni Joppe.

19:47 Ruar muse salpu sian i parbalohan ni angka anak ni si Dan. Ai nangkok do angka anak ni si Dan laho marporang dompak Lesem, jala ditaban nasida huta i, ditampuli dohot podang, laos disoluk nasida huta i jala diingani, jala singkat ni Lesem Dan goar ni huta i dibahen, mangihuthon goar ni si Dan ompunasida i.

19:48 I ma partalian ni marga Dan marsuhusuhu, angka hutana ro di sosorna.

19:49 Jadi dung sun nasida marbagi tano i mangihuthon parbalohanna be, gabe dilehon halak Israel ma partalian di si Josua, anak ni si Nun di tongatonganasida.

19:50 Hombar tu tona ni Jahowa dilehon nasida tu ibana hata na pinangidona, i ma Timnat-Sera na di dolok Epraim. Jadi dipauli ma huta i jala maringan di bagasan.

19:51 Angka on ma partalian, angka na sinagihon ni malim Eleasar dohot si Josua anak ni si Nun ro di angka induk ni marga ni halak Israel marompuompu marhite sian rujiruji di Silo di adopan ni Jahowa mardonokkon pintu undungundung parluhutan i gabe mansohot ma nasida marbagi tano i.

20:1 Dung i martona ma Jahowa tu si Josua, ninna ma:

20:2 Paboa ma tu halak Israel songon on: Papulik hamu ma di hamu huta haporusan, angka na hutonahon i hian tu si Musa.

20:3 Asa tusi maporus manang ise sibunu jolma so pangkirimanna, so botobotoanna, angka huta i bahen haporusan maradophon jolma parlulu.

20:4 Molo sanga maporus jolma i tu sada sian angka huta i, ingkon jongjong ibana di haroroan tu bahal ni huta i mangalualuhon hatana, tu pinggol ni angka sintua ni huta i, jala ingkon jangkononnasida ibana tu huta i dohot mangalehon ingananna di lambungnasida.

20:5 Molo tung dilotongi parlulu i ibana sian pudi, na so tupa pasahatonnasida jolma pamunui tu bagasan tanganna, ala so botobotoanna umbahen dibunu donganna, jala ndang marsunisunian hian nasailaon tu ibana.

20:6 Ingkon maringan ibana di huta i paima sanga ibana jongjong di jolo ni rapot paruhuman. Ia dung mate sintua ni malim uju i, jadi ma mulak jolma pamunui tu hutana dohot tu bagasna, tu huta tinadingkonna i laho lintun.

20:7 Jadi diuras nasida ma Kedes di Galilea, di dolok Naptali dohot Sikem di dolok Epraim dohot Kiryat-Arba, i ma Hebron di dolok Juda.

20:8 Ia di bariba ni Jordan, tungkan habinsaran sian Jeriko, dipapulik nasida ma Bezer di halongonan, di tano pea ni marga Ruben, dohot Ramot di Gilead sian marga Gad dohot Golan di Basan sian marga Manasse.

20:9 I ma huta angka na pinapulik di sandok halak Israel dohot di halak dagang, angka na maisolat di tongatonganasida, asa maporus tusi ganup sibunu jolma so pangkirimanna, asa unang mate ibana dibunu parlulu, paima sanga ibana jongjong di jolo ni rapot paruhuman.

21:1 Dung i ro ma angka induk ni halak Lepi marompuompu mandapothon malim Eleasar dohot si Josua, anak ni si Nun, mandapothon dohot angka induk ni halak Israel marmargamarga.

21:2 Angka didok ma tu nasida di Silo di tano Kanaan songon on: Nunga martona hian Jahowa marhite sian si Musa, lehonon tu hami angka huta bahen inganan ro di upa parikna bahen panjampalan di pinahannami.

21:3 Jadi dilehon halak Israel ma tu halak Lepi sian partaliannasida hombar tu tona ni Jahowa, angka huta on ro di upa parikna.

21:4 Dung i ruar ma rujiruji di pinompar ni si Kohat, gabe maruli angka anak ni malim Aron sian halak Lepi: Sian marga Juda dohot sian marga Simeon dohot sian marga Benjamin marhite sian rujiruji sampulu tolu huta.

21:5 Pinompar ni si Kohat angka na asing i maruli sian pinompar ni marga Epraim dohot sian marga Dan dohot sian satonga marga Manasse marhite sian rujiruji sampulu huta.

21:6 Ia pinompar ni si Gerson maruli sian pinompar ni marga Isasar dohot sian marga Aser dohot sian marga Naptali dohot satonga marga Manasse di Basan marhite sian rujiruji sampulu tolu huta.

21:7 Ia pinompar ni si Merari marsuhusuhu maruli sian marga Ruben dohot sian marga Gad dohot sian marga Zebulon sampulu dua huta.

21:8 Songon i ma pangalehon ni halak Israel tu halak Lepi di angka huta i ro di upa parikna marhite sian rujiruji, hombar tu na tinonahon ni Jahowa tu si Musa.

21:9 Jadi dilehon nasida ma sian marga Juda dohot sian marga Simeon angka huta on, angka na targoar be.

21:10 Jadi maruli ma pinompar ni si Aron sian pinompar ni si Kohat marsuhusuhu, sian halak Lepi, ai di nasida di rujiruji parjolo.

21:11 Jadi dilehon ma tu nasida huta Arba, ama ni si Anok, i ma Hebron di dolok Juda ro di upa parikna humaliang.

21:12 Alai anggo golat ni huta i ro di sosorna tu si Kaleb, anak ni si Jepune do dilehon bahen partalianna.

21:13 Ia tu pinompar ni malim Aron dilehon nasida Hebron, huta haporusan ni sibunu jolma ro di upa parikna dohot Libna ro di upa parikna.

21:14 Nang Jatir ro di upa parikna dohot Estemo ro di upa parikna.

21:15 Nang Holon ro di upa parikna dohot Debir ro di upa parikna.

21:16 Nang Ain ro di upa parikna dohot Jutta ro di upa parikna dohot Betsemes ro di upa parikna; sia huta do i sian marga na dua i.

21:17 Ia sian marga Benjamin: Gibeon ro di upa parikna, Geba ro di upa parikna.

21:18 Anatot ro di upa parikna dohot Almon ro di upa parikna, opat huta do i.

21:19 Luhutna huta ni angka malim, pinompar ni si Aron, sampulu tolu huta do ro di upa parikna.

21:20 Ia pinompar ni si Kohat marsuhusuhu, i ma halak Lepi angka na teba sian pinompar ni si Kohat maruli angka huta rujiruji nasida sian marga Epraim.

21:21 Dilehon do tu nasida Sikem, huta haporusan ni sibunu jolma ro di upa parikna di dolok Epraim dohot Gezer ro di upa parikna.

21:22 Nang Kibsaim ro di upa parikna dohot Bethoron ro di upa parikna opat huta do i.

21:23 Ia sian marga Dan: Elteke ro di upa parikna, Gibeton ro di upa parikna.

21:24 Aialon ro di upa parikna, Gatrimon ro di upa parikna, opat huta do i.

21:25 Ia sian satonga marga Manasse: Taanak ro di upa parikna dohot Gatrimon ro di upa parikna, dua huta do i.

21:26 Luhutna huta i sampulu do ro di upa parikna di pinompar ni si Kohat, angka na teba i marsuhusuhu.

21:27 Ia pinompar ni si Gerson sian halak Lepi marsuhusuhu maruli sian satonga marga Manasse huta haporusan ni sibunu jolma, i ma Golan di Basan ro di upa parikna, dua huta do i.

21:28 Ia sian marga Isasar: Kision ro di upa parikna, Daberat ro di upa parikna.

21:29 Jarmut ro di upa parikna, En-Ganim ro di upa parikna, opat huta do i.

21:30 Ia sian marga Aser: Miseal ro di upa parikna, Abdon ro di upa parikna.

21:31 Helkat ro di upa parikna dohot Rehob ro di upa parikna opat huta do i.

21:32 Ia sian marga Naptali huta haporusan ni sibunu jolma, i ma Kedes di Galilea ro di upa parikna dohot Hamot-Dor ro di upa parikna dohot Kartan ro di upa parikna, tolu huta do i.

21:33 Luhutna huta i di pinompar ni si Gerson marsuhusuhu sampulu tolu huta do ro di upa parikna.

21:34 Ia pinompar ni si Merari marsuhusuhu, halak Lepi, angka na teba i maruli sian marga Zebulon: Jokneam ro di upa parikna, Karta ro di upa parikna.

21:35 Dimna ro di upa parikna, Nahalal ro di upa parikna, opat huta do i.

21:36 Ia sian marga Ruben: Bezer ro di upa parikna dohot Jahaz ro di upa parikna.

21:37 Kadermat ro di upa parikna dohot Mepaat ro di upa parikna, opat huta do i.

21:38 Ia sian marga Gad huta haporusan ni sibunu jolma: Ramot di Gilead ro di upa parikna dohot Mahanaim ro di upa parikna.

21:39 Hesbon ro di upa parikna, Jaser ro di upa parikna, luhutna huta i opat do.

21:40 Luhutna huta i di pinompar ni si Merari marsuhusuhu, angka na teba sian halak Lepi marsuhusuhu, sampulu dua huta do rujirujinasida.

21:41 Jadi luhutna huta i di halak Lepi, di tongatonga ni partalian ni halak Israel, opatpulu ualu huta do ro di upa parikna.

21:42 Songon on do parsagi ni angka huta i, gonop huta ro di upa parikna be humaliang, songon i do di angka huta i luhutna.

21:43 Jadi dilehon Jahowa tu halak Israel sandok tano i na niuarihonna lehononna tu ompunasida, gabe dipapatu nasida tano i, laos maringan disi.

21:44 Dung i dipasonang Jahowa ma nasida humaliang, hombar tu saluhut na niuarihonna tu ompunasida, jala ndang manahan musunasida nanggo sada maradophon nasida, dipasahat Jahowa do luhut musunasida tu tangannasida.

21:45 Ndang adong tartading nanggo sada sian saluhut hata na denggan, angka na pinaboa ni Jahowa tu pinompar ni Israel, tung luhutna do ro.

22:1 Uju i ma dipapungu si Josua ma halak Ruben, Gad dohot satonga marga Manasse.

22:2 Didok ma mandok nasida: Nunga diradoti hamu saluhut na tinonahon ni si Musa, naposo ni Jahowa tu hamu, jala nunga ditangihon hamu suarangku taringot tu saluhutna na hutonahon i tu hamu.

22:3 Ndang ditadingtading hamu hahaanggimuna, nunga pola na sai laon rasirasa sadarion, jala nunga burju diradoti hamu tona ni Jahowa, Debatamuna i.

22:4 Ia nuaeng nunga marhasonangan hahaanggimuna i dibahen Jahowa, Debatamuna i, hombar tu bagabagana i tu nasida, on pe muli ma hamu nuaeng tu undungundungmuna, tu tano partalianmuna i, na nilehon ni si Musa, naposo ni Jahowa, tu hamu di bariba ni Jordan.

22:5 Asa burju situtu hamu mangaringkoti patupahon hombar tu tona dohot tu patik, na tinonahon ni si Musa, naposo ni Jahowa, tu hamu: Mangkaholongi Jahowa, Debatamuna i, dohot marparange di saluhut angka dalanna, huhut mangaradoti angka tonana, jala marsihohot tu Ibana, huhut mangoloi Ibana sian nasa rohamuna dohot sian nasa tondimuna.

ᯀᯘ ᯅᯒᯮ᯲ᯐᯮ ᯘᯪᯖᯮᯖᯮ ᯂᯔᯮ ᯔᯝᯒᯰᯪᯂᯬᯖᯪ ᯇᯖᯮᯇᯂᯉᯬ᯲ ᯂᯔᯬ᯲ᯅᯒ᯲ ᯖᯮ ᯖᯬᯉ ᯑᯬᯂᯖᯬ᯲ ᯖᯮ ᯇᯖᯂᯪ᯲, ᯉ ᯖᯪᯉᯬᯉᯂᯉᯬ᯲ ᯉᯪ ᯔᯮᯘ… ᯂ ᯇᯬᯘᯬ ᯉᯪ ᯐᯂᯬᯋ, ᯖᯮ ᯂᯔᯮ: ᯔᯰᯂᯂᯬᯞᯬᯝᯪ ᯐᯂᯬᯋ, ᯑᯩᯅᯖᯔᯮᯉ ᯤ, ᯑᯬᯂᯖᯬ᯲ ᯔᯒ᯲ᯇᯒᯝᯩ ᯑᯪ ᯘᯞᯮᯂᯖᯮ᯲ ᯑᯞᯉ᯲ᯉ, ᯂᯮᯂᯖᯮ᯲ ᯔᯝᯒᯑᯬᯖᯪ ᯀᯰᯂ ᯖᯬᯉᯉ, ᯐᯞ ᯔᯒ᯲ᯘᯪᯂᯬᯂᯖᯬ᯲ ᯖᯮ ᯤᯅᯉ, ᯂᯮᯂᯖᯮ᯲ ᯔᯝᯬᯞᯬᯤ ᯤᯅᯉ ᯘᯪᯀᯉ᯲ ᯉᯘ ᯒᯬᯂᯔᯮᯉ ᯑᯬᯂᯖᯬ᯲ ᯘᯪᯀᯉ᯲ ᯉᯘ ᯖᯉᯬ᯲ᯑᯪᯔᯮᯉ.

22:6 Dung i dipasupasu si Josua ma nasida, jala dipamuli asa laho nasida tumopot undungundungnasida be.

22:7 Alai anggo tu na satonga marga Manasse, nunga dilehon si Musa hian partalian di Basan, jala tu na satonganari nunga dilehon si Josua rap dohot angka hahaanggina di hasundutan ni Jordan, dingkan laut. Jadi dung dipamuli si Josua nang nasida tu undungundungnasida be, jala dipasupasu nasida.

22:8 Ninna ma tu nasida songon on: Mararta godang do hamu muli tu undungundungmuna dohot marpinahan na deak situtu, marperak, marsere, martombaga, marbosi dohot marulos mansai godang; antong sai bagi hamu ma tabantaban sian musumuna i rap dohot hahaanggimuna.

22:9 Dung i mulak ma pinompar ni si Ruben, si Gad dohot satonga Manasse, tumadingkon halak Israel sian Silo na di tano Kanaan laho tu tano Gilead, tumopot tano partaliannasida, naung sahat tu nasida hian, hombar tu hata ni Jahowa marhite sian si Musa.

22:10 Jadi dung sahat nasida tu luat ni Jordan, angka na di tano Kanaan, dipauli pinompar ni si Ruben, si Gad dohot satonga marga Manasse disi sada langgatan martopihon Jordan, na bolon idaon.

22:11 Dung i tarbortik ma tu halak Israel, didok halak: Ida ma, nunga pola dipauli pinompar ni si Ruben, si Gad dohot satonga marga Manasse sada langgatan tondong ni tano Kanaan di luat angka mardonokkon Jordan paiparipar dohot halak Israel.

22:12 Jadi dung dibege halak Israel barita i, marluhut ma sandok huria ni halak Israel tu Silo martahi nangkok laho mamorang nasida. III

22:13 Dung i disuru halak Israel ma manopot pinompar ni si Ruben, si Gad dohot satonga marga Manasse tu tano Gilead malim Pinehas, anak ni si Eleasar.

22:14 Angkupni sampulu induk donganna, sada induk sian ganup marga Israel marompuompu, ganup nasida ihutan di nasida na samarga di tongatonga ni halak Israel marriburibu.

22:15 Jadi dung tolhas nasida tu pinompar ni si Ruben, si Gad dohot satonga marga Manasse tu tano Gilead, gabe marhata dohot nasida songon on:

22:16 Boti hata ni sandok huria ni Jahowa Pangoseon dia do i, na mangosei hamu dompak Debata ni Israel, umbahen marbalik hamu sadarion sian Jahowa, di na pinaulimuna di hamu sada langgatan laho manggunturi sadarion dompak Jahowa.

22:17 Maotikku dope huroha di hita hajahaton ni Peor, na so taruras dope hita sian i rasirasa sadarion gabe masa begu di huria ni Jahowa.

22:18 Marbalik muse hamu sadarion sian Jahowa, hape molo manggunturi hamu sadarion dompak Jahowa marronirimas ma Ibana marsogot tu sandok huria ni Israel.

22:19 Alai molo tung ramun tano partalianmuna i, ro hamu taripar tu tano partalian ni Jahowa, ojahan ni undungundung ni Jahowa, asa maruli partalian hamu di tongatonganami, alai unang hamu manggunturi dompak Jahowa dohot dompak hami di na pinaulimuna di hamu sada langgatan, pulik sian langgatan ni Jahowa Debatanta i.

22:20 Nda mangose do si Agan, anak ni si Jara, marhite sian ugasan na hona harom, gabe masa torutoru tu sandok huria Israel? Jala ndada sasada ibana mate ala hajahatonna.

22:21 Jadi ninna pinompar ni si Ruben, si Gad dohot satonga marga Manasse mangalusi angka induk ni Israel marriburibu.

22:22 Debata, Debata Jahowa; Debata, Debata Jahowa, Ibana umbotosa, Israel pe ingkon botoonna do: Molo tung manggunturi hami dompak Jahowa, manang naeng marbalik, unang ma Ho manolongi hami sadarion.

22:23 Molo tung hupauli hami sada langgatan di hami, asa naeng marbalik sian Jahowa, manang molo tung naeng mamelehon pelean situtungon manang sipanganon hami di atasna, manang molo tung naeng mamelehon angka pelean hamauliateon hami di atasna, Jahowa ma marlulu dompak hami!

22:24 Molo so balik sian holso ni rohanami, umbahen hubahen hami songon i mandok: Marsogot haduan dohonon ni pinomparmuna ma tu pinomparnami songon on: Aha do parsaoranmuna tu Jahowa, Debata ni Israel!

22:25 Batang aek Jordan on do parbolatan na binahen ni Jahowa parholangannami tu hamu, ale pinompar ni si Ruben dohot si Gad, ndang parjambar anggo hamu di Jahowa! Jadi taiton ni pinomparmuna maon pinomparnami, unang marhabiaran tu Jahowa.

22:26 Dibahen i hudok hami ma: Itapauli ma di hita sada langgatan, ndada bahen pamelean ni pelean situtungon manang sipotongon.

22:27 Ingkon bahen sitindangi nian langgatanon di hita dohot di pinomparta sogot, paboa na masuk hami marulaon tu Jahowa di jolona marhite sian peleannami situtungon dohot sipotongon dohot hamauliateon, asa unang dohonon ni pinomparmuna sogot tu pinomparnami: Ndang parjambar anggo hamu di Jahowa!

22:28 Jadi hudok hami ma: Molo tung songon i dohononnasida sogot tu hami dohot tu pinomparnami, gabe dohononta ma: Bereng hamu ma sumansuman ni langgatan di Jahowa naung binahen ni ompunami, ndada bahen pamelean ni pelean situtungon manang sipotongon, ingkon bahen sitindangi do i di tongatonganta.

22:29 Dao ma i sian hami, anggo tung manggunturi hami dompak Jahowa, manang marbalik sian Jahowa sadarion, laho paulihon sada langgatan bahen pamelean ni pelean situtungon manang sipanganon manang sipotongon pe, pulik sian langgatan ni Jahowa, Debatanta i, na jongjong di jolo ni undungundungna.

22:30 Jadi dung dibege malim Pinehas dohot angka induk ni huria i dohot induk ni Israel marriburibu, angka na rap dohot ibana, hata angka na pinaboa ni pinompar ni si Ruben, si Gad dohot si Manasse, gabe denggan rohanasida umbegesa.

22:31 Dung i ninna malim Pinehas, anak ni si Eleasar ma tu pinompar ni si Ruben, si Gad dohot si Manasse: Apala sadarion ma hutanda hami paboa Jahowa di tongatonganta, ala so naeng mangose hamu dompak Jahowa marhite sian pambaenanon. Hamu do tardok paluahon halak Israel sadarion sian tangan ni Jahowa.

22:32 Dung i ditadingkon malim Pinehas, anak si Eleasar dohot angka induk i ma pinompar ni si Ruben dohot si Gad, mulak sian tano Gilead tu tano Kanaan mandapothon halak Israel, mamboan barita i tu nasida.

22:33 Jadi denggan hata i di roha ni halak Israel, laos mamujimuji Debata halak Israel i, jala ndang be disangkap rohanasida naeng nangkok mamorangi nasida, laho mangago tano i, na niinganan ni pinompar ni si Ruben dohot si Gad.

22:34 Dung i dibahen pinompar ni si Ruben dohot si Gad ma goar ni langgatan i: Sitindangi, ai ninna do: Langgatanon ma sitindangi di holangholangta, paboa Jahowa do Debata.