Paris
 | An artikulong ini dai nagsasambit nin ano man na ikatolong partidong ginonoan o ginikanan. Tabangi tabì na mapakarhay ining artikulo sa paagi kan pagdugang nin katobod-tobod na ginonoan. An mga materyal na dai napatotoohan pwedeng kwestyonon asin halion. (Mayo 2008) |
Paris an kapitolyo kan Pransya. Namomogtak ini sa gilid kan Salog na Seine, sa norte nin Pransya, sa sentro kan rehiyon nin Ile-de-France (Rehiyon Parisiense).
Igwang 2,153,600 na katawo na nakaistar sa mismong ciudad nin Paris. Pero kung bibilangon pa an mga nakairog sa palibot kaini maabot sa 9.93 na milyon na katawo an poblasyon nin Paris, boot sabihon, ini an sarô sa pinaká matawong ciudad sa Europa.
Mga duwang ribong taon na na importanteng banwa an Paris, ini ngunyan an sarô sa pinaká makusog na sentro nin negosyo asin kultura sa enterong kinàban, asin ini an sarô sa mga inaapod na ciudad na pankinaban (global cities).
An Rehiyon Parisiense (Ile-de-France) an sentro kan ekonomiya nin Pransya ta nagkokontribu ini sa sobra sa 25% kan kagabsan na produktong panharong (gross domestic product) sa 2005. An Paris man harong nin UNESCO, nin OECD asin nin ICC.
An Paris an pinaká bisitadong ciudad nin mga turista sa enterong kinàban. Kada taon, sobra sa 30 milyon na katawo an nagdidigdi para mahiling an kaining pamosong mga monumento, arog kan Torre Eiffel, Katedral nin Notre Dame, an Arko nin Triunfo, an Basilika nin Sagradong Puso, an Invalides, an Pantheon, asin an mga bistadong museo nin Louvre, Musee D'Orsay. Dakul man na turista an maogmang nagduduman sa Disney Resort Paris.
Klima
[baguhon | baguhon an source]An klima nin Paris ay pigaapod na kadagaton (oceanic) ta ini naaapektohan kan Korriente nin Atlantiko Norte (North Atlantic Current). An resulta kaini ay an klima kan ciudad ay templado, muyang sabihon, bihira an panahon na sobrang init o sobrang lipot. An pinakáhalankaw na temperatura narehistro sa 28 nin Hulyo, 1948 ta nagabot ini sa 40.4 na grado (C). An pinaká malipot na temperatura ay narehistro sa 10 nin Disyembre, 1879, ta bumaba sa menos -23.9 na grado an termometro. Pero sa mga ultimo na taon, bihira na an sobrang lipot (halos dae na nababa sa 0 an temperatura), asin an nyebe (snow).