Kyokushinkai

Kyokushinkai 極真会
Tamién	Kárate Kyokushin, Kyokushin kaikan
Fecha de fundación	1964
País d'orixe	Xapón
Fundador	Masutatsu Oyama (Choi Yeong-Eui)
Métodos téunicos	Combate a contautu plenu, en cata'l KO. Nes competiciones (normalmente ensin proteición dala) permítense les pataes a nivel “jodan” (cabeza), pero non golpes de mano/puñu a esi mesmu nivel
Escueles proxenitores	Principalmente Goju-ryu, pero tamién Shotokan y Daito-ryu Aiki-jujutsu
Escueles derivaes	Seido Juku, Seidokaikan, Shidokan, Ashihara, Daido Juku
Prauticantes	Terutomo Yamazaki, Sonny Chiba, Akira Masuda, Georges St. Pierre, Andy Hug, Bas Rutten, Dolph Lundgren, Glaube Feitosa, Francisco Filho, Bobby Lowe, Hajime Kazumi, Mariusz Pudzianowski, Tiger Schulmann, Shokei Matsui, Semmy Schilt, Ewerton Teixeira, Glen Murphy, Ryo Chonan, Andrews Nakahara, Katsunori Kikuno, Sean Connery
Deporte olímpicu	Non

El Kyokushinkai (極真会) o Kárate Kyokushin ye un estilu de kárate a contautu plenu fundáu en 1964 pol maestru xaponés, d'orixe coreanu, Masutatsu Oyama. El términu xaponés kyokushinkai tórnase a "sociedá (会) de la verdá (真) definitiva (極)". El conceutu kyokushin arraigona nuna filosofía d'ameyoramientu personal, disciplina y entrenamientu duru. El so estilu de combate a contautu plenu tuvo munchu ésitu internacionalmente (en más de cuatro décades tien habío más de 12 millones de prauticantes^[1][2][3]).

El Kyokushinkai influyó en munches de les escueles de kárate "full-contact" pola importancia que-y da al combate realista, a la resistencia física y pol so práuticu programa d'entrenamientu. El sistema de competición de “kárate al KO” entamáu pol Kyokushinkai foi adoptáu por munchos estilos y organizaciones de kárate diferentes. Otres organizaciones d'artes marciales evolucionaron del Kyokushinkai a lo llargo de los años, dalgunes cambiando'l repertoriu marcial per aciu d'añadir delles téuniques, por exemplu les d'agarre, pero siguiendo cola mesma filosofía d'entrenamientu realista y práuticu.

El fundador del Kárate Kyokushin, Masutatsu Oyama, nació col nome de Choi Yong-i el 27 de xunetu de 1923 en Gimje, Corea,^[4] demientres el llargu periodu d'ocupación xaponesa. Por mor de la popularidá qu'algamaron delles películes sobre la so vida, el nome "Choi Bae Dal" úsase dacuando en referencia a Oyama. 'Bae Dal' ye la pronunciación coreana del nome xaponés 'Masutatsu', que tamién pue pronunciase 'baitatsu'. Pero'l mesmu Oyama nunca usó esti nome, y el so usu ye d'introducción más recién.

De neñu a Oyama prestába-y lluchar y ver cómo lluchaben otros. Nel 1938 marchó pa Xapón y púnxose a estudiar Kárate d'Okinawa con Gichin Funakoshi, llegando al 2u Dan. Más tarde entrenó tamién con Yoshida Kotaro, un famosu maestru de Daito-ryu Aiki-jujutsu y Yanagi-ryu Aiki-jujutsu, del que recibió'l menkyo kaiden, un diploma de maestría según la forma antigua de graduación. Esti diploma amuésase inda güei nel “honbu” (sede central) dojo en Tokyo.

Amás, por conseyu del so guía y miembru de la Dieta Nacional, Matsuhei Mori, el xoven maestru cambió daquella al so nome xaponés, Masutatsu Oyama, que diba usar yá tola vida. Pasada la Segunda Guerra Mundial, Oyama principió a entrenar kárate Goju-ryu con un maestru coreanu de Xapón, So Nei Chu, que llevaba un dojo en Tokyo col famosu maestru de Goju-ryu Gogen Yamaguchi. Algamó'l 8u Dan en Kárate Goju-ryu. Otra influencia de la escuela Goju yera Masahiko Kimura. Anque foi instructor asistente de kárate nel dojo nel qu'entrenaba Oyama, Kimura foi sobre too'l famosu campeón de yudu que derrotó a Helio Gracie, renomáu representante del Jiu-jitsu brasilanu. Kimura afaló a Oyama a entrenase en yudu al envís de que pescanciara les téuniques de suelu del arte. Conque Kimura llevólu al Sone Dojo en Nakano, Tokyo, onde tuvo entrenando cuatro años con regularidá, llegando al 4u Dan nesta disciplina.

Dempués d'aquello Oyama retiróse al monte pal primeru de los sos célebres periodos d'entrenamientu a soles, el llamáu yamagomori. Fixo dos retiros asemeyaos, que-y llevaron cuasi tres años en total, n'alcordanza de les tradiciones ascétiques de munchos grandes guerreros del Xapón nel trescursu de los sieglos. Nestos periodos de retiru en solitario qu'echaba entrenando, Oyama ocupábase nun intensu shugyo, o disciplina espiritual.

A primeros de los años 1950, Oyama viaxó a los Estaos Xuníos d'América, onde visitó 32 estaos.

En 1953 Oyama dexó'l Goju ryu y abrió en Tokyo'l so propiu dojo independiente de kárate, llamáu "Oyama Dojo", pero siguió viaxando per Xapón y pel mundu, faciendo demostraciones doartes marciales, hasta con retos. Esti primer 'Oyama dojo' yera un solar llibre en Mejiro, Tokyo. En 1956 treslladó'l dojo al estudiu de balé apegáu a la Universidá Rikkyo. El programa d'estudios d'Oyama algamó aína sonadía como un estilu fuerte, duru, intensu y práuticu que llamó "Kyokushin" nuna ceremonia en 1957. Como la sonadía del dojo esporpollaba, a los estudiantes atrayíalos cada vez más la posibilidá d'entrenar allí, llegaben de tou Xapón y de fuera, y el so númberu siguía medrando.

En 1964 Oyama treslladó'l dojo a un edificiu remocicáu por él, non lloñe del estudiu de balé de Rikkyo. Tamién fundó formalmente la "Organización Internacional de Kárate Kyokushinkaikan" (acurtiada davezu a IKO o IKOK) en visu a organizar les munches escueles que daquella taben enseñando l'estilu. Esti dojo nel 3-3-9 Nishi-Ikebukuro, nel área de Toshima en Tokyo, inda ye actualmente la sede mundial del Kyokushinkai, anque hai unes cuantes dixebres que se vindiquen como autoridá nél, magar que nun tean llegalmente reconocíes en Xapón.

Acabante fundar oficialmente'l Kyokushinkaikan, Oyama empunxo la organización a traviés d'un periodu d'espoxigue. Oyama escoyó instructores qu'amosaren habilidá en presentar l'estilu y atrayer nuevos miembros. L'instructor qu'escoyía Oyama marchaba a otra ciudá de Xapón y davezu demostraba les sos habilidaes en sitios públicos, como ximnasios sociales, el ximnasiu de la policía llocal (onde prauticaben de cutiu munchos yudoques), o un parque, o facía demostraciones d'artes marciales en festivales llocales o actos escolares. D'esta miente l'instructor ganaba pronto a estudiantes pal so nuevu dojo. Llueu la noticia corría de boca en boca pela zona hasta que'l dojo tenía un nucleu central d'estudiantes. Oyama unvió tamién instructores a países como Holanda (Kenji Kurosaki), Australia (Shigeo Kato), los Estaos Xuníos (Tadashi Nakamura, Shigeru Oyama y Yasuhiko Oyama, Miyuki Miura) y Brasil (Seiji Isobe) pa esparder el Kyokushinkai de la mesma manera. Amás munchos estudiantes escomenzaron a viaxar a Xapón a entrenar con Oyama, y de resultes tornaben pa casa y espardíen l'arte. En 1969, Oyama organizó los Primeros Campeonatos Abiertos de Kárate Full Contact de Tol Xapón que sutrumieron al país y tuvieron a Terutomo Yamazaki como primer campeón. Los Campeonatos de Tol Xapón vienen faciéndose cada añu. Tamién, en 1975, celebráronse en Tokyo los Primeros Campeonatos Abiertos Mundiales de Kárate Full Contact. Dende entós los Campeonatos Mundiales organícense cada cuatro años, anque pol actual tracamundiu d'organizaciones que se vindiquen como representatives, hai cada añu hasta cinco llamaos "campeonatos mundiales" y, poro, un refileru de campeones mundiales al mesmu tiempu.

Namái morrer Oyama en 1994, dellos grupos dixebráronse del Honbu (sede central) de la Organización Internacional de Kárate (IKO), principalmente por mor d'alderiques personales a respeutive de la socesión d'Oyama como presidente. Al probase na Corte de Familia de Tokyo en 1994 qu'un supuestu testamentu nun yera válidu, cualquier esixencia de que tal testamentu contenía la verdadera voluntá d'Oyama foi anulada. Enantes de la so muerte Oyama nun nomara heriede, anque munchos reclamen agora ser con tou derechu los cabezaleros de la organización.

La IKO dividióse nos siguientes grupos :

• La IKO 1, la organización orixinal dirixida por Kancho Shokei Matsui^[5]. Ye la única organización llegalmente reconocida en Xapón como lligada al Kyokushin Honbu Dojo orixinal d'Oyama y a la familia Oyama (heriede de la propiedá intelectual d'Oyama).
• La Shin-Kyokushinkai de Kenji Midori (Organización Mundial de Kárate, o IKO2).
• El grupu de Matsushima (IKO3).
• El grupu de Tezuka (IKO4)^[6] ;
• La Kyokushin Union de Kancho Kazuyuki Hasegawa.
• El Kyokushin-kan de Kancho Hatsuo Royama (K.I.K.O, Organización Internacional de Kárate Kyokushin-kan)^[7] ;
• La I.B.K de John Bluming.

Como Steve Arneil marchara de la IKO en 1991 pa fundar la IFK (Federación Internacional de Kárate), hai güei una docena d'organizaciones internacionales que reivindiquen l'heriedu del maestru Oyama (la llista pue consultase nel sitiu Kyokushin4life), resalvando les organizaciones d'estilos derivaos del Kyokushinkai, como'l Seido Juku, el Seidokaikan, el Shidokan, l'Ashihara o'l Daido Juku.

El kanji que representa con caráuteres d'orixe chinu la pallabra Kyokushinkai trescríbese a "kyoku" ("últimu", "definitivu"), "shin" ("verdá", "realidá") y "kai" ("xuntase", "asociase"). D'esta miente Kyokushinkai tórnase llibremente a "Sociedá de la Verdá Definitiva".^[8] Esti ye un conceutu que nun ye exautamente netu al significáu occidental de verdá, sinón que más bien tien que ver col conceutu del bushido de descubrir la naturaleza del verdaderu calter d'ún cuando se pon a prueba.^[9] Una de les metes del kyokushinkai ye fortalecer y ameyorar el calter retándose a unu mesmu per aciu d'un entrenamientu rigorosu.

L'entrenamientu en Kyokushinkai consta de tres elementos principales: téunica, formes y combate. A veces llámenles les tres "kas" por mor de la so denomación xaponesa: kihon (base), kata (formes), y kumite (combate).

El sistema Kyokushinkai ta basáu n'estilos tradicionales de kárate como Shotokan y Goju-ryu, pero nel kumite amiesta munchos elementos de deportes de combate como Boxéu, Muay Thai y Kickboxing. Munches téuniques usaes nel Kárate Kyokushin nun s'atopen n'otros estilos de kárate.

En Kyokushinkai tanto'l profesor como los estudiantes tienen que participar en combates bien duros pa preparase pa combatir a contautu plenu. Al aviesu de munches formes de kárate, el Kyokushinkai da-y la mayor importancia al combate a contautu plenu, qu'a vegaes faise ensin guantes o equipu proteutor. Esta supuesta violencia templa al torgase los golpes de mano/puñu al nivel de la cabeza. Esto amenorga'l peligru de daños inmediatos o a llargu plazu. Ensin embargu permítense rodiyazos y pataes a cabeza y cara.

Nos primeros tiempos del Kyokushinkai los golpes a puñetazu llimpiu a la cara taben permitíos, pero esto producía lesiones a esgaya, asina que los estudiantes perdíen d'entrenar. Oyama creyía que llevar guantes proteurores quitaba esi realismu que ye tan importante pal estilu. Sicasí decidióse que los golpes de mano/puñu y coldu a cabeza y pescuezu nun diben siguir permitiéndose nos entrenamientos y na competición, arriendes de que munchos gobiernos nun permiten estos golpes en competiciones oficiales d'artes marciales. Cuasi toles organizaciones y estilos derivaos del Kyokushinkai tovía siguen anguaño esta filosofía.

Téunicamente'l Kyokushinkai ye un estilu circular y direutu, qu'incorpora una mecedura acionada de téuniques lliniales del potente Kárate Shotokan y de los movimientos más circulares del Goju-ryu, con muncha influyencia china. Shotokan y Goju-ryu foron los dos estilos de kárate qu'estudió Oyama primero de crear l'estilu Kyokushinkai. Pero Oyama namái estudió Shotokan un par d'años enantes de cambiar al Goju-ryu, onde algamó un nivel altu col so guía principal, So Nei Chu. Estes influyencies refléxense nel Kyokushinkai, u l'entrenamientu y los kates pa los primeros graos aseméyense por demás al Shotokan pero va pasu ente pasu faciéndose más cercanu a les téuniques circulares y estratexes del Goju-ryu según se va xubiendo de nivel.

Kata ye una forma ritualizada d'entrenamientu individual onde se faen movimientos esquematizaos o preparaos al envís de prauticar una manera de maniobrar en combate. Según un prestixosu testu, "The Budo Karate of Mas Oyama" ^[10], escritu por Cameron Quinn, intérprete d'Oyama munchu tiempu, los kates del Kyokushinkai clasifíquense en Kates Nortizos y Kates Sureños.

Pa una clasificación más amplia habría que pescudar más sobre cada kata y el so creador.

Los kates nortizos guañen na tradición Shuri-te del kárate y lleguen al Kyokushinkai a traviés del kárate Shotokan qu'aprendiera Oyama cuando entrenaba con Gichin Funakoshi.

En dalgunes partes quiten el prefixu "sono" de los nomes de los kates.

• Taikyoku sono ichi
• Taikyoku sono ni
• Taikyoku sono san

El kata Taikyoku creáralu orixinalmente Gichin Funakoshi, fundador del kárate Shotokan.

• Pinan Sono Ichi
• Pinan Sono Ni
• Pinan Sono San
• Pinan Sono yon
• Pinan Sono Go

Los 5 kates Pinan, qu'otros estilos conocen como Heian, foron creaos orixinalmente nel añu 1904 por Anko Itosu, un maestru de Shuri-te y Shorin ryu (combinación de les tradiciones de kárate shuri-te y tomari-te) que fuera maestru de Gichin Funakoshi. Pinan tórnase lliteralmente a Paz y Harmonía.

• Kanku Dai

Dalgunes organizaciones quiten el "Dai" del nome y llámenlu solamente "Kanku", darréu qu'en Kyokushinkai nun se prautica "Kanku Sho" o otra variante de Kanku. El kata Kanku conocíase de primeres como Kusanku or Kushanku, y créyese que lu enseñara o lu inspirara un artista marcial chinu homónimu que fuera mandáu a Okinawa como embaxador al reinu de les Ryukyu nel sieglu XVI. La traducción de Kanku ye "Mirar el cielu".

• Sushiho

El kata Sushiho ye una versión mui cambiada del antiguu kata okinawense que nel Shotokan llamen Gojushiho, y en dalgún otru estilu Useishi. El nome significa "54 pasos", en referencia a un númberu simbólicu del Budismu.

• Bassai-dai (solamente prauticáu nuna organización de Kárate Kyokushin)

Un kata okinawense mui antiguu d'orixe desconocíu. El nome Bassai, o Passai, tórnase a "asaltar el castiellu".

• Naihanchi (conocíu como Tekki en Shotokan y solamente prauticáu nuna organización de Kárate Kyokushin)

Esti ye un kata okinawense mui antiguu d'orixe desconocíu. Clasifícase davezu como perteneciente a la tradición Tomari-te. El nome Tekki tórnase a "caballu de fierro", pero'l significáu de Naihanchi ye "dixebra interna".

• Sokugi Taikyoku sono ichi
• Sokugi Taikyoku sono ni
• Sokugi Taikyoku sono san

Estos tres kates creólos Oyama pa desendolcar tovía más les habilidaes de patiar siguiendo'l mesmu “embu-sen” (llinia d'execución) del kata Taikyoku orixinal. Sokugi Taikyoku significa lliteralmente Taikyoku de Pataes. Taikyoku tórnase a Gran Visión Última.

Los kates sureños guañen na tradición Naha-te del kárate, y lleguen al Kyokushinkai per mediu del kárate Goju Ryu qu'aprendiera Oyama con So Nei Chu y Gogen Yamaguchi. Dos esceiciones son el "Tsuki no kata", creáu por Seigo Tada del Goju-ryu Seigokan col nome de "Kihon tsuki no kata", y el kata "Yantsu", orixinariu del Motobu-ha Shito-ryu, onde lu llamen "Hansan" o "Ansan".

• Gekisai Dai
• Gekisai Sho

Gekisai foi creáu por Chojun Miyagi, fundador del kárate Goju-ryu. El nome significa "atacar y destruyir"

• Tensho

Creólu orixinalmente Chojun Miyagi. El nome significa "manes que xiren"

• Sanchin

Sanchin ye un kata perantiguu con raigaños en China. El nome tórnase a "tres puntos" o "tres batalles". La versión del Kyokushinkai ta mui rellacionada cola versión qu'enseñaba Kanryo Higashionna (o Higaonna), maestru de Chojun Miyagi (y non a la versión camudada qu'enseñaba esti últimu).

• Saifa (Saiha)

Orixinalmente un kata chinu. Introdúxolu n'Okinawa y nel kárate Kanryo Higashionna. El nome tórnase a "destruyir y valtar".

• Seienchin

Orixinalmente un kata chinu, consideráu mui antiguu. Introdúxolu n'Okinawa y nel kárate Kanryo Higashionna. El nome tórnase aproximao a "agarrar y meter en batalla".

• Seipai

Orixinalmente un kata chinu. Introdúxolu n'Okinawa y nel kárate Kanryo Higashionna. El nome significa'l númberu 18, onde 18 ye igual a 3x6, que tien significación nel Budismu.

• Yantsu

Yantsu vien del Motobu-ha Shitoryu. El nome traduzse como "caltenese puru"

• Tsuki no kata

Kata creáu por Seigo Tada, fundador de la rama Seigokan del Goju-ryu. El nome significa simplemente "kata de puñetazos".

• Garyu

El kata Garyu nun vien del kárate tradicional d'Okinawa sinón que foi creáu por Oyama y denomáu asina pol so nomatu d'escritor (Garyu = dragón que s'abanga), que ye la pronunciación xaponesa de los caráuteres 臥龍, el nome de l'aldea (Il Loong) de Corea onde naciera.

Dellos kates fáense tamién n'"ura", que vien significar que tolos xiros se faen nel sen contrariu y tolos movimientos cola parte contraria del cuerpu. Los kates Ura, o 'del revés', foron desendolcaos por Oyama como aida p'ameyorar l'equilibriu y l'habilidá nes téuniques circulares contra oponentes múltiples.

• Taikyoku sono ichi ura
• Taikyoku sono ni ura
• Taikyoku sono san ura

• Pinan sono ichi ura
• Pinan sono ni ura
• Pinan sono san ura
• Pinan sono yon ura
• Pinan sono go ura

El combate, llamáu kumite, tien por oxetivu entrenar l'aplicación de les distintes téuniques nuna situación d'engarrada. El combate ye davezu una parte perimportante del entrenamientu na mayoría de les organizaciones de Kárate Kyokushin, sobre too nos niveles altos de los estudiantes espertos.

Na mayor parte de les organizaciones de Kyokushinkai tán torgaos los golpes de mano y coldu a la cabeza o al pescuezu. Pero permítense les pataes a la cabeza, los rodiyazos, los puñetazos al troncu y les pataes a la pierna per dientro y per fuera. En dalgunes organizaciones, especialmente fuera de los torneos, usen guantes y proteutores de tibia. Los neños avecen llevar cascos p'amenorgar l'impautu de les pataes a la cabeza. El combate hai que lu prauticar con velocidá y con control, y nel entrenamientu nun se busca mancar al oponente sinón dar con eficacia'l golpe acionáu. El combate de competición según les regles del “kárate al KO” ye bien distintu, porque l'oxetivu ye facer cayer al oponente. El combate a contautu plenu nel Kyokushinkai considérase la prueba definitiva de fuercia, resistencia y espíritu.

Tamién conocíu como Goshin-jutsu, el métodu de defensa personal específicu del estilu vien en bona parte, en cuantes a téuniques y táutiques, del estudiu del Daito-ryu Aiki-jujutsu que fizo Mas Oyama con Yoshida Kotaro. Estes téuniques nunca s'incluyeron nel sistema formal de graduación, y cuando'l Kyokushinkai foi emponiéndose cada vez más al deporte l'entrenamientu de la defensa personal foi perdiéndose. Güei solamente se prautica nunos pocos dojos.

La competición deportiva ye una parte importante del Kárate Kyokushin, y la mayoría de les organizaciones entamen competiciones llocales, nacionales y internacionales. Los torneos de Kyokushinkai fáense a lo llargo l'añu nos cinco continentes, pero los más grandes tienen llugar en Xapón, onde son televisaos y presenciaos en vivo por miles de persones. Los torneos organícense por categoríes de pesos o bien son de tipu “open”. Los Campeonatos Mundiales de Kyokushinkai conócense como los “Karate Olympics”.

Na cultura Kyokushin créyese qu'aceutar un "retu" representa'l compromisu del prauticante colos principios del arte. Una forma de participar nun retu al envís de que'l prauticante pruebe'l so valor y deséu de superar al contrariu, ye per mediu de la competición deportiva.

La mayor parte de les competiciones de Kyokushinkai siguen les regles de "kárate al KO" (más precisamente "knockdown karate"), onde se dan puntos por facer cayer al oponente per aciu de pataes, puñetazos o barríos. Normalmente nun se permite agarrar y proyeutar, o en tou casu, cuando sí se permite, hai que facelo en menos d'un segundu. Los ganchos suelen ser llegales, pero si se faen nuna 'fraición de segundu.' Los golpes de brazu o mano a la cabeza, cara, pescuezu o columna nun suelen permitise, pero sí les pataes a la cabeza. Asina y too, si l'oponente vuelve'l llombu xustamente cuando l'otru ta faciendo una téunica, nun hai penalización. Fuera de Xapón les pataes reutes al frente de la rodiya tán normalmente torgaes. A veces dase'l KO (fuera de combate), y son comunes les lesiones menores o moderaes, pero rares les graves. Les lesiones más comunes son les conmociones, les rotures de clavícula o d'esternón, y les rotures de miembros. Munchos torneos de Kyokushinkai siguen un formatu "open", que permite participar a competidores de cualesquier estilu d'artes marciales, non sólo de Kyokushinkai.

Una tradición especial del Kyokushinkai ye'l kumite con 50 o con 100 homes. El kumite con 100 homes foi diseñáu como una prueba especial pa los prauticantes avanzaos. Nestos exemplos estremos de kumite, el suxetu llucha contra 50 o 100 oponentes en socesión rápida, davezu asaltos de dos minutos separaos por descansos d'un minutu. El suxetu tien que "ganar" (esto ye, nun ser “noquiáu”) polo menos un 50 por cientu de los asaltos al envís de que se-y xulgue superada la prueba. Un exemplu de daquién que completó con ésitu'l combate contra 100 homes ye Miyuki Miura. Solamente consten 17 persones que completaren con ésitu esta prueba de combate contra 100 homes. Anguaño hai una tendencia en dojos y organizaciones de tol mundu de facer el kumite de 100 homes nel propiu país colos propios estudiantes como oponentes, pero solamente les pruebes de kumite de 100 homes organizaos pol Honbu son reconocíes y rexistraes. Masutatsu Oyama ta rexistráu como l'únicu en completar un combate contra 300 homes en tres díes.^[11][12]

El Kyokushinkai influyó en munchos otros estilos. El formatu de “kárate al KO” ye güei usáu por otros estilos. Los estilos de Kárate nacíos del Kyokushin, como l'Ashihara Karate, Budokaido, Godokai, Enshin Karate, Seido juku, Musokai, Shidokan y Seidokaikan son tamién estilos “knockdown” y tienen pequeñes variaciones nes regles de competición.

Unos pocos estilos (Kansuiryu Karate y Byakuren), orixinaos independientemente del Kyokushinkai, adoptaron tamién esti formatu de competición.

El Kokondo, anque deriváu del Kyokushinkai, nun tien competición.

Dellos otros estilos orixinaos nel Kyokushinkai (Jushindo, Daido Juku, Kudo, Zendokai) cambiaron a regles d'artes marciales mestes.

El Kickboxing tiense visto como una prollongación natural pa los competidores de Kyokushinkai, y munchos de los “kickboxers” xaponeses cimeros escomenzaron nel kárate al KO. La influyencia del Kyokushinkai pue vese nel tornéu K-1 de kickboxing, con orixe na organización de kárate Seidokaikan (surdíu del Kyokushinkai).

El Kyokushinkai ta na base del “kárate con guantes”, un formatu de kárate al KO con guantes de boxéu y onde se permiten los puñetazos al nivel de la cabeza. Les regles de kárate con guantes úsense en organizaciones deportives de kárate como Shinkaratedo Renmei y All-Japan Glove Karate Federation.^[13][14]

• IKO Matsui - Kyokushinkaikan
• Kyokushin Union
• IKO Matsushima - Kyokushinkaikan (enllaz rotu disponible n'Internet Archive; ver l'historial y la última versión).
• IKO Tetzuka - Kyokushinkaikan
• WKO Shinkyokushinkai
• Organización Internacional de Karate-do Kyokushin-kan - K.I.K.O
• IFK – Federación Internacional de Kárate
• KWO – Organización Mundial Kyokushin
• Kyokushin España
• Kyokushin Budo Kai España