Joy Division

Esti artículu o seición necesita referencies qu'apaezan nuna publicación acreitada, como revistes especializaes, monografíes, prensa diaria o páxines d'Internet fiables. Pues añadiles tu mesmu o avisar al autor principal del artículu na so páxina d'alderique pegando: {{subst:Avisu referencies|Joy Division}} ~~~~

Joy Division
Datos
Tipu	grupu musical
Miembros	Ian Curtis, Bernard Sumner, Peter Hook, Steve Brotherdale y Stephen Morris
Xéneru	Post-punk
Sellu discográficu	Factory Records (es)
País	Reinu Xuníu
Orixinarios de	Salford
Fecha fundación	1976
Web oficial

Joy Division foi un grupu de post punk que xurdió en 1977 en Manchester (Inglaterra); disolvióse en mayu de 1980 tres el suicidiu del cantante, Ian Curtis. El restu los músicos siguieran andechando nel grupu New Order, nacíu dellos meses depués. Joy Division foi un grupu perimportante nel desenrollu el estilu nomáu "rock góticu", xunto a nomes como The Cure o Siouxsie & the Banshees.

Tres dir xuntos a un conciertu de Sex Pistols en Manchester en 1976, el guitarrista Bernard Sumner y el baxista Peter Hook alcordaron entamar una banda. Gracies a un anunciu, xuniéronseyos el cantante Ian Curtis y el batería Tony Tabac.

El nome la banda foi una tema llarga, delles vegaes anunciáronse col nome "The Stiff Kittens" ("Los gatinos ríxidos") que-yos suxirió Pete Shelley del grupu punk The Buzzcocks, pero, enantes el primer conciertu (29 de mayu de 1977), xunto a los propios Buzzcocks, camudáronlu por "Warsaw" ("Varsovia"), paez que n'homenaxe a David Bowie y el so canciu "Warzsava", del discu Low.

Tres dellos camudamientos na banda, atoparon, tamién por anunciu, al batería Stephen Morris, que tenía estudiao xunto a Curtis na universidá. Morris foi'l primer batería que amuesaba pescanciar el xeitu la banda, gracies a les influencies qu'en so estilu tenía del ritmu "matemáticu" y reiterativu del krautrock alemán. Na seronda de 1977, pa dixebrase del grupu de Londres Warsaw Pakt, camudaron el nome a Joy Division.

El nome xurde del llibru La casa les muñeques, escritu en hebréu pola sobreviviente al Holocaustu Yehiel De-Nur col alcuñu Ka-Tzetnik 135633, que yera el so númberu en Auschwitz ("ka-tzenik" vién de la abreviatura alemana pa "campu de concentración", "KZ"). Nel llibru fálase de la "Freudendivision" ("División del gozu"), grupu de muyeres que el exércitu Nazi emplegaba como esclaves sexuales.

Tres espublizar el EP An Ideal for Living (xunu de 1978), la conocencia que el públicu tenía de Joy Division diba afondándose. Curtis foi portada na prestixosa revista "New Musical Express" (NME), el grupu grabó nes perfamoses sesiones "Peel" de la BBC (pol nomáu críticu John Peel) y en mayu tocaron en Londres xunto a The Cure. N'abril la banda llanzó el so discu debú, Unknown Pleasures.

Nel entamu de 1980, y col sofitu de les ventes del discu, la banda fizo una xira per Europa, pero munchos conciertos anuláronse polos problemes de salú de Curtis, la epilepsia. N'abril llancen el single "Love Will Tear Us Apart", que col percorrer los años farase el so tema más conocíu, y entamen a grabar el segundu discu. En mayu la banda alcuerda tomar dos semanes de descansu enantes la primer xira pelos Estaos Xuníos. Nesi tiempu, el matrimoniu de Curtis taba esmoronándose poles crisis psicolóxiques de Ian, pero tamién pola so infidelidá con Annick Honoré, una moza belxicana que conociera de xira.

Deborah, la muyer de Curtis, coló del pisu el 17 de mayu, mentes Ian ascuchaba el primer discu d'Iggy Pop, The Idiot, y vía una película de Werner Herzog, Stroszek; un día dempués, 18 de mayu, Deborah torna y atopa a Ian aforcáu na cocina. Magar que el suicidiu de Curtis paeció ser sólo el resultáu de problemes personales, Deborah, nel llibru Touching from a Distance, desplicaría que Ian siempre tuvo l'envís, real o ficticiu, de morrer mozo. Robert Smith, cantante de The Cure, dixo dempués que el suicidiu de Curtis llibrólu del so propiu.

En xunetu de 1980, la banda espublizó Closer, el so segundu y últimu álbum

• Ian Curtis (15 xunetu, 1956 – 18 mayu, 1980) Cantante
• Bernard Sumner (4 xineru, 1956) Guitarra
• Peter Hook (13 febreru, 1956) Baxu
• Stephen Morris (28 ochobre, 1957) Batería

• Unknown Pleasures (1979)
• Closer (1980)

• Joy Division Fans Club Archiváu 2008-07-01 en Wayback Machine
• Joy Division Central
• Joy Division - The Eternal
• Curtis, Deborah. Touching from a distance: Ian Curtis and Joy Division. Londres: Faber, 1995 (2ª ed. 2001, 3ª ed. 2005). ISBN 0-571-17445-0