Saweh

Saweh
ساوه

Saweh
ساوه

Basisdate

Staat:

Iran

Provinz:

Markazi

Koordinate:

35° 1′ N, 50° 21′ OKoordinate: 35° 1′ N, 50° 21′ O

Hööchi:

1.008 m

Iiwooner:

179.009 (2006)

Zitzoone:

UTC+3:30

Saweh (Persisch ساوه) isch e Stadt in dr Markazi Browinz im Iran. Si lit öbbe 100 km südwestlig vo Teheran.^[1]

Gschicht

Im 7. Joorhundert vor dr Zitewändi isch Saweh e Festig vo de Mede gsi. Under de Parther het si Saavakineh ghäisse, und isch e wichdigs Zentrum in iirem Riich gsi.

Im Middelalter häi d Dalaymite und d Seldschuke dört residiert. Im 13. Joorhundert isch si bi dr Invasion vo de Mongoole schweer beschäädigt worde. Die mongolische Ilchane häi d Stadt denn wider ufbaut. D Timuride (1370 bis 1507) häi Saweh blünderet und under de Safawide (16. bis 18. Joorhundert), wo in Persie dr schiitisch Islam as Staatsreligioon iigfüert häi, het si sich erhoolt und isch wider gwaggse. Wo denn in dr Middi vom 19. Joorhundert Teheran die offizielli Hauptstadt worde isch, het d Stadt vil vo iirer Wichdigkäit verloore und e Hufe Lüt si in die nöji Hauptstadt züüglet.

Dr Marco Polo isch uf em Wääg zum mongolische Groosskhan z Saweh verbii choo und verzellt in sim Buech Il Milione, ass die häilige drei Köönig dört begraabe sige.