Raclette

Raclette
Herstelligsland	Schwiz
Herstelligsregion	Kanton Wallis Zentral- und Ostschwiz Sawoje
Milch	Chuemilch
Lagerigszit	3–6 Mönet

S Raclette (vo franzöösisch racler «schabe», «chratze») isch – näben em Fondü – äins vo de Schwizer Nazionalgricht, wo mit gschmolznigem Chees gmacht wärde. D Cheessorte, wo mä maistens verwändet, isch e Schnittchees vo dr Vollfett- oder Raamstuefe, wo liicht schmilzt und wo au as Raclette bezäichnet wird.

Die ersti schriftligi Erwäänig vo Raclette chunnt in middelalterlige Chlosterhandschrifte us de Kantön Obwalde und Nidwalde vor, wo vom ene Brootchees as ere bsundrigs naarhafte Spiis vo de Alphirte brichdet wird. Unterwaldner Brootchees isch au hüte no en Alternative zum Raclette.

Zum Chees serwiert mä hüte Gschwellti, suur Gurke, Essigziibele, Sämffrücht usw. Es git e Hufe Sorte vo Raclettechees, wo au mit Chnoblauch, Pfäffer oder Paprika oder us Gäissemilch härgstellt wärde.

Noch dr Walliser Dradizioon wird e halbe Laib vo bsundrigs fiinschmelzigem vollfettem Walliser Chees so nooch zum Füür gläit, ass er langsam foot afo schmelze. Drbii wird dr Chees au no gröicheret und grilliert und mä bechunnt dr umverwäggselbari Gschmack vom ächte Raclette, wo am Füür gmacht worde isch. Dr Choch kümmeret sich mäistens au um s Füür. Hinde nooche brennt das hooch aber vorne het s nume Gluet und dört lige die zwäi Cheeshelftene uf eme Brätt, wo mit Alufolie iigwigglet isch (dä Däil vo dr Dradizioon isch nit ganz eso alt), mit de Schnittflechene zur Gluet. So cha immer äi Chees schmelze, wääred vom anderen mit em Rugge vom ene Mässer e Borzion «Raclette» uf e Däller abgschabt wird.

Näben em kulinarische Gnuss isch s Zämmehocke am Laagerfüür wichdig. E Raclette-Oobe isch meereri Stunde lang. Scho d Vorbereitig brucht Zit: mä muess Holz sueche, s Füür mache und warte bis es Gluet git. Bim Ässe wird immer äi Borzion noch dr andere serwiert, und jede cha meereri Borzione überchoo.

 Commons: Raclette – Sammlig vo Multimediadateie

• Raclette du Valais, fromage à raclette, raclette i de Datebank vom Kulinarische Erb vo de Schwiz (französisch)
• Agroscope: Raclette uf agroscope.admin.ch
• Geschichte der Raclettegeräte uf ttmsa.ch
• Gehört Raclette dem Wallis? – Episoden eines Käse-Streits Artikel i de NZZ vom 3. Februar 2007
• VALDOR: Walliser Raclette AOC aus den Dorfkäsereien uf valdor.ch
• Sortenorganisation Raclette AOC uf raclette-du-valais.ch

Dä Artikel basiert uff ere fräie Übersetzig vum Artikel „Raclette“ vu de dütsche Wikipedia. E Liste vu de Autore un Versione isch do z finde.