Chandragupta Maurya

Dr Chandragupta Maurya († woorschinlig 297 v. d. Z. isch dr Gründer vom Maurya-Riich uf em Indische Subkontinänt gsi. Er gältet as äine vo de groosse indische Herrscher. Die antike Grieche häi en as Sandrokottos kennt.

Über e Chandragupta und si Zit wäiss mä mee as über anderi Zitabschnitt vo dr früeje indische Gschicht dank de Edikt vom Mauryaköönig Ashoka und Wärke vo griechische Autore, drunder dr Megasthenes, wo e Botschafter vo de Selöikide z Pataliputra (hüte Patna) gsi isch.

Vo wo dr Chandragupta cho isch, wäiss mä nid grnau. Er isch woorschinlig vor em Köönig vo de Nanda us Pataliputra gflüchtet, het en Armee ufgstellt und um 322/21 v. d. Z., churz noch em Indiefäldzuug vom Alexander em Groosse, Pataliputra erooberet, dr letscht Köönig vo de Nanda umbrocht und däm si Noochfolger as Herrscher vo Magadha worde. Dr Chandragupta het gege die makedonisch-griechische Drubbe gkämpft, wo dr Alexander und däm sini Noochfolger, d Diadoche, in Indie gloo häi.

Noch em Dood vom Poros im Joor 317 v. d. Z. het dr Chandragupta däm si Riich am Indus anektiert und bald dr Nordweste vom Subkontinänt kontrolliert.

Wo dr Selöikideköönig Seleukos I. 305 v. d. Z. im Punjab iigfalle isch, het er mit em Chandragupta müesse verhandle, wil däm si Armee vil sterker gsi isch. Dr Mauryaköönig het e Dochder vom Selöikos ghürootet und dä het em Gebiet westlig vom Indus abdräte, drunder au Gandhara und Belutschistan, und het em drfür 500 Chriegselefante gee, won er in de Diadochekämpf guet het chönne bruuche. Die diplomatische Kontakt zwüsche de bäide Riich si ufrächt erhalte worde.

S Riich vo de Maurya het bald dr ganz Subkontinänt unfasst, usser em süüdligste Zipfel. Es gseet us, ass es straff und effizient organisiert gsi isch und au en effektive Ghäimdienst ghaa het. Gege s Ändi vo sim Lääbe häig sich dr Chandragupta zum Jainismus bekeert und häig as Mönch bis zum Dood gfastet. Si Soon Bindusara het noch em dr Droon bestiige.

• Purushottam Lal Bhargava: Chandragupta Maurya. 2. Aufl., New Delhi 1996, ISBN 81-246-0056-2.
• Waldemar Heckel: Who’s Who in the Age of Alexander the Great: Prosopography of Alexander’s Empire. Blackwell, Oxford 2006, S. 244f.
• Hermann Kulke, Dietmar Rothermund: Geschichte Indiens. Von der Induskultur bis heute. Aktual. Neuauflage. Beck, München 2006, S. 78ff.
• Michael Witzel: Das alte Indien. Beck, München 2003, S. 78–80.

Dä Artikel basiert uff ere fräie Übersetzig vum Artikel „Chandragupta_Maurya“ vu de dütsche Wikipedia. E Liste vu de Autore un Versione isch do z finde.