Christlichi Zittrechnig

Die christlich Zittrechnig oder au Christlich Ära isch d Zellig vu dr Johre vum agnummene Burtsjohr Jesu a. Im dytsche Sprochrüm werre de Johre noch Christi Burt yblicherwiis mit n. Chr abchürzt, sälli devor mit v. Chr.

Die noochchristligi Ära heisst dorum au Johrzellig Anno Domini (latinisch fer im Johr vum Herr), abch. AD - eso in englischsprochige Länder yblich.

Wie alli Kalenderäre chennt au die christlich Ära kei Nulljohr als Afang. D'Astronomi verwendet allerdings e Nulljohr un schribt d Johre devor mit eme negative Vorzeiche. D. h. aber, dass s Johr 0 vu dr Astronomi im Johr 1 v. Chr, entspricht, s Johr -1 im Johr 2 v. Chr. usw.

Die christlich Ära setzt inzwische in allene Staate, wo si verwendet wird, uffem Gregorianische Kalender fer d Ideilig vum Johr un d Festlegig vu Schaltjohre uf. Menki Religionsgmeinschafte benutze aber noch die christlich Ära mit eme Julianische Kalender.

Vume e eigene "christliche Kalender" cha mer agsichts vu dr regionale un konfessionelle Underschid im Christetum, wo scho sit dr Spotantike starch usprägt gsi si, nit schwätze. Sälle Begriff isch irrefüehrend, wil er dr Gregorianisch Kalender mit em Chilchejohr vermengt.

E Fählinterpretation, wo ebefalls witt verbreitet isch, isch d'Meinig, dass dr Julianisch oder dr Gregorianisch Kalender ebbis mit unserer Zittrechnig, im besundere mit dr Zellig vu dr Johr, z due häb. Zuemindist fer dr Julianisch Kalender, wo 46 v. Chr. igfüehrt worde isch, isch säll jo offesichtlich nit dr Fall.

Es git no anderi Abchürzige wo dr Bezugspunkt zwar au s ‹Geburtsjoor› vom Jesus isch, aber dr christligi Zämmehang nid bedoont wird, wie s in dr ehemoolige DDR üblig gsi isch. Das si v. u. Z. („vor unserer Ziträchnig“) und u. Z. („unseri Ziträchng“ bzw. „unseri Zit“) und v. d. Z. („vor dr Zitwändi“) und n. d. Z. („noch dr Zitwändi“). Deene entspräche im Änglische BCE (before [the] Common Era; „vor em gwöönlige Zitalter“) und CE ([of the] Common Era; „vom gwöönlige Zitalter“). D Bezäichnig Common Era wird uf e Begriff vulgar era („gwöönligs Zitalter“) zrugggfüert, wo im früeje 17. Joorhundert zum erste Mol beläit isch. CE wird mänggisch au as Current Era („gegewärtigs Zitalter“) und wider christianisierend Christian Era („christligs Zitalter“) interpretiert. S dütsche Chr. wird mänggisch as Chronologii dütet, zum e religiööse Bezug vo dr Ziträchnig z vermiide.^[1]

1. ↑ Noch eme Abschnitt us em Ardikel [1] uf dr dütsche Wikipedia.