Alexi Decurtins

Der Alexi Decurtins, wo am 20. Novämber 1923 z Truns uf d Wält cho und am 7. Jänner 2024 z Chur gstorben^[1] isch, isch e Schwiizer Romanischt und Wörterbuechredakter gsi.

Sy Vatter isch us der Surselva gsi und sy Muetter us em Surmeir. Er isch z Disentis ufs Gimnasium gange un het de z Züri, z Perugia un z Paris die Romanischi Filology studiert. 1958 het er s Dokterexame gmacht. Drufabe het der Decurtins z’eerscht a der Bündner Kanti z Chur Schuel ggää. Dernäbe het er mit synere Forschigsarbet zu der bündnerromanische Sprooch agfange, und scho gly isch er zum romanische Wörterbuech Dicziunari Rumantsch Grischun cho, won er 1955 bim Andrea Schorta als Redakter gschaffet het und 1975 sälber Scheffredakter worden isch.

1957 bis 1988 het er a der Uni Fryburg Rätoromanisch glehrt.

1962 und 1975 isch i zwöi Bänd s Surselvisch-Dütsche Wörterbuech usecho, wo der Decurtins mit em Ramun Vieli synere Hilf gmacht het. Wo der Alexi Decurtins 1988 bim Dicziunari pensioniert worden isch, het er de s Nöie Surselvisch-Dütsche Wörterbuech zämegstellt. D Lia Rumantscha, wo am Afang no für das Projäkt gsi isch, het sech de schynts nümme dra beteiliget, wil si sech uf die nöji bündnerromanischi Standardsprooch Rumantsch Grischun het welle fokussiere. Em Decurtins sys Wörterbuech isch aber einewäg usecho und het sech guet verchauft.

Iim sys nöchschte Wäärch isch s Lexicon Romontsch Cumparativ, won er zäme mit der Societad Retorumantscha gmacht het. Do drinn tuet er d Wörter vo de verschidene romanischen Idioon verglyche.

Der Alexi Decurtins het mängen Artikel über d Bündner Sprooch und Literatur gschribe. 1991 het men em der Bündner Kulturprys gää. Er isch au Ehremitgliid vo der Sproochvereinigung Romania und Ehredokter vo der Uni Bäärn gsi.

Literatur

Clà Riatsch: Alexi Decurtins In: Historisches Lexikon vo dr Schwiiz.
Guido Condrau: Prof. Dr. phil Alexi Decurtins, 90. proidioms.ch, 2013, S. 1–4.
Bündner Sprachkoryphäe wird 90 Jahre alt, 19. Novämber 2013, uf suedostschweiz.ch
Hans Stricker (u. a.): Bibliografia dallas ovras da prof. dr. Alexi Decurtins. In: Annalas da la Societad Retorumantscha, 96, 1983, S. 209–218.

Weblink

d Websyte vom Decurtins sym Niev Vocabulari Romontsch Sursilvan

Fuessnote

↑ Der Doyen des Bündnerromanischen ist tot. I: Südostschweiz vom 8. Jänner 2024.

[1] Der Doyen des Bündnerromanischen ist tot. I: Südostschweiz vom 8. Jänner 2024.

[1]