Osmanischi Archidektuur

Osmanischi Archidektuur isch dr Ooberbegriff für d Archidektuur vom Osmanische Riich (öbbe 1300–1923) in sim Kärngebiet, em Balkaan (Rumelie) und Chläiasie (Anatolie). En äihäitlige Archidektuurstiil het s aber nit gee, au wenn die bäide Regioone dur die representative und monumentaale Bauwärk in dr Hauptstadt Istanbul brägt worde si. Bedütendi osmanischi Baute si au in de ehemoolige Hauptstedt Edirne und Bursa, und in de Zentre vo dr osmanische Kultuur am Balkaan (z Skopje, Sarajevo, Sofia etc.) erhalte. D Archidektuur vo de arabische Browinze vom Osmanische Riich (z. B. Palestina, Egüpte) zelt mä mäistens nid drzue.

Bi de seldschukische Vorfaare vo de Osmaane häi au hans (Karawansereie) und Medresse zu de bedütendste Bauwärk zelt, bi de Osmane hingeege si d Moscheä wichdiger gsi as alli andere Bautüpe. Wil die eltere Woonhüüser, wo s no git, mäistens us em 19. Joorhundert stamme und sältener us em achzäänte, wäiss mä nume weenig über e Woonbau in de früenere Epoche. E reegelrächts Archidektuurmuseum isch andrersits dr Topkapı-Komplex z Istanbul, wo jede osmanisch Sultan, wo zwüschen em 16. und 19. Joorhundert gherrscht het, e Bawillion oder en anders Bauwärk drzuebaut het. Dr Topkapı sarayı isch dorum eender e Herrschaftskomplex, wo organisch gwaggse isch, as e „Balast“ im öiropäische Sinn. Bemerkenswärt si au die osmanische Brünne (çeşme) und Wasserspänder (sebil), wo bsundrigs im 18. Joorhundert as äigeständigi Kunstwärk an Bedütig gwunne häi und nit nume räini Nutzobjekt gsi si.

As Glanzzit vo dr osmanische Archidektuur gältet s 16. Joorhundert, wo dr grösst osmanisch Archidekt gschafft het, dr Sinan.

• Goodwin, Godfrey: A History of Ottoman Architecture. Thames and Hudson, London 1971.
• Nur Akın, Afife Batur, Selçuk Batur (Hrsg.): 7 Centuries of Ottoman architecture. “A Supra-National Heritage”. YEM, Istanbul 2000.
• Machiel Kiel: Studies on the Ottoman Architecture of the Balkans. Variorum, Aldershot 1990.
• Kuran, Aptullah: "Eighteenth Century Ottoman Architecture", in: Studies in Eighteenth Century History. Hrsg. von Thomas Naff und Roger Owen. Feffer & Simons, London und Amsterdam 1977. S. 303–327.

 Commons: Osmanische Architektur – Sammlig vo Multimediadateie

• Website on architecture of the Ottoman architect Sinan
• Győző Gerő: Balkanische Einflüsse in der türkischen Moschee-baukunst Ungarns im 16.–17. Jahrhundert. in: EJOS, IV 2001 (= M. Kiel, N. Landman & H. Theunissen (Hrsg.): Proceedings of the 11th International Congress of Turkish Art. Utrecht - The Netherlands, 23.-28. August, 1999), Nr. 20, 1-7. (Site cha nüme abgrüeft wärde; Suche im Webarchiv)[1] [2] Vorlage:Toter Link/www2.hum.uu.nl Bsuecht am 13. April 2008
• Bilder, Artikel, Grundriss, Architekte vo Hunderte vo Bauwärk uf archnet.org

Dä Artikel basiert uff ere fräie Übersetzig vum Artikel „Osmanische_Architektur“ vu de dütsche Wikipedia. E Liste vu de Autore un Versione isch do z finde.