Hedschra
D Hedschra, au Hidschra, (arabisch هجرة DMG: hiǧra, vo dr Wurzle هجر »verlo«) bezeichnet d Uswanderig vom Mohammed vo Mekka noch Medina am 16. Juli 622 noch dr Ziitwändi und markiert dr Afang vom Mondkaländer vo dr islamische Ziiträchnig. Au die iranisch Ziiträchnig fot mit der Hedschra a, aber ihri Johr si Sunnejohr, wie si au im gregorianische Kaländer verwändet wärde.
Scho im Johr 615 si d Ahänger vom Mohammed in ere erste Hedschra us em heidnische Mekka ins christlige Äthiopie emigriert. Dr Mohammed isch 622 noch Medina zoge—die „eigentligi“ Hedschra.
Z Mekka isch dr Mohammed verhasst gsi und verfolgt worde, z Medina isch er schnäll e gachtete Staatsma und Stifder von ere Religion worde. Dr Staat won er gründet het, het sech in churzer Ziit noch siim Dod zum ene islamische Grossriich entwicklet.
D Bedütig vo dr Hedschra im Islam
ändereD Hedschra het e zentrali Stellig im Islam. D Koranwüsseschaftler hai alli Sure vom Koran in „mekkanischi“ und „medinensischi“ Sure iideilt. Die Iideilig isch nit unumstritte, aber der Grossdeil vo dr Iideilig wird as sicher betrachtet. Die mekkanische Sure underscheide sech vo de medinensische u. a. in ihrer Lengi—alli lange Sure stamme us Medina—in dr Qualität—z Medina si meh braktischi Glaubensregle offebart worde—und deilwiis in ihrem Bezugspunkt, die politischi Lag z Medina oder z Mekka.
| Dä Artikel basiert uff ere fräie Übersetzig vum Artikel „Hedschra“ vu de dütsche Wikipedia. E Liste vu de Autore un Versione isch do z finde. |