E.E. Cummings

E.E. Cummings (1894-1962) was een van die belangrikste vernuwers van die moderne Amerikaanse digkuns aan die begin van die 20e eeu. Sedert sy eerste werk in 1917 gepubliseer is en sy naam daarby weens 'n setfout in kleinletters verskyn het, teken hy sy naam met kleinletters. Verskeie literêre pryse is aan hom toegeken. Hy was ook 'n skilder, roman- en toneelskrywer.

Edward Estlin Cummings is op 14 Oktober 1894 in Cambridge, Massachusetts, gebore. Hy het Engels en klassieke tale aan die Harvard-universiteit gestudeer en die MA-graad in 1916 behaal. Gedurende die Eerste Wêreldoorlog was hy 'n ambulansbestuurder in Frankryk en is 'n tyd lank in 'n militêre strafkamp aangehou omdat hy van ondermyning verdink is. Ná die oorlog het hy hom in Parys gevestig en onder meer met Picasso en Ezra Pound bevriend geraak. Sedert 1924 het hy ook afwisselend in New York gewoon en baie gereis.

Cummings se eerste gedigte het in 1917 in 'n publikasie genaamd Eight Harvard poets, verskyn. In 1922 het sy eerste boek, The Enormous Room, verskyn wat gebaseer is op sy ervarings in die Franse strafkamp. Sy eerste digbundel was Tulips en Chimneys (1923). Daarná het & en XLI (1925) en Is 5 (1926) verskyn. Die talle gedigte wat hy later geskryf het, is uitgegee in bundels soos Poems: 1923-1954 (1954), 95 poems (1958) en 73 poems (1963). Sy poësie word gekenmerk deur ekspressiewe en uiters individuele woordgebruik, afwykende grammatika, die gebruik van ou versvorme in skynbaar vrye verse en 'n punktuasie en woordafbreking.

Ander werke van Cummings is onder meer die toneelstuk him (1927) en Tom (1935), waarin hy Harriet Beecher Stowe se Uncle Tom's Cabin satiriseer en Santa Claus (1946). In Eimi (1933) val hy die beperking van die individuele vryheid in die Sowjetunie aan in die vorm van eksperimentele prosa. Die belangwekkende Charles Eliot Norton- Iesings, wat hy in 1952 by die Harvard-universiteit gelewer het, het in 1953 as I, six nonlectures verskyn. Verskeie van sy tekeninge en skilderye is in CIOPW (1981) gebundel.

• Wêreldspektrum, Volume 4, bl.194-195, ISBN 0908409451

Hierdie artikel is ’n saadjie. Voel vry om Wikipedia te help deur dit uit te brei.