投資組合
喺金融學上，一個投資組合（portfolio，粵拼：pou6 fou1 li4 ou4）係指由一間投資公司、對沖基金或者個人持有嘅一柞投資，例如係一個人手上持有嘅所有股票噉。
理想特徵
[編輯]多角
[編輯]内文：多角投資
一般認為，一個投資組合應該要多角先得，即係
- 要揸多種資產：投資可以透過好多種唔同嘅資產嚟做，包括股票、債券、不動產、貴金屬同外匯... 呀噉。例子可以想像一位鍾意低風險投資嘅投資者，手上揸住債券、貴金屬同埋一定量嘅外匯... 等好幾種風險偏低嘅資產。
- 要揸多個 sector（粵拼：sek1 taa4）嘅資產：投資風險好多時都係會集中於打擊某個 sector 嘅；例如家陣政府話要立法，要限住啲人每個禮拜可以用幾多個鐘頭嚟上社交媒體，噉搞社交媒體嘅公司啲股價好有可能會受到打擊，如果一位投資者揸嘅股票冚唪唥都係社交媒體公司嘅，噉佢就會有相當嘅損失，而相比之下，如果佢揸吓社交媒體公司嘅股票同時又揸吓快餐店公司嘅股票，就冇咁易受制於呢啲專打擊某個 sector 嘅風險。
- 要揸多個地區嘅資產：例如想像而家美國經濟衰退，噉美國相關嘅資產（例如係好多美國公司嘅股票，或者買嚟做外匯投資嘅美金）好有可能價值會跟住跌；如果有位投資者一味淨係揸呢啲基於美國嘅資產，佢就會有損失；一位比較多角化投資者，往往會（例如）手上揸啲基於美國嘅資產、又會揸啲基於日本嘅資產、又會揸啲基於歐洲嘅資產。
... 呀噉。
