上環

  想搵香港區議會選區嘅話，請睇上環 (選區)。

上環（英文：Sheung Wan），香港一地，響港島北岸，屬中西區，域多厘城四環之一，北面係維港，南面係半山，東面係中環，西面係西營盤（西環）。地標有信德中心、西港城、永安中心咁，亦有唔少中資企業辦事處。因為近海，好多碼頭都響呢區，其中就有過澳門嘅港澳碼頭。

上環個環，係唐人居住區嘅叫法。上環原本叫下環，建於裙帶路村一帶。今日文咸街向西，就係唐人最初建屋地，之後皇后街，再向太平山拓展。

上環東起急庇利街，西至東邊街，北便望海，南便去到堅道，約莫有49英畝，乃係香港開埠早期嘅旺地，居民多數係潮州冷。話明係舊區就零舍多舊嘢。摩囉街與及荷里活道通街都係古董，文咸東文咸西有好多南北行賣參茸海味。行經德輔道西、東邊街，奉旨一朕除，事關此地鹹魚欄共雜貨舖，重多過隔離干諾道西嘅米舖。

聞說荷李活道文武廟（建於1847年）同東華醫院（建於1870年），乃係開埠初期本港華人勢力標記。事緣當其時英國佬唔理唐人福址，有乜頭暈身慶都無乜符弗。多得呢兩間善舘，幫唐人排難解紛、贈醫施藥。廟祝同院長重時不時響港督面前幫唐人講說話。

開埠初期好多唐人響太平山打蠆，事關1843年港府落柯打將中環山坡唐人趕嚟呢處。據書所載^[1]，1845年嗰陣域多利城（其後改名維多利亞城）經已有唐人舖頭388間，其中太平山就有121間，可見呢處旺得幾緊要。為因人多得滯，周圍就越嚟越污糟。1894年大瘟疫，屍橫遍野。港府為此大舉清拆舊屋重建。

上環西便到督就係水坑口。古時候有條山瀾，流經家下皇后大道東出海，呢條山瀾就叫水坑口。瀾水好多龍蝦，故此對面海狗爬徑（其後改名九華徑）村民周不時揸艇嚟捉。曾幾何時，港府填海，將水坑口鋪晒石屎再起樓。瘦田冇人耕，耕開有人爭，去到19世紀尾，呢處變咗港島名流出入嘅宴會酬酢之地。當旺時，水坑口左近數埋有成十幾間酒樓，即如「宴瓊林」、「聚興樓」^[2]等等等等。當其時南北行商賈、銀號錢莊老闆、買賣地皮嘅有錢佬周不時都出入呢處，上半場傾生意，下半場就開廳踏艇尋歡作樂。故此，呢處亦曾係全港島獨一無二煙花之地。風月場所多如牛毛，其中大寨（貴格妓寨）有四間：「錦繡堂」、「歡得」、「奇花」、「新三花」。此外，私寨（低等妓寨）、煙舘同埋大檔（賭舘）都開到成行成市。其後港府於1903年大舉冚水坑口妓寨，通通趕晒去石塘咀。自此水坑口轉做正行生意，疋頭舖、糧食舖、雜貨舖再現，之不過，就冇往日咁墟撼。

• 荷里活道係全港島第一條馬路。
• 東華醫院係全港島第一間醫唐人嘅慈善醫院。

維基同享有多媒體嘅嘢：
Sheung Wan