動機（粵拼：dung6 gei1；英文：motivation）係指一個心靈「想做某樣嘢」嘅動力，通常起源自個心靈嘅目的。
工作動機係指做嘢嘅動機，係組織心理學成日研究嘅嘢。
人做嘢嘅動機可以分做外在（extrinsic）同內在（intrinsic）兩大類；外在動機係指個人做一樣嘢係為咗想要攞到某啲回報（例如錢），一冇咗嗰樣回報就唔會再想做嗰樣嘢（冇錢嘅話就唔開工），而內在動機就係指個人做一樣嘢係因為覺得樣嘢過癮，就算冇回報都會照做（例如一個老師覺得教書好有意義，就算冇糧出冇人迫佢，佢都肯加班）。