Puškino

Puškino
Пушкино

Flag
Valdkund	Venäma
Eläjiden lugu (2020)	107,580 ristitud
Pind	60,33 km²
Telefonkod	+7−496−53x-xx-xx. +7−496−58x-xx-xx
Avtokod	50, 90, 150, 190, 750
Aigvö	UTC+3 (MSK+0)

Puškino (ven.: Пу́шкино) om Venäman lidn Moskvan agjan keskuzpalan pohjoižpäivnouzmas. Se om Puškinon lidnümbrikon administrativine keskuz da kaikiš suremb lidn koumespäi, agjan 17..19nz' lidn eläjiden lugun mödhe, Moskvan pohjoižpäivnouzmaine ezilidn.

Eländpunkt mainitase vspäi 1499 kuti Pučkino- vai Puškino-žilo torguindtenno Pereslavl'-Zalesskijannoks. Nimitihe Puč-jogen (ven.: Пуча), Puškinad-rodun vai juraižimiden tehmižen mödhe (ven. пушка). Vl 1771 kaik žilon eläjad koliba mustmoraspäi. Aigan mändes žilo kändihe tegimiden keskuseks: vatken manufaktur, sobiden sišpäi edheotand, vas'ktegim. Vl 1862 raudte radaškanzi Sergijev Posadannoks, i saudihe Puškino-raudtestancijad koumes kilometras žilospäi. Kezaküläpertiden Puškino-žilo stancijanno oli tetab vspäi 1867. Ühtenzoittud radnikžilo sai lidnan statusad vn 1925 17. päiväl elokud. Oli rajonan keskuseks vspäi 1929. Mülütihe lidnha lähižid žiloid vll 2002−2003.

Puškino šingotase sauvondmaterialiden pästandal (turušknitud, iknad), sömtegimištol (jauh i leibänproduktad, likörvintegim, lihan edheotand), tekstilin i kengiden tehmižel, elektromehanižel tegimel, tehnižvoiden, fil'triden, kertehpakuitesen, avtotesauvondan i logistikan edheotandoil. Mecan i mecmašinansauvomižen tedoiduzkeskused ratas lidnas mugažo.

Lidn sijadase lidnümbrikon suviröunal, Učanjogen molembil randoil (ven.: Уча 42 km pitte, Kläz'man hura ližajogi), 160 m ü.m.t. keskmäižel korktusel. Učan vezivaradim (19,3 km²) om ani päivlaskmha-lodeheze lidnaspäi, ottas sen vet Moskvan varatoitandan täht. Serebränk-jogi (padoseinänke) läbitab lidnan pohjoižpäivnouzmad i lankteb Učha huralpäi. Matkad Moskvhasai (Moskvan rengazavtotehesai) om 17 km suvipäivlaskmha. Toižed lähembaižed lidnad (orhal) oma Ivantejevk ani päivnouzmha i suvipäivnouzmha, Fräzino 10 km päivnouzmha, Ščolkovo 8 km suvipäivnouzmha, Korolöv 3 km suvhe, Mitišči kahtes kilometras suvipäivlaskmha.

Raudte jagab lidnan poleti. Puškino-raudtestancii radab lidnan keskuzpalas «Moskv — Jaroslavl'»-keskustal vspäi 1862, elektrojonused tuldas Moskvan Jaroslavlin päraudtestancijaspäi. Toine platform om Il'jičan Zavetoičendad lidnan pohjoižes. «Holmogori»-mante (M8-trass) om lidnan päivnouzmaižeks röunaks, Jaroslavlin šosse sarakoičese sišpäi i läbitab lidnan päivnouzmad.

Lidnan mikrorajonad: Dzeržinec, Serebränk, I. Armandan nimed, Mamontovk, Zvägino, Kläz'm, Kudrink, Uz' Derüun, Il'jičan Zavetoičendad, Kavezino, Jogidenkeskeine. Om kezaküliden kooperativid.

Vl 1939 lidnan ristitišt oli 21 081 eläjad, vl 1959 — 30 035 eläjad. Vn 2010 Venäman rahvahanlugemižen mödhe lidnan eläjiden lugu oli 102 874 ristutud, rajonan (nüg. lidnümbrik) koume videndest. Kaikiš suremb lidnan ristitišt om enamba 105 tuh. rist. vspäi 2014 (108 253 rist. vl 2015).

Rahvahad (2010): venälaižed — 93,1 %, ukrainalaižed — 1,8 %, totarlaižed — 1,0 %, toižed rahvahad — 4,1 %.

Ortodoksižen hristanuskondan kahesa jumalanpertid^[1] i kaks' časounäd oma saudud lidnas.

Moskvan agjan medkolledž nomer 4^[2] i Moskvan agjan muzikkolledž^[3] oma lidnan professionaližen opendusen aluzkundoikš.

• 
  Kaiken Venäman mecmašinansauvomižen tedoinstitut kesked dendrarijad
• 
  Nikolo-Bogolübskii kompleks, vn 2016 nägu
• 
  «Pobeda»-kinoteatr («Vägestuz»)
• 
  Puškino-päraudtestancii vl 2011

• Puškin (Piterin lidn)

1. ↑ Puškinon pühäpertid sobory.ru-saital. (ven.)
2. ↑ Moskvan agjan medkolledžan nomer 4 sait (pmcolledge-mo.ru). (ven.)
3. ↑ Moskvan agjan muzikkolledžan sait (prokofievcollege.ru). (ven.)

• Lidnümbrikon tobmuden sait (adm-pushkino.ru). (ven.)

Puškino Vikiaitas