Ivantejevk

Ivantejevk
Ивантеевка

Lidnanznam	Flag
Valdkund	Venäma
Eläjiden lugu (2020)	81,254 ristitud
Pind	14,59 km²
Pämez'	Maksim Krasnocvetov (tal'vku 2018—)
Telefonkod	+7−496-xxx-xx-xx
Avtokod	50, 90, 150, 190, 750
Aigvö	UTC+3 (MSK+0)

Ivantejevk (ven.: Иванте́евка) om Venäman lidn Moskvan agjan keskuzpalan pohjoižpäivnouzmas, Puškinon lidnümbrikon kahtenz' surtte lidn koumespäi (edel 2021. vot lidn oli lidnümbrikoks ičeksaz). Se om Moskvan pohjoižpäivnouzmaine ezilidn, agjan 24nz' lidn eläjiden lugun mödhe.

Eländpunktan aluz om pandud vl 1564 kuti Vantejevo-žilo (i lähine Kopnino, mainitase село Копнино и Ванте́ево тож). Vll 1576−1628 Vantejevo-külä oli Stroican jumalankodin tobmuden al. Kaik koume fabrikad radoiba žilonno 18. voz'sadaspäi: vatken, kirjutandbumagan i špaleroiden. Nell' fabrikad oliba rados vodele 1917: kaks' tekstilišt, kanghiden mujutandan, villan kezerdusen. Kätihe Ivantejevskii-radnikžiloks vn 1928 21. päiväl semendkud. Raudte ühtenzoiti Moskvanke vll 1929−1930. Vl 1931 ühtištadihe tekstil'fabrikoid trikotažkombinataks. Mülütihe lähižid žiloid da anttihe lidnan statusad nügüdläiženke nimitusenke vn 1938 uhokus.

Ivantejevk šingotase sauvondan betonsol'mel i edheotandoil (betonantegimed, raudbetontegesed, metalližen vanundan varažomad, elektrolämbitusen sistemad), sömtegimištol (leibänkombinat, oluden tegim) i mecan tedokeskusel. Vaiše pened tekstiližed edheotandad jäihe rados nügüd'.

Lidn sijadase Uč-jogen randoil (ven.: Уча́ 42 km pitte, Kläz'man hura ližajogi), 150 m ü.m.t. keskmäižel korktusel. Matkad Moskvhasai (Moskvan rengazavtotehesai) om 17 km suvipäivlaskmha. Lähembaižed lidnad oma Puškino ani päivlaskmha i lodeheze, Fräzino 5 km päivnouzmha, Ščolkovo kahtes kilometras suvipäivnouzmha, Korolöv ühtes kilometras suvipäivlaskmha.

Ivantejevk-2-, Ivantejevk- (edeline vspäi 1936, nüg. vspäi 1967) i Detskai- (vspäi 1946) raudteplatformad ratas «Moskv (Jaroslavlin päraudtestancii) — Fräzino»-keskustal. «Holmogori»-avtote (M8-trass) mäneb ühtes..koumes kilometras päivlaskmha lidnaspäi.

Ivantejevk oli lidnümbrikon üks'jäižeks eländpunktaks. Lidn röunatab Korolövanke suves, Ščolkovon lidnümbrikonke päivnouzmas.

Vl 1939 lidnan ristitišt oli 22 207 eläjad, vl 1959 — 30 945 eläjad. Vn 2010 Venäman rahvahanlugemižen mödhe lidnan eläjiden lugu oli 58 626 ristutud. Kaikiš suremb lidnan ristitišt om nügüd'.

Rahvahad (2010): venälaižed — 93,0 %, ukrainalaižed — 1,6 %, armenijalaižed — 1,1 %, toižed rahvahad — 4,3 %.

Moskvan politehnižen universitetan Ivantejevkan filial^[1] i Moskvan telikundan inspekcijan openduzkeskuz oma lidnan professionaližen opendusen aluzkundoikš.

• 
  Lidnümbrikon tobmuden sauvuz (2010)
• 
  Jumalanmaman Smolenskan jumalaižen pühäpert' (om saudud vl 1808), vn 2013 nägu
• 
  «Olimp»-sportpert'kulu (2015)
• 
  Lidnan läžundkodin hirurgine korpus (2010)

1. ↑ Moskvan politehnine universitet — Ivantejevkan filialan sait (ivanteevka.mospolytech.ru). (ven.)

• Enččen lidnümbrikon tobmuden sait (ivanteevka.org) da sen vanh versii. (ven.)
• Lidnan informacine sait (inivanteevka.ru). (ven.)

Ivantejevk Vikiaitas