Dolinsk

Dolinsk
Долинск

Lidnanznam	Flag
Valdkund	Venäma
Eläjiden lugu (2023)	11,731 ristitud
Pind	11 km²
Pämez'	Aleksandr Tugarev (sügüz'ku 2016—)
Telefonkod	+7−42 442-xx-xxx
Avtokod	65
Aigvö	UTC+11 (MSK+8)

Dolinsk (ven.: До́линск, japon.: ドリンスク Dorinsku, edel 1946. vot — japon.: 落合 Otiai) om Venäman lidn Sahalinan agjan Sahalin-saren suves. Se om Dolinskan lidnümbrikon administrativine keskuz (edel 2006. vot — rajonan).

Eländpunktan aluz om pandud Venäman imperijha Galkino-Vrasskoje-žiloks elänzoitmaha tahondad ainalaižiden külidenno vl 1884 Naibuči-kaičendsodapostan sijas (tetihe vspäi 1867). Vozil 1905−1945 oli Japonijan palaks, šingotihe cellülozbumagaižel fabrikal. Vl 1911 raudte ühtenzoiti žilod Tojoharanke. Sai lidnan statusad vn 1946 5. kezakud, sirtihe sihe kükstud mehid tobjimalaz. NSTÜ:n aigan tehtihe äi erazvuittušt bumagad tegimel, oludtegim i maidtegim radoiba.

Dolinsk šingotase mehanižel tegimel, leibänkombinatal i mecan ümbriradmižel (pilindmaterialad).

Lidn sijadase Naib-jogen (ven.: На́йба, ainan kelel: Naibuči) i sen oiktan Sur' Takoi-ližajogen (ven.: Большой Такой) ühthejoksmusen oiktal randal, 20 m ü.m.t. keskmäižel korktusel, mugažo pen' Dolink-jogi (ven.: Долинка) om lidnan suves.

Matkad Tünen valdmeren Ohotskan meren randhasai om seičeme kilometrad pohjoižhe avtotedme (Starodubskoje-žilo). Matkad Suvisahalinskan keskuzpalahasai om 41 km suvhe orhal, 44 km avtotedme vai raudtedme, se om lähembaižeks lidnaks.

Klimat om ven. Voden keskmäine lämuz om +3,3 C°, heinkun-elokun +17,6..+18,1 C°, kezakun i sügüz'kun +14,1 i +13,6 C°, tal'vkun-uhokun −9,8..−12,6 C°. Paneb sadegid 1002 mm vodes, enamba elokus-redukus (110..119 mm kus), vähemba vilukus-sulakus (52..62 mm kus).

Lidnümbrikon tobmuden pämez' om sen Administracijan pämez' (mer). Edeline mer om Vitalii Danilov, radoi edel vn 2016 redukud. Lidnümbrikon Suiman ezimez' om Galina Dvoräninova vn 2005 kül'mkuspäi.

Vn 2010 Venäman rahvahanlugemižen mödhe lidnan eläjiden lugu oli 12 200 ristitud, lidnümbrikon pol', vn 2021 — 11 740 ristitud. Kaik 11 708 eläjad oli lidnas vl 2017. Kaikiš suremb lidnan ristitišt oli 15 000 eläjad vl 1967 i 15 900 eläjad vl 1992.

Ortodoksižen hristanuskondan Jumalanmaman Emäganpäivän puine jumalanpert'^[1] om saudud vl 2010.

Lapsiden opendusen aluzkundad oma koume nimitadud päivkodid, kaks' keskškolad (nomer 1 i 2), škol-internat, čomamahtoiden škol, sportškol. Sahalinan sauvondan i eländkodikommunaližen ižandusen tehnikum, sen Dolinskan filial^[2] om lidnan professionaližen opendusen aluzkundaks.

• 
  Vladimir Leninan muštpacaz lidnan torgul (2007)
• 
  Dolinsk-päraudtestancijan sauvuz vl 2016

1. ↑ Dolinskan pühäpertid sobory.ru-saital. (ven.)
2. ↑ Sahalinan sauvondan i eländkodikommunaližen ižandusen tehnikum, Dolinskan filialan sait (dfsts.sakhalin.gov.ru). (ven.)

• Lidnan da lidnümbrikon tobmuden sait (dolinsk.admsakhalin.ru). (ven.)
• Lidn da lidnümbrik Sahalinan agjan ohjastusen oficialižel sakhalin.gov.ru-saital. (ven.)

Dolinsk Vikiaitas