Baltiisk

Baltiisk
Балтийск

Lidnanznam	Flag
Valdkund	Venäma
Eläjiden lugu (2020)	33,658 ristitud
Pind	49,1 km²
Pämez'	Jevgenii Lebedev (uhoku 2017—, velgusentäutai)
Telefonkod	+7−40 145-xx-xxx
Avtokod	39, 91
Aigvö	UTC+2 (MSK−1)

Baltiisk (ven.: Балти́йск, saks.: Baltijsk, pol'š.: Bałtyjsk; edel 1946. vot — Pillau, mugažo saksan kelel, ven.: Пилла́у) om Venäman lidn Kaliningradan agjan päivlaskmas. Se om Venäman kaikiš päivlaskmaižemb lidn, Baltiiskan rajonan administrativine keskuz (vspäi 2008), Venäman Baltijan laivišton päsodameribaz.

Eländpunktan aluz om pandud vl 1626. Se sai lidnan statusad vl 1725. Toižen mail'man sodan Rusked Armii anasti lidnad šturman jäl'ghe vn 1945 25. päiväl sulakud. Oli sauptud lidnaks nevondkundaližen aigan, nügüd' om avaitud verazmalaižile.

Baltiisk šingotase järedal meriportal i kivivoin vendal, laivankohendusel^[1], sömedheotandoil da turizmal.

Lidn sijadase Baltijan meren suvižel randal, Baltiiskan sal'men randoil, Baltiiskan čirakon pohjoižes, 10 m ü.m.t. keskmäižel korktusel. Matkad Kaliningradhasai om 40 km pohjoižhe orhal, 50 km avtotedme vai raudtedme. Lähembaižed lidnad oma Primorsk 11 km pohjoižpäivnouzmha orhal, raudtel vai avtol i Svetlii 14 km päivnouzmha orhal (lahten kal't) vai 32 km avtotedme.

Klimat om ven meren kontinentaližen röunal. Voden keskmäine lämuz om +8,6 C°, kezakun-sügüz'kun +15..+19 C°, tal'vkun-uhokun −1..+1 C°. Ekstremumad oma −26 C° i +34 C°. Paneb sadegid 670 mm vodes, enamba elokus (75 mm), vähemba uhokus-sulakus (32..39 mm kus). Meriveden lämuz sase +16..+19 Cel'sijan gradushasai kezakus-sügüz'kus.

Kaik kaks' žilod mülüdas lidnankundha Baltiiskan ližaks: Lunino (492 rist. vl 2010) i Beregovoje (13 rist. vl 2010).

Vn 2010 Venäman rahvahanlugemižen mödhe lidnan eläjiden lugu oli 32 697 ristitud, lidnankundan — 33 202 ristitud, rajonan ühesa kümnendest. Vspäi 2002 lidnan ristitišt vajehtase 32..33 tuh. eläjid röunoiš (kaikiš suremb 33 576 rist. vl 2009). Vl 2017 kaik 33 181 ristitud elihe lidnas i 33 659 ristitud kaikes lidnankundas.

Rahvahad (lidnan eläjad, enamba 0,4 % vl 2010, ozutadud rahvahudenke): venälaižed — 85,8 %, ukrainalaižed — 5,9 %, vaugedvenälaižed — 4,2 %, totarlaižed — 0,7 %, litvalaižed — 0,4 %, saksalaižed — 0,4 %, toižed rahvahad — 2,6 %.

Ortodoksižen hristanuskondan nell' pühäpertid^[2] oma saudud lidnas: ph. Jurgijan meripäjumalanpert', ph. Aleksandr Nevalaižen päjumalanpert' (vspäi 2011) i jumalanpert', ph. Dimitrii Donalaižen časoun'.

Professionaližen opendusen aluzkundad ratas lähembaižiš lidnoiš.

• 
  Laivišton oficeriden pert'
• 
  Ph. Jurgijan meripäjumalanpert' (vspäi 1991 — ortodoksine hristanuskond), vn 2017 nägu
• 
  Laivad meriportas (2021)
• 
  Baltijan laivišton muzei (2017)
• 
  Baltiisk-päraudtestancijan sauvuz vl 2017

1. ↑ Baltiiskan 33. laivankohendusen tegimen sait (33срз.рф). (ven.)
2. ↑ Baltiiskan pühäpertid sobory.ru-saital. (ven.)

• Lidnan tobmuden sait (baltijsk.gov39.ru). (ven.)

Baltiisk Vikiaitas