Polärnii

Polärnii
Полярный

Lidnanznam	Flag
Valdkund	Venäma
Eläjiden lugu (2023)	12,154 ristitud
Pind	358,05 km²
Telefonkod	+7−81 551-xx-xxx
Aigvö	UTC+3

Polärnii (ven.: Поля́рный) om Venäman lidn Murmanskan agjan pohjoižes. Vspäi 2008 om sodahoštusen lidnaks i mülüb Sauptud administrativiž-territorialižhe «Aleksandrovsk»-ühtnikha (521 km²) territorialižeks ümbrikoks.

Eländpunktan aluz om pandud vl 1896 kuti kommertižen Aleksandrovsk-portan žilo Sergei Vitten taričendan mödhe. Se sai oficiališt lidnan statusad vl 1899 üläihastuzavaidusen ühtes. Vl 1926 kätihe Aleksandrovskoje-žiloks, vl 1931 udesnimitihe Polärnoje-žiloks. Vspäi 1939 om lidnan statusanke tošti da nügüdläiženke nimenke.

Pohjoižen laivišton trallaividen baziruindan jädumatoi punkt i laivankohenduztegim oma olmas Polärnii-lidnas, mugažo leibtegim radab.

Lidn sijadase tundras, Barencan meren Jekaterinan merikaran randal, 20 m ü.m.t. keskmäižel korktusel. Kaikiš korktemb čokkoim om Vestnik-mägenpä 115 metrad korktusel. Matkad SATÜ:n Snežnogorsk-keskushesai om kahesas kilometras päivlaskmha orhal vai 14 km avtotedme (avtobusad ühtenzoittas lidnoid), Murmanskhasai — 30 km suvipäivlaskmha orhal vai 60 km avtotedme.

Klimat om subarktine meren. Voden keskmäine lämuz om +1,4 C°, kezakun-elokun +9..+12 C°, tal'vkun-keväz'kun −5..−8 C°.

Vn 2010 Venäman rahvahanlugemižen mödhe lidnan eläjiden lugu oli 17 293 ristitud, vn 2021 — 12 293 ristitud. Kaik 17 568 eläjad oli lidnas vl 2017, 17 494 eläjad vl 2020. Kaikiš suremb lidnan ristitišt oli 27 635 eläjad vl 1989.

Ortodoksižen hristanuskondan kaks' pühäpertid^[1] oma saudud i avaitud: ph. Mikulai-čudonsädajan jumalanpert' (om pühästadud vl 1999) i puine časoun' (om letud vll 2014−2017).

Lapsiden opendusen aluzkundad oma severz'-se päivkodid, keskškolad nomer 1, 2, 7, gimnazii, čomamahtoiden škol, lapsiden da norišton sportškol kahtišti Nevondkundaližen Ühtištusen V.N. Leonov-vägimehen nimed. Murmanskan valdkundaližen tehnižen universitetan filial^[2] om lidnan professionaližen opendusen aluzkundaks.

• 
  Cirkulärine pert' vl 2017
• 
  Sodameriläžundkodin nägu vl 2017
• 
  Kolan flotilijan päfater (2006. voz' vai aigemba)
• 
  Lidnan kodirandantedištandmuzei (2017)
• 
  «Kaluga»-, «Lipeck»- i «Jaroslavl'»-VA-laivad Polärnijan merivaldmoidenno vl 2015
• 
  Nevondkundaline lidnanznam (1990)

1. ↑ Polärnijan pühäpertid sobory.ru-saital. (ven.)
2. ↑ Polärnijan filial Murmanskan valdkundaližen tehnižen universitetan mstu.edu.ru-saital. (ven.)

• Aleksandrovsk-SATÜ:n tobmuden aluzkundoiden oficialine sait (zato-a.ru). (ven.)
• Aleksandrovsk-SATÜ:n Ezitajiden Nevondkundan oficialine sait (sovet-a.ru). (ven.)

Polärnii Vikiaitas