Kol

Kol
Кола

Lidnanznam	Flag
Valdkund	Venäma
Eläjiden lugu (2023)	8,933 ristitud
Pind	10 km²
Pämez'	Svetlana Čukareva (reduku 2014—)
Telefonkod	+7−81 553-xx-xxx
Avtokod	51
Aigvö	UTC+3 (MSK+0)

Kol (ven.: Ко́ла) om Venäman lidn Murmanskan agjan pohjoižes, Murmanskan suvine ezilidn. Se om Kolan rajonan lidnankund da administrativine keskuz.

Eländpunktan aluz om pandud vl 1565 kuti meriport da lidnuz. Torguind Evropan maidenke šingotihe aigan mändes, i vl 1780 Kol sai lidnan oiktusid. Lidnan nimi sündui Kol-jogen mödhe. Kol'jok znamoičeb «kuldjogi» saameks. Mugažo toine versii starinoičeb, miše kul'joki om «kalajogi».

Vl 1854 Kol oli pandud mantazole anglijalaižel «Miranda»-korvetal, oli jänu pal'han ühteks vodeks. Se sai lidnan statusad möst vl 1965.

Kolan tegimišton päedheotandad oma oludentegim^[1], mebel'fabrik, sauvondkompanijad, raudteholitusen edheotandad. Äjiden eläjiden radinsija sijadase Murmanskas.

Lidn seižub Kolan da Tuloman jogiden ühthejoksmusen randoil, 15 m keskmäižel korktusel valdmeren pindan päl. Znamasine mägi om Solovarak (ven.: Соловарака, kildinsaam.: Суоловарра) 80 m ü.m.t. kortte. Harvad manrehkaidused oleldas.

Murmansk sijadase ani lidnan röunan taga, matkad Murmanskan keskushesai om 12 km pohjoižhe avtotedme, Kolan lahten randadme.

Kol om lidnankundan üks'jäižeks eländpunktaks.

Lidnankundan pämez' om sen Deputatoiden Nevondkundan ezimez'. Lidnan erigoittud Administracii om likvidiruidud vn 2020 tal'vkus, sen pämehed oliba Andrei Vinogradčii (semendku 2017 — reduku 2019), Andrei Černov (tal'vku 2014 — uhoku 2017).

Vn 2010 Venäman rahvahanlugemižen mödhe lidnan eläjiden lugu oli 10 437 ristitud, rajonan ristitišton nelländez. Kaik 9 701 eläjad oli lidnas vl 2017. Kaikiš suremb lidnan ristitišt oli 16 541 eläjad vl 1989.

Ortodoksižen hristanuskondan koume pühäpertid^[2] oma avaitud lidnas: Pühän Jumalanmaman Blagoveššenjan päjumalanpert' (saudihe vll 1800−1819), ph. Varlaam Keretilaižen jumalanpert' (vspäi 2001), ph. Feodora Konstantinopolilaižen jumalanpert' kaumžomal tel Murmašinnoks (om pühästadud vl 2010).

Kolan transportine kolledž^[3] (edel vn 2015 kül'mkud sen nimi oli Kolan agrotegimištoline kolledž) om lidnan professionaližen opendusen aluzkundaks.

Maršruttaksid da taksid oma kundaližeks transportaks. Avtobusad i ezilidnelektrojonused ühtenzoittas lidnad Murmanskanke da ümbrištonke. «Kol»-avtote om lidnan suviröunaks, avtotesild om sil Tulomas päliči lidnan suvipäivlaskmas.

Kol-raudtestancii om jäl'gmäine passažiroiden täht edel Murmanskad, mugažo raudtesarak tuleb Nikel'-Murmanskii-stancijaspäi.

• 
  Lidnan administracijan sauvuz vl 2007
• 
  Pühän Jumalanmaman Blagoveššenjan päjumalanpert', vn 2011 nägu
• 
  «Passaž»-torguindkeskuz (2011, ende kul'turkeskuz)
• 
  Škol nomer kaks' (2011), nügüd' üks'jäine lidnas
• 
  Solovarak-mägi (2011)

1. ↑ Kolan oludentegimen sait (kolskoe-pivo.vsite.biz). (ven.)
2. ↑ Kolan pühäpertid sobory.ru-saital. (ven.)
3. ↑ Kolan transportižen kolledžan sait (ktk51.ru). (ven.)

• Lidnan tobmuden aluzkundoiden oficialine sait (kola.gov-murman.ru). (ven.)

Kol Vikiaitas